ନବରଙ୍ଗପୁର,୧୨।୭(ବି.ପ୍ର.)- ନବରଙ୍ଗପୁର ସଦର ବ୍ଲକ ଟିରଲୀ ଛକ ନିକଟରେ ଥିବା ପଲିଟେକ୍ନିକ ଟିଏମ୍ସି କେନ୍ଦ୍ରରୁ ଜଣେ ବିଏସ୍ଏଫ୍ ଯବାନ ଫେରାର ହୋଇଥିବା ବିଏସ୍ଏଫ୍ ୧୫ ବାଟାଲିଆନ କମାଣ୍ଡେଣ୍ଟ ନବରଙ୍ଗପୁର ଥାନାରେ ଅଭିଯୋଗ କରିଛନ୍ତି। ଗତ କିଛି ଦିନ ତଳେ ନବରଙ୍ଗପୁର କୋଭିଡ ହସ୍ପିଟାଲରୁ ଜଣେ କରୋନା ଆକ୍ରାନ୍ତ ବ୍ୟକ୍ତି କାନ୍ଥ ଡେଇଁ ଫେରାର ହୋଇଥିବା ନଜିର ଆସିଥିଲା। ଏବେ ଟିଏମ୍ସିରୁ ବିଏସ୍ଏଫ୍ ଯବାନ ଫେରାର ହୋଇଥିବା ସୂଚନା ମିଳିଛି l
ସୂଚନାନୁଯାୟୀ, ନବରଙ୍ଗପୁର ବିଏସ୍ଏଫ୍ କ୍ୟାମ୍ପର ଜଣେ ଯବାନ ଗତ ମାସ (ଜୁନ ) ୨୪ତାରିଖରେ ପଜିଟିଭ୍ ଚିହ୍ନଟ ହୋଇଥିଲେ। ତାକୁ ନବରଙ୍ଗପୁର କୋଭିଡ୍ ହସ୍ପିଟାଲରେ ରଖି ଚିକିତ୍ସା କରାଯାଇଥିଲା। ଗତ ଜୁନ ମାସ ୩୦ ତାରିଖରେ ସେ ସୁସ୍ଥ ହେବାରୁ ତାକୁ ଜୁଲାଇ ୧ରେ ଅବ୍ଜରଭେସନ ପାଇଁ କୋଭିଡ ମେଡିକାଲରୁ ନବରଙ୍ଗପୁର ପଲିଟେକ୍ନିକ କଲେଜରେ କରାଯାଇଥିବା ଟିଏମ୍ସିରେ ରଖାଯାଇଥିଲା l ଉକ୍ତ ଯବାନ ଜଣକ ଟିଏମ୍ସି କେନ୍ଦ୍ରରେ ରହିବାକୁ ରାଜି ହେଉ ନ ଥିବା ସହ ଘରକୁ ଯିବାକୁ ଛୁଟି ମାଗିଥିଲେ l କିନ୍ତୁ, ବର୍ତମାନ ରାଜ୍ୟରେ କୋଭିଡ ଚାଲିଥିବାରୁ ବିଏସ୍ଏଫ୍ କର୍ତ୍ତୃପକ୍ଷ ଉକ୍ତ ଯବାନଙ୍କୁ ଛୁଟି ଦେଇ ନ ଥିବାରୁ ସେ ୨ଦିନ ତଳେ ଅର୍ଥାତ ୧୦ତାରିଖ ସକାଳେ ଉକ୍ତ ଟିଏମ୍ସି କେନ୍ଦ୍ରରୁ କାହାକୁ ନ ଜଣାଇ ଫେରାର ହୋଇ ଯାଇଛନ୍ତି l ଫଳରେ ଉକ୍ତ ୧୦ତାରିଖ ଦିନ ହିଁ ବିଏସ୍ଏଫ୍ କର୍ତ୍ତୃପକ୍ଷ ଏନେଇ ନବରଙ୍ଗପୁର ଥାନାରେ ତାଙ୍କ ବିରୋଧରେ ଏତଲା ଦେଇଛନ୍ତି l ଏନେଇ କେସ ନଂ ୧୬୧/୨୦୨୦ ୨୭୦ ଧାରାରେ ମାମଲା ରୁଜୁ ହୋଇଥିଲା, ଯାହାକି ରବିବାର ଲୋକଲୋଚନକୁ ଆସିଛି l ଫେରାର ବିଏସ୍ଏଫ୍ ଯବାନ ଜଣକ ଘର ଆନ୍ଦ୍ରପ୍ରଦେଶର ଗୁଣ୍ଟୁର ଜିଲା ଅନ୍ତର୍ଗତ କଚିପୁଡ଼ି ଗ୍ରାମର ବୋଲି ଜଣାପଡ଼ିଛି l ନବରଙ୍ଗପୁର ପୋଲିସ ସେଠାକାର ଥାନାକୁ ଖବର ଦେବା ପରେ ସେ ସଂଗରୋଧରେ ରହିଥିବା ସୂଚନା ମିଳିଛି। ତେବେ ସୋମବାର ସେଠାରେ ପ୍ରଶାସନ ପକ୍ଷରୁ ଟିମସି ରେ ରଖାଯିବ ବୋଲି ନବରଙ୍ଗପୁର ଥାନା ପକ୍ଷରୁ କୁହାଯାଇଛି।
