ନୂଆଗାଁ, ୨୫।୪ (ଡି.ଏନ୍.ଏ.): ନୟାଗଡ଼ ଜିଲା ଦଶପଲ୍ଲା ନିର୍ବାଚନମଣ୍ଡଳୀ ନୂଆଗାଁ ବ୍ଲକରେ ଶାସକ ଦଳର ଗୋଷ୍ଠୀକନ୍ଦଳ ଦିନକୁଦିନ ବଢ଼ିବାରେ ଲାଗିଛି। ଏହାର ପରିଣାମ ସ୍ବରୂପ ଉଦ୍ଘାଟନ ପୂର୍ବରୁ ଶାସକ ଦଳର ଅସନ୍ତୁଷ୍ଟ ଗୋଷ୍ଠୀର ଲୋକ ପ୍ରତିନିଧିଙ୍କ ନାମ ଲେଖା ଯାଇଥିବା ଫଳକକୁ ବିଭିନ୍ନ ସ୍ଥାନରେ ଭଙ୍ଗା ଯାଉଥିବା ଦେଖିବାକୁ ମିଳୁଛି।
ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ବିଜେଡି ପୁରୁଣା ଦଳୀୟ କର୍ମୀଙ୍କୁ ବାଦ୍ ଦେଇ ନୂଆ ମୁହଁକୁ ସମର୍ଥନ କରିବା ଦଳକୁ ମହଙ୍ଗା ପଡିଲାଣି। ଦିନକୁଦିନ ରାଜନୈତିକ ଉଷ୍ମତା ବଢିବା ସହ ବିବାଦ ଘନେଇବାରେ ଲାଗିଛି। ନିର୍ବାଚନରେ ଦଳୀୟ ସମର୍ଥନ ନ ପାଇ ବାଦ୍ ପଡିଥିବା ପୁରୁଣା କର୍ମୀଙ୍କ ମଧ୍ୟରେ ଅସନ୍ତୋଷ ଯୋଗୁ ଦଳୀୟ ସମର୍ଥତ୍ତ ପ୍ରାର୍ଥୀଙ୍କୁ ଜିତାଇବାରେ ବହୁ କଷ୍ଟ କରିବାକୁ ପଡିଥିଲା। ନୂଆଗାଁ ବ୍ଲକରେ ଭାଜପାରେ ବଳିଷ୍ଠ ବିରୋଧୀ ନ ଥିବା ବେଳେ ଅସନ୍ତୁଷ୍ଟ ବିଜେଡିର କର୍ମୀ ବହୁ ଗୋଷ୍ଠୀରେ ବିଭକ୍ତ ହୋଇଛନ୍ତି। ତେବେ ଅସନ୍ତୁଷ୍ଟ ଗୋଷ୍ଠୀ ବିଜେଡିକୁ ସମର୍ଥନ କରୁଥିବା ବେଳେ ଶାସକ ଦଳର ଦଶପଲ୍ଲା ବିଧାୟକଙ୍କ ବିରୋଧରେ ସ୍ବର ଉଠାଉଛନ୍ତି। ଦଶପଲ୍ଲା ବିଧାୟକଙ୍କୁ ବିରୋଧ କରି ନିର୍ବାଚନ ପୂର୍ବରୁ ତାଙ୍କ ଦ୍ୱାରା ଉଦ୍ଘାଟିତ ହୋଇଥିବା ଫଳକକୁ ଭାଙ୍ଗି ଦିଆଯାଉଛି। ନିର୍ବାଚନ ପରେ ଉଦ୍ଘାଟନ ପୂର୍ବରୁ ବିଭିନ୍ନ ସ୍ଥାନରେ ଫଳକକୁ ଭାଙ୍ଗି ଦେଉଛନ୍ତି ଦଳୀୟ ଅସନ୍ତୁଷ୍ଟ ଗୋଷ୍ଠୀ। ୨୧ ତାରିଖରେ ନୂଆଗାଁ ସ୍ବାସ୍ଥ୍ୟକେନ୍ଦ୍ର ପରିସରରେ ବିଧାୟକଙ୍କ ଦ୍ୱାରା ଉଦ୍ଘାଟନ ହେବାକୁ ଥିବା ବିଶୁଦ୍ଧ ପାନୀୟ ଜଳର ଫଳକକୁ ଭାଙ୍ଗି ଦିଆଯାଇଥିଲା। ରବିବାର ପାରାଢିପି ପଞ୍ଚାୟତରେ ଏକ ଫଳକକୁ ଭାଙ୍ଗି ଦିଆଯାଇଛି। ସିମିଳିସାହି ପିଡବ୍ଲ୍ୟୁଡି ରାସ୍ତାଠାରୁ ବାଲଣ୍ଡା ଆରଡି ରାସ୍ତା ପର୍ଯ୍ୟନ୍ତ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା ଫେଜ୍-୩ର ଶୁଭ ଭିତ୍ତିପ୍ରସ୍ତର ସ୍ଥାପନ ପାଇଁ ଏକ ଫଳକ ଲଗାଯାଇଥିଲା। ତାହା ରବିବାର ସକାଳ ୧୦ଟାରେ ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରାଙ୍କ ଦ୍ୱାରା ଉଦ୍ଘାଟିତ ହେବାର ସମସ୍ତ ଆୟୋଜନ ସରିଥିଲା। କିନ୍ତୁ ସକାଳୁ କେହି ଦୁର୍ବୃତ୍ତ ତାହାକୁ ଭାଙ୍ଗି ଦେଇଛନ୍ତି। ଦୁର୍ବୃତ୍ତ ଭାଙ୍ଗିବା ସମୟରେ ବିଧାୟକଙ୍କ ନାମ କାହିଁକି ରହିଲା କହି ଭାଙ୍ଗିଥିବା ଆଲୋଚନା ହେଉଛି। ପଂଚାୟତ ନିର୍ବାଚନ ସରିବାର କିଛି ମାସ ନ ଯାଉଣୁ ବିଭିନ୍ନ ସ୍ଥାନରେ ଫଳକ ଭାଙ୍ଗି ବିଧାୟକଙ୍କୁ ବିରୋଧ କରିବା କାର୍ଯ୍ୟରୁ ଦଳୀୟ କର୍ମୀଙ୍କ ଅସନ୍ତୋଷର ମାତ୍ରା ସ୍ପଷ୍ଟ ବାରି ହୋଇପଡୁଛି।