ବେଲଗ୍ରେଡ୍,୧୫ା୯(ପି.ଟି.) : ବିଶ୍ୱ କୁସ୍ତି ଚାମ୍ପିୟନଶିପରେ ୫୩ କିଗ୍ରା ଓଜନ ବର୍ଗରେ ବ୍ରୋଞ୍ଜ ପଦକ ଜିତିଛନ୍ତି ଭିନେଶ ଫୋଗତ। ଏହା ସହିତ ପ୍ରଥମ ଭାରତୀୟ ମହିଳା ରେସଲର ଭାବରେ ଦୁଇଟି ବିଶ୍ୱ ଚାମ୍ପିୟନଶିପ ପଦକ ଜିତି ସେ ଇତିହାସ ସୃଷ୍ଟି କରିଛନ୍ତି। ୨୮ ବର୍ଷୀୟ ଭିନେଶ ବ୍ରୋଞ୍ଜ ପଦକ ମୁକାବିଲାରେ ସ୍ବିଡେନର ଜୋନ୍ନା ମାଲ୍ମଗ୍ରେନଙ୍କୁ ୮-୦ରେ ପରାସ୍ତ କରିଥିଲେ। ଏହା ପୂର୍ବରୁ ୨୦୧୯ରେ କାଜାଖସ୍ତାନର ନୁର ସୁଲତାନରେ ମଧ୍ୟ ସେ ବ୍ରୋଞ୍ଜ ପଦକ ଜିତିଥିଲେ। ମଙ୍ଗଳବାରର ମଙ୍ଗୋଲିଆର ଖୁଲାନ ବଟଖ୍ୟୁଗାଙ୍କ ନିକଟରୁ ୭-୦ରେ ପରାଜିତ ହୋଇଥିଲେ ଭିନେଶ। ବଟଖ୍ୟୁଗା ଫାଇନାଲରେ ପହଞ୍ଚିବାରୁ ଭିନେଶଙ୍କୁ ରିପିଚେଜରେ ପ୍ରତିଦ୍ୱନ୍ଦ୍ୱିତା କରିବାକୁ ସୁଯୋଗ ମିଳିଲା। ରିପିଚେଜ ମୁକାବିଲାର ପ୍ରଥମ ରାଉଣ୍ଡରେ କାଜାଖସ୍ତାନର ଝୁଲଡିଜ ଏସିମୋଭାଙ୍କୁ ଫଲ୍ ସହିତ ୪-୦ରେ ପରାସ୍ତ କରିଥିଲେ। ପରବର୍ତ୍ତୀ ଲଢ଼େଇରେ ଆଜାରବୈଜାନର ଲୈଲା ଗୁରବାନୋଭା ଆହତ କାରଣରୁ ଅଂଶଗ୍ରହଣ ନକରିବାରୁ ବ୍ରୋଞ୍ଜ ପଦକ ମୁକାବିଲାରେ ପହଞ୍ଚିଥିଲେ ଭିନେଶ।
ସେହିପରି ୬୮ କିଗ୍ରା ବର୍ଗରେ ପ୍ରତିଦ୍ୱନ୍ଦ୍ୱିତା କରୁଥିବା ନିଶା ଦହିୟା ଗୁରୁବାର ବ୍ରୋଞ୍ଜ ପଦକ ପାଇଁ ମୁକାବିଲା କରିବେ। କ୍ୱାର୍ଟର ଫାଇନାଲରେ ବୁଲଗେରିଆର ସୋଫିଆ ଜର୍ଜିଭାଙ୍କୁ ୧୧-୦ରେ ପରାସ୍ତ କରି ସେମିରେ ପ୍ରବେଶ କରିଥିଲେ। ତେବେ ସେମି ମୁକାବିଲାରେ ଜାପାନର ଜୁନିୟର ବିଶ୍ୱ ଚାମ୍ପିୟନଶିପ ଚାମ୍ପିୟନ ଆମି ଇଶିଙ୍କ ନିକଟରୁ ୪-୫ରେ ହାରି ଯାଇଥିଲେ।