ଓ୍ବାରଙ୍ଗଲ,୮।୭ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ତେଲେଙ୍ଗାନାର ୱାରଙ୍ଗାଲ ଗସ୍ତରେ ଅଛନ୍ତି। ସେ ସକାଳେ ତେଲେଙ୍ଗାନାର ୱାରଙ୍ଗାଲରେ ପହଞ୍ଚିବା ପରେ ଭଦ୍ରକାଳୀ ମନ୍ଦିରରେ ପୂଜାର୍ଚ୍ଚନା କରିଥିଲେ। ଏହା ପରେ ସେ ରାଜ୍ୟ ପାଇଁ ପ୍ରାୟ ୬,୧୦୦ କୋଟି ଟଙ୍କା ମୂଲ୍ୟର ଭିତ୍ତିଭୂମି ବିକାଶ ପ୍ରକଳ୍ପର ମୂଳଦୁଆ ପକାଇଥିଲେ। ଏହା ପରେ ପ୍ରଧାନମନ୍ତ୍ରୀ ସଭାରେ ଉପସ୍ଥିତ ଲୋକଙ୍କୁ ସମ୍ବୋଧିତ କରିଥିଲେ। ପ୍ରଧାନମନ୍ତ୍ରୀ କହିଥିଲେ ଆଜି ଯେତେବେଳେ ଭାରତ ବିଶ୍ୱର ପଞ୍ଚମ ବୃହତ୍ତମ ଅର୍ଥନୈତିକ ଶକ୍ତି ପାଲଟିଛି, ସେତେବେଳେ ତେଲେଙ୍ଗାନାର ଲୋକଙ୍କର ଏଥିରେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ସମଗ୍ର ବିଶ୍ୱ ଆଜି ଭାରତରେ ପୁଞ୍ଜିି ବିନିଯୋଗ କରିବାକୁ ଆସୁଛନ୍ତି, ସେତେବେଳେ ଏକ ବିକଶିତ ଭାରତ ପାଇଁ ଏତେ ଉତ୍ସାହ ଅଛି, ସେତେବେଳେ ତେଲେଙ୍ଗାନା ପାଇଁ ସୁଯୋଗ ପରେ ସୁଯୋଗ ରହିଛି।
ଆଜି ସମସ୍ତ ପ୍ରକାର ମୌଳିକ ଭିତ୍ତିଭୂମି ପାଇଁ ପୂର୍ବ ଅପେକ୍ଷା ବହୁଗୁଣ ଦ୍ରୁତ ଗତିରେ କାର୍ଯ୍ୟ କରାଯାଉଛି ଏବଂ ରାଜପଥ ସହିତ ସାରା ଦେଶରେ ଅର୍ଥନୈତିକ ଏବଂ ଶିଳ୍ପ କରିଡରର ଏକ ନେଟୱାର୍କ ସ୍ଥାପନ କରାଯାଉଛି। ଆଜିର ନୂଆ ଭାରତ ହେଉଛି ଯୁବ ଭାରତ ଏବଂ ଏହା ଶକ୍ତିରେ ପରିପୂର୍ଣ୍ଣ। ଏକବିଂଶ ଶତାବ୍ଦୀର ଏହି ତୃତୀୟ ଦଶନ୍ଧିରେ ଏହି ସୁବର୍ଣ୍ଣ ସମୟ ଆମ ଉପରେ ଆସିଛି। ଆମକୁ ଏହି ସମୟର ପ୍ରତି ସେକେଣ୍ଡର ସମ୍ପୂର୍ଣ୍ଣ ବ୍ୟବହାର କରିବାକୁ ପଡିବ । ଦ୍ରୁତ ବିକାଶର କୌଣସି ସମ୍ଭାବନାଠାରୁ ଦେଶର କୌଣସି କୋଣକୁ ଛାଡି ଦିଆଯିବ ନାହିଁ। ଏହା ସହିତ ପ୍ରଧାନମନ୍ତ୍ରୀ ବିରୋଧୀ କଂଗ୍ରେସ ଏବଂ ବିଆରଏସ୍କୁ କଡ଼ା ସମାଲୋଚନା କରିଛନ୍ତି। ଉଭୟ ଦଳ ତେଲେଙ୍ଗାନା ପାଇଁ ବିପଜ୍ଜନକ ବୋଲି ସେ କହିଛନ୍ତି। ଏଭଳି ପରିବାରବାଦୀ ଦଳଙ୍କଠାରୁ ରାଜ୍ୟକୁ ଦୂରେଇ ରଖିବା ପାଇଁ ସେ ଆହ୍ବାନ ଦେଇଛନ୍ତି।
