ଚଣ୍ଡିଖୋଲ,୬।୫(ଡି.ଏନ.ଏ.): ମାତ୍ର ୧୦ କି.ମି.୫୦୦ ମିଟର ରାସ୍ତା ନିର୍ମାଣ କାର୍ଯ୍ୟରେ ଖର୍ଚ୍ଚ ହୋଇଛି ୨୨ କୋଟି ଟଙ୍କା। ହେଲେ କାର୍ଯ୍ୟ ଶେଷ ହେବାର ମାସକ ପରେ ରାସ୍ତାରେ ଫାଟ ସୃଷ୍ଟି ହୋଇଛି ଓ ଗୋଟିଏ ପାର୍ଶ୍ୱ ଦବିଯାଇଛି। ଏଭଳି ଘଟଣା ଦେଖିବାକୁ ମିଳିଛି ଚାରବାଟିଆ ପୂର୍ତ୍ତ ବିଭାଗ ଡିଭିଜନ ଅନ୍ତର୍ଗତ ବଡ଼ଚଣା ସବ୍ଡିଭିଜନରେ ହୋଇଥିବା ବାଲିଚନ୍ଦ୍ରପୁର-ବେଣୀପୁର ରାସ୍ତାରେ। ଗଜେନ୍ଦ୍ରପୁରଠାରେ ରାସ୍ତାର ଗୋଟିଏ ଅଂଶ ଦବିଯାଇଛି। ପୂର୍ବରୁ ଏହାର ଦେକୁରି ନିକଟରେ ୨ଟି ସ୍ଥାନରେ ଦବିଯିବାରୁ ସେଠାରେ ଠିକାଦାର ମରାମତି କରିଛନ୍ତି।
ସୂଚନା ଅନୁଯାୟୀ, ବାଲିଚନ୍ଦ୍ରପୁର-ବେଣୀପୁର ରାସ୍ତାକୁ ଦୁଇ ଭାଗରେ ବିଭକ୍ତ କରାଯାଇ ଟେଣ୍ଡର କରାଯାଇଥିଲା। ରାସ୍ତାର ଲମ୍ବ ୧୦ କି.ମି.୨୦୦ମିଟର ହୋଇଥିବାବେଳେ ଏହାକୁ ୧୧ କି.ମି. ୨୦୦ ମିଟର କରାଯାଇ ୨୦୨୧ ନଭେମ୍ବରରୁ କାର୍ଯ୍ୟ ଆରମ୍ଭ ହୋଇଥିଲା। କାର୍ଯ୍ୟ ଅବଧି ଶେଷ ହେବାର ବହୁ ଦିନ ପରେ ଗତ ମାର୍ଚ୍ଚ ଶେଷ ସପ୍ତାହରେ କାର୍ଯ୍ୟ ସରିଥିଲା। କାର୍ଯ୍ୟ ଶେଷ ହେବାପୂର୍ବରୁ ୨ଟି ସ୍ଥାନରେ ରାସ୍ତା ଦବିଯିବାରୁ ସେଠାରେ ପୁନର୍ବାର ମରାମତି କରାଯାଇଥିଲା। ଶୁକ୍ରବାର କୌଣସି ଭାରିଯାନ ଯିବାପରେ ରାସ୍ତା ଦବିଯାଇଛି। ବାଲିଚନ୍ଦ୍ରପୁରଠାରୁ କଳାଶ୍ରୀ ପର୍ଯ୍ୟନ୍ତ ୫ କି.ମି. ୫୦୦ମିଟର ରାସ୍ତା ପାଇଁ ୯ କୋଟି ୯୭ ଲକ୍ଷ ଟଙ୍କା ବ୍ୟୟ ଅଟକଳ କରାଯାଇଥିଲାବେଳେ କଳାଶ୍ରୀଠାରୁ ବେଣୀପୁର ପର୍ଯ୍ୟନ୍ତ ୫ କି.ମି. ୫୦୦ ମିଟର ରାସ୍ତା ନିର୍ମାଣ ପାଇଁ ବିଭାଗ ପକ୍ଷରୁ ୧୨ କୋଟି ୮୦ ଲକ୍ଷ ଟଙ୍କା ବ୍ୟୟ ଅଟକଳ କରାଯାଇଥିଲା। ଅଧିକ ବ୍ୟୟ ଅଟକଳ କରାଯାଇ ଥିବା କଳାଶ୍ରୀଠାରୁ ବେଣୀପୁର ରାସ୍ତା ନିର୍ମାଣରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ଉଠିଛି। ସେଥିପାଇଁ ଏହି ୫ କି.ମି. ୫୦୦ ମିଟର ରାସ୍ତାରେ ୩ଟି ସ୍ଥାନରେ ରାସ୍ତା ଦବିଯାଇଛି ବୋଲି କୁହାଯାଇଛି। ଏ ସମ୍ପର୍କରେ ବିଭାଗୀୟ ସହକାରୀ ଯନ୍ତ୍ରୀ ପ୍ରଫୁଲ୍ଲ କୁମାର ବେହେରାଙ୍କୁ ପଚାରିବାରୁ ସେ କୁହନ୍ତି, କୌଣସି ତ୍ରୁଟି ଯୋଗୁ ଏଭଳି ଘଟି ଥାଇପାରେ। ଏହାର ତୁରନ୍ତ ମରାମତି କରାଯିବ।