ସୋନପୁର,୭।୧(ନି.ପ୍ର.):ନଦୀ, ନାଳ ଓ ବନ୍ଧ ପରିବେଷ୍ଟିତ ସୁବର୍ଣ୍ଣପୁର ଜିଲାରେ ଶୀତକାଳୀନ ପକ୍ଷୀ ଗଣନା ଶେଷ ହୋଇଛି। ଗତବର୍ଷ ତୁଳନାରେ ଚଳିତବର୍ଷ ରେକର୍ଡ ସଂଖ୍ୟକ ପକ୍ଷୀ ଜିଲାକୁ ଆସିଥିବା ଜଣାପଡିଛି। ଏଥର ୯୧ ପ୍ରଜାତିର ମୋଟ ୩୫ ହଜାର ୪୬୦ରୁ ଅଧିକ ପକ୍ଷୀ ଆସିଛନ୍ତି। ଗତବର୍ଷ ଗଣନାରେ ଜିଲାକୁ ଏହି ସମୟରେ ୨୭ ହଜାର ପକ୍ଷୀ ଆସିଥିଲେ। ରବିବାର ସକାଳ ୬ଟାରୁ ଜିଲାର ଶତାଧିକ ଜଳାଶୟ ଓ ଚାଷ ଜମିରେ ଶୀତକାଳୀନ ପକ୍ଷୀ ଗଣନା କାର୍ଯ୍ୟ ଆରମ୍ଭ ହୋଇଥିଲା। ଗଣନାରେ ବନ ବିଭାଗର ୧୭ଟି ଟିମ୍ ନିୟୋଜିତ ହୋଇଥିଲେ। ପକ୍ଷୀ ଗଣନାରେ ଜିପିଏସ୍, କ୍ୟାମେରା ଓ ବାଇନାକୁଲାର ବ୍ୟବହାର କରାଯାଇଥିଲା। ଏହି ସମୟରେ ୫ ନୂଆ ପ୍ରଜାତିର ୟୁରୋପିଆନ ଦେଶର ପକ୍ଷୀଙ୍କୁ ଦେଖିବାକୁ ମିଳିଥିଲା। ବିନିକା ଅଞ୍ଚଳରେ ପେଣ୍ଟେଡ୍ ଷ୍ଟର୍କ ଓ ନର୍ଦନ ପିଣ୍ଟେଲ୍ ପ୍ରଜାତିର ଦୁଇଟି ପକ୍ଷୀ ଦେଖିବାକୁ ମିଳିଥିଲା। ସେହିପରି ହରିହରଯୋର ଡ୍ୟାମ୍ରେ ଗ୍ରେଟ୍ କ୍ରେଷ୍ଟେଡ୍ ଗ୍ରୀବେ ଓ ଟଫ୍ଟେଡ୍ ଡକ୍ ଭଳି ପକ୍ଷୀମାନଙ୍କୁ ଦେଖିବାକୁ ମିଳିଛି। ସୋନପୁର ଓ ବିନିକା ଉଭୟ ସ୍ଥାନରେ ବିରଳ ପକ୍ଷୀ ରେଡ୍ କ୍ରେଷ୍ଟେଡ୍ ପୋଚାର୍ଡ ପକ୍ଷୀ ଦେଖିବାକୁ ମିଳିଥିଲା। ସେହିପରି ଗତବର୍ଷ ମହାନଦୀରେ ଦେଖିବାକୁ ମିଳିଥିବା କମନ୍ ମରଗାନସର ପକ୍ଷୀଙ୍କୁ ଏଥର ମଧ୍ୟ ବନବିଭାଗର କର୍ମଚାରୀ ଦେଖିବାକୁ ପାଇଛନ୍ତି। ପ୍ରଚଣ୍ଡ ଶୀତ ଯୋଗୁ ଆମେରିକା ଓ ୟୁରୋପ ମହାଦେଶର ପକ୍ଷୀ ମାନେ ଶୀତଦିନରେ ସୁବର୍ଣ୍ଣପୁର ଜିଲାକୁ ଆସୁଥିବା କହିଛନ୍ତି ସୁବର୍ଣ୍ଣପୁର ବନଖଣ୍ଡ ଅଧିକାରୀ ସୁଶାନ୍ତ କୁମାର ସାମନ୍ତରାୟ। ଚଳିତବର୍ଷ କୋଭିଡ୍ ପାଇଁ ପରିବେଶ ଶାନ୍ତ ରହିଛି। ତେଣୁ ଦେଶ ତଥା ଦେଶ ବାହାରର ପକ୍ଷୀ ଚିରସ୍ରୋତା ମହାନଦୀ ଓ ତେଲନଦୀକୁ ଅଧିକ ସଂଖ୍ୟାରେ ଆସିଛନ୍ତି। କିନ୍ତୁ ଗତ ୩ ତାରିଖ ନବବର୍ଷର ପ୍ରଥମ ରବିବାର ପଡି ଥିବାରୁ ମହାନଦୀ ଓ ତେଲନଦୀରେ ବଣଭୋଜି ପାଇଁ ପ୍ରବଳ ଭିଡ ଲାଗିଥିଲା। ଲୋକେ ଡିଜେ ଓ ମାଇକ୍ ବଜାଇଥିଲେ। ଶବ୍ଦ ପ୍ରଦୂଷଣ ଯୋଗୁ ଉଭୟ ନଦୀରେ ପକ୍ଷୀ ଗଣନା ସମ୍ଭବ ହୋଇନାହିଁ। କେବଳ ଜିଲାର ଛୋଟ ବଡ ଜଳାଶୟରେ ହିଁ ପକ୍ଷୀଗଣନା କରାଯାଇଛି। ନଦୀରେ ପକ୍ଷୀ ଗଣନା ହୋଇଥିଲେ ପକ୍ଷୀଙ୍କ ସଂଖ୍ୟା ବହୁ ଅଧିକ ହୋଇଥାନ୍ତା ବୋଲି ସହକାରୀ ବନ ସଂରକ୍ଷକ ତଥା ପକ୍ଷୀ ବିଶାରଦ ସୁଶୀଲ କୁମାର ତ୍ରିପାଠୀ କହିଛନ୍ତି।