ମସ୍କୋ,୧୦ା୧୧(ପି.ଟି): ଡ୍ରଗ୍ସ ଚାଲାଣ ମାମଲାରେ ରୁଷିଆରେ ଗିରଫ ହୋଇଥିବା ଆମେରିକୀୟ ବାସ୍କେଟବଲ ଷ୍ଟାର ବ୍ରିଟନୀ ଗ୍ରୀନରଙ୍କୁ ପେନାଲ କଲୋନୀ(ସ୍ବତନ୍ତ୍ର କାରାଗାର)କୁ ପଠାଇ ଦିଆଯାଇଛି। ୮ଥର ଅଲଷ୍ଟାର ସେଣ୍ଟର ଓ ୨ ଥର ଅଲିମ୍ପିକ୍ସ ପଦକ ହାସଲ କରିଥିବା ଗ୍ରୀନରଙ୍କୁ ଅଗଷ୍ଟ ୪ ତାରିଖରେ ମସ୍କୋର ଶେରେମେଟ୍ୟୋଭୋ ବିମାନବନ୍ଦରରୁ ଗିରଫ କରାଯାଇଥିଲା। ବୁଧବାର ବ୍ରିଟନୀଙ୍କ ଲିଗାଲ ଟିମ୍ ଏ ସମ୍ପର୍କରେ ସୂଚନା ଦେଇଛି। ରଷୀୟ ଫେଡେରାଲ କୋର୍ଟ ତାଙ୍କୁ ୯ ବର୍ଷର ଜେଲ ଦଣ୍ଡାଦେଶ ଶୁଣାଇଥିବା ବେଳେ ଏହା ବିରୋଧରେ ଗ୍ରୀନର ଆବେଦନ କରିଥିଲେ।
ଏହି ଆବେଦନ ଖାରଜ ହୋଇ ଯାଇଥିବା ବେଳେ କାରାଗାରର ଭିଡକୁ ଏଡାଇବା ପାଇଁ ଗ୍ରୀନରଙ୍କୁ ସ୍ବତନ୍ତ୍ର କାରାଗାରକୁ ପଠାଯାଇଛି। ନଭେମ୍ବର ୪ ତାରିଖ ଯାଏଁ ଗ୍ରୀନରଙ୍କୁ ଡିଟେନସନ୍ ସେଣ୍ଟରରେ ରଖା ଯାଇଥିବା ବେଳେ ପରେ ତାଙ୍କୁ ପେନାଲ କଲୋନୀକୁ ସ୍ଥାନାନ୍ତର କରାଯାଇଥିଲା। ତେବେ ତାଙ୍କୁ କେଉଁ ସ୍ଥାନକୁ ସ୍ଥାନାନ୍ତର କରାଯାଇଛି ସେ ସମ୍ପର୍କରେ କୌଣସି ସୂଚନା ମିଳିନାହିଁ। ଏପରି ସ୍ଥାନାନ୍ତର ପାଇଁ ୪-୫ ଦିନ ସମୟ ଲାଗୁଥିବା ବେଳେ ପେନାଲ କଲୋନୀରେ ପହଞ୍ଚିବା ପରେ ସମସ୍ତ ସୂଚନା ମିଳିପାରିବ ବୋଲି କହିଛି ଗ୍ରୀନରଙ୍କ ଲିଗାଲ ଟିମ୍। ୩୨ ବର୍ଷୀୟ ଗ୍ରୀନର ଦୋଷ ସ୍ବୀକାର କରିଥିଲେ। ତରବରରେ ସେ ଏହି ଡ୍ରଗ୍ସ ପ୍ୟାକ କରିଥିଲେ ଓ ଏହା ପଛରେ କୌଣସି ଅପରାଧିକ ଷଡଯନ୍ତ୍ର ନଥିବା ମଧ୍ୟ ସେ କହିଥିଲେ।
