ରାଜକନିକା,୧୧।୧୨(ସଞ୍ଜୟ କୁମାର ଦାଶ): ସାଧାରଣ ଗରିବ ଶ୍ରେଣୀର ଲୋକମାନଙ୍କୁ ଆବାସ ଯୋଗାଇଦେବା ଲାଗି କେନ୍ଦ୍ର ଓ ରାଜ୍ୟ ସରକାର ଉଭୟ ଯୋଜନା କରିଛନ୍ତି। ହେଲେ କେନ୍ଦ୍ରାପଡ଼ା ଜିଲା ରାଜକନିକା ବ୍ଲକ ଅଧୀନ ସିହୋପଡ଼ା ଗଁାର ସତ୍ୟବ୍ରତ ଜେନା (୪୩) ଭଙ୍ଗା ନଡ଼ା ଛପର ଘରେ ୫ ପ୍ରାଣୀ କୁଟୁମ୍ବଙ୍କୁ ନେଇ କଳାତିପାତ କରୁଛନ୍ତି। ଆବାସ ଯୋଜନାରେ ଘର ଖଣ୍ଟିଏ ପାଇବା ଲାଗି ବାରମ୍ବାର ଆବେଦନ କିରିଥିଲେ ମଧ୍ୟ ତାହା ତାଙ୍କୁ ମିଳୁନାହିଁ। ପାଖରେ ସମ୍ବଳ ନ ଥିବାରୁ ଘର ଛପର କରିପାରୁ ନ ଥିବା ବେଳେ ବେଳାଏ ଖାଇଲେ ଆଉ ବେଳାକୁ ଉପବାସ ରହିବାକୁ ପଡୁଛି।
ଦିନ ଥିଲା, ସତ୍ୟବ୍ରତଙ୍କ ପରିବାର ବେଶ୍ ହସଖୁସିରେ ଚାଲିଥିଲା। ସତ୍ୟବ୍ରତ ଜଣେ ଇଲେକ୍ଟ୍ରିକାଲ ଇଞ୍ଜିନିୟର ଭାବେ କୋଲ୍କାତାର ଏକ କମ୍ପାନୀରେ କାର୍ଯ୍ୟ କରୁଥିଲେ। ୭ବର୍ଷ ପୂର୍ବେ ଏକ ସଡ଼କ ଦୁର୍ଘଟଣା ବଦଳାଇ ଦେଲା ତାଙ୍କ ପରିବାରର ଭାଗ୍ୟ। ଦୁର୍ଘଟଣାରେ ଗୁରୁତର ହୋଇ କୋମାକୁ ଚାଲିଗଲେ ସତ୍ୟବ୍ରତ। ଯାହାକିଛି ଥିଲା ସବୁ ବିକିଭାଙ୍ଗି ପତ୍ନୀ ତାଙ୍କର ଚିକିତ୍ସା କରାଇଲେ। ଏବେ ସତ୍ୟବ୍ରତ ବିଛଣାରୁ କୌଣସି ପ୍ରକାର ଉଠୁଛନ୍ତି। ସେ ଦିବ୍ୟାଙ୍ଗ ହୋଇଯାଇଛନ୍ତି। ପରିବାର କହିଲେ ସ୍ତ୍ରୀ ଅନିତା, ଦୁଇ ବଢ଼ିଲା ଝିଅ ସହ ଓ ୧୦ ବର୍ଷର ପୁଅ। ରୋଜଗାର କହିଲେ ଶୂନ। ଦୁଇ ଝିଅ ଭଲ ପାଠ ପଢୁଥିଲେ ମଧ୍ୟ ବାଧକ ସାଜିଛି ଦାରିଦ୍ର୍ୟ। ୟାଠୁ ତା’ଠୁ ମାଗିଯାଚି ଦୁଇଝିଅଙ୍କୁ କଲେଜରେ ପାଠ ପଢ଼ାଉଛନ୍ତି। ସତ୍ୟବ୍ରତ ଭିନ୍ନକ୍ଷମ ହୋଇଯିବା ପରେ ଅନ୍ୟର ସାହାଯ୍ୟ ସହଯୋଗକୁ ଅପେକ୍ଷା କରିଛନ୍ତି ପୂରା ପରିବାର। କେବଳ ସତ୍ୟବ୍ରତ ଭିନ୍ନକ୍ଷମ ଭତ୍ତା ପାଉଛନ୍ତି। ଏହାବାଦ୍ ପରିବାରରେ ପାଞ୍ଚଜଣ କୁଟୁମ୍ବ ଥିଲେ ବି ଚାରିଜଣଙ୍କୁ ମିଳୁଛି ରାଶନ୍ ଚାଉଳ। ଅର୍ଥ ନ ଥିବାରୁ ବିଦ୍ୟାଳୟରୁ ପୁଅ ନାମ କାଟି ଦେଇଛନ୍ତି ବୋଲି ସେ ଅଭିଯୋଗ କରିଛନ୍ତି। ଏହି ରାଶନ ଗଣ୍ଡାକ ହିଁ ପରିବାର ପ୍ରତିପୋଷଣରେ ସାହାଭରସା ପାଲଟିଛି। ରହୁଥିବା ଘର ଅର୍ଥ ଅଭାବରୁ ଛପର ହୋଇପାରିନି। ଘର କାନ୍ଥ ଫାଟି ଆଁ କଲାଣି। ଏ ସମ୍ପର୍କରେ ବହୁବାର ପଞ୍ଚାୟତ, ବ୍ଲକ ପ୍ରଶାସନକୁ ଗୁହାରି କରିଥିଲେ ବି ଆଜିପର୍ଯ୍ୟନ୍ତ ସରକାରୀ ସ୍ତରରେ ଆବାସ ଯୋଜନାରେ ଘର ଖଣ୍ଟିଏ ମିଳିଲାନାହିଁ। ଥିଲାବାଲା ସରକାରୀ ଆବାସ ହାତେଇଥିବା ବେଳେ ସତ୍ୟବ୍ରତଙ୍କ ପାଇଁ ତାହା ସାତସପନ ହୋଇଥିବା ପତ୍ନୀ ଅନିତା କହିଛନ୍ତି। ଜିଲାପାଳ ଏଥିପ୍ରତି ଦୃଷ୍ଟିଦେବାକୁ ସତ୍ୟବ୍ରତ ନିବେଦନ କରିଛନ୍ତି।