ବଇଣ୍ଡା,୨୨।୧(ଡି.ଏନ.ଏ.): ଅନୁଗୋଳ ଜିଲା କିଶୋରନଗର ଥାନା ଅଙ୍ଗପଡା ନିକଟସ୍ଥ ଦଳିତ ସାହିରେ ବୁଧବାର ମଝିଆଁ ଭାଇ ଗୁଣନିଧି ବେହେରା (୨୬)ଙ୍କୁ ତାଙ୍କ ସାନ ଭାଇ ଜେନାମଣି ବେହେରା ଶାବଳରେ ପିଟି ହତ୍ୟା କରିଛନ୍ତି। ଏ ନେଇ ଗୁଣନିଧିଙ୍କ ସ୍ତ୍ରୀ ମମତା ବେହେରା ଥାନାରେ ଅଭିଯୋଗ କରିବା ପରେ ପୋଲିସ ନଂ. ୧୧/୨୧ ରେ ଏକ ମାମଲା ରୁଜୁ କରି ଅଭିଯୁକ୍ତ ଜେନାମଣିଙ୍କୁ ଗୁରୁବାର ଗିରଫ କରିଛି।
ଗୁଣନିଧିଙ୍କ ପରିବାର ଦଳିତ ସମ୍ପ୍ରଦାୟର ହୋଇଥିବାବେଳେ ତାଙ୍କର ପର୍ବ ପାଇଁ କିଛିଦିନ ହେବ ଜେନାମଣି ଓ ଗୁଣନିଧି ବିଭିନ୍ନ ସ୍ଥାନରେ ଟଙ୍କା ମାଗିଥିଲେ। ଏହି ଟଙ୍କା ଭାଗବଣ୍ଟାକୁ ନେଇ ଉଭୟଙ୍କ ମଧ୍ୟରେ ମଙ୍ଗଳବାର ଗଣ୍ଡଗୋଳ ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ଜେନାମଣି ଗୁଣନିଧିଙ୍କୁ ଶାବଳରେ ମାଡ଼ ମାରିଥିଲେ। ସେ ଗୁରୁତର ଅବସ୍ଥାରେ ଅଙ୍ଗପଡା ମେଡିକାଲରେ ଭର୍ତ୍ତି ହେବା ପରେ ବୁଧବାର ତାଙ୍କର ମୃତ୍ୟୁ ଘଟିଥିବା ପୋଲିସ କହିଛି। ପରେ ପୋଲିସ ଜେନାମଣିଙ୍କୁ ଗିରଫ କରି ଆଠମଲିକ କୋର୍ଟ ଚାଲାଣ କରିଛି।