ମାଲକାନଗିରି,୨୯।୧୦(ଡି.ଏନ୍.ଏ): ମାଲକାନଗିରି ଜିଲା ଚିତ୍ରକୋଣ୍ଡା ବ୍ଲକ ଜଡ଼ାମ୍ବ ଥାନା ଅନ୍ତର୍ଗତ କୁସୁମପୁଟ ଗ୍ରାମ ନିକଟ ଜଙ୍ଗଲରୁ ପୋଲିସ ଓ ବିଏସ୍ଏଫ୍ ମିଳିତ ଭାବେ ବିପୁଳ ପରିମାଣର ମାଓବାଦୀ ସାମଗ୍ରୀ ଜବତ କରିଛନ୍ତି। ତଥ୍ୟ ମୁତାବକ ବିଶେଷ ସୂତ୍ରରୁ ଖବର ପାଇ ଗତ କିଛିଦିନ ହେଲା ବିଏସ୍ଏଫ୍ ଓ ପୋଲିସ ମିଳିତ ଭାବେ କୋମ୍ବିଂ ଅପରେଶନ କରୁଥିଲେ। ତେବେ ଶୁକ୍ରବାର ସନ୍ଧ୍ୟାରେ ଜଡ଼ାମ୍ବ ଥାନା ଅନ୍ତର୍ଗତ କୁସୁମପୁଟ ଗ୍ରାମ ନିକଟ ଜଙ୍ଗଲରୁ ବିପୁଳ ପରିମାଣର ମାଓବାଦୀ ସାମଗ୍ରୀ ଜବତ କରାଯାଇଛି। ଏହି ମାଓ ସାମଗ୍ରୀ ମଧ୍ୟରୁ ଦୁଇଗୋଟି ୩୦୩ ରାଇଫଲ, ଦୁଇଗୋଟି ଗ୍ୟାସ ଗନ୍, ଚାରିଗୋଟି କଂଟ୍ରି ମେଡ ଗନ୍, ଦୁଇଟି ଟିଫିନ୍ ବୋମା, ଗୋଟିଏ ହେଚ୍.ଇ. ଗ୍ରାନେଡ୍, ୨୦ଟି ଡିଟୋନେଟର, ଗୋଟିଏ କ୍ୟାମେରାଫ୍ଲାସ୍, ଗୋଟିଏ ପ୍ରିଣ୍ଟର, ଗୋଟିଏ ଲାପଟପ୍ ବ୍ୟାଟେରି, ଗୋଟିଏ ସୋଲାର ପାନେଲ, ୭ ମିଟର ବିଦ୍ୟୁତ୍ ତାର, ୧୦୦ ମିଟର କଡେକ୍ସ ତାର, ୯୭୦ଟି ଜିଲଟିନ୍ ଷ୍ଟିକ୍, ଦେଢ଼ ମିଟର ବିଶିଷ୍ଟ ଛଅଗୋଟି ରଙ୍ଗ କପଡ଼ା, ଗୋଟିଏ ଟର୍ଚ୍ଚ ଲାଇଟ, ଗୋଟିଏ ହଳ ମାଓ କପଡ଼ା, ଗୋଟିଏ ହଳ ଚପଲ, ଗୋଟିଏ ଛତା, ଗୋଟିଏ ପାଣି ଜାର ଅନ୍ତର୍ଭୁକ୍ତ। ଏ ସମ୍ବନ୍ଧରେ ଆଜି ବିଏସ୍ଏଫ୍ ଆଇଜି ଡି.କେ. ଶର୍ମା ମାଲକାନଗିରି ସଦର ମହକୁମା ଗସ୍ତ କରି ଏକ ସାମ୍ବାଦିକ ସମ୍ମିଳନୀରେ ଯୋଗ ଦେଇ ପ୍ରକାଶ କରିଥିଲେ ଯେ, ବର୍ତ୍ତମାନ ମାଓବାଦୀମାନେ ପ୍ରାୟ ମାଲକାନଗିରି ଜିଲାରୁ ମୂଳପୋଛ ହୋଇଥିଲେ ସୁଦ୍ଧା କେଉଁଠି ନା କେଉଁଠି ତାଙ୍କର ଦବ୍ଦବା ଅଛି। ବିଏସ୍ଏଫ୍ ଓ ପୋଲିସ ମିଳିତ ବାବେ ବିଭିନ୍ନ ସ୍ଥାନରେ କୁମ୍ବିଂ ଅପରେଶନ କରୁଥିଲେ ମଧ୍ୟ ମାଲକାନଗିରି ଜିଲାରୁ ସମ୍ପୂର୍ଣ୍ଣ ଭାବେ ମାଓବାଦୀଙ୍କ ସମସ୍ୟା ଦୂର ହୋଇଛି ବୋଲି କହି ହେବନାହିଁ।