ବୋଲଗଡ,୧୧।୮(ଦେବବ୍ରତ ହୋତା): ଖୋର୍ଦ୍ଧା ଜିଲା ବୋଲଗଡରେ ଥିବା ଭାରତ ସଞ୍ଚାର ନିଗମ ଲିମିଟେଡ(ବିଏସ୍ଏନ୍ଏଲ୍)ର ଟେଲିଫୋନ ଏକ୍ସଚେଞ୍ଜ କାର୍ଯ୍ୟାଳୟଟି ଜରାଜୀର୍ଣ୍ଣ ହୋଇପଡିରହିଛି। ଆଗରୁ ଏହା ଭଡାଘରେ କାର୍ଯ୍ୟ କରୁଥିଲା ବେଳେ ୨୦୦୦ ମସିହାରେ ବୋଲଗଡର କେନ୍ଦ୍ରସ୍ଥଳରେ ଏକ ସୁଦୃଶ୍ୟ ଅଟ୍ଟାଳିକା ନିର୍ମାଣ କରି ସ୍ଥାନାନ୍ତରିତ ହୋଇଥିଲା। କିନ୍ତୁ ମରାମତି ଓ ରକ୍ଷଣାବେକ୍ଷଣ ଅଭାବରୁ ବର୍ତ୍ତମାନ ଉକ୍ତ ଅଟ୍ଟଳିକାଟି ଭୂତକୋଠି ପାଲଟିଗଲାଣି। ଜଣେ ମାତ୍ର ଠିକା କର୍ମଚାରୀ ଏହାର ଦାୟିତ୍ୱରେ ଥିବା ବେଳେ ବ୍ଲକ ଅଞ୍ଚଳର ୧୯ଟି ପଞ୍ଚାୟତର ପ୍ରାୟ ୨୩୬ ଗ୍ରାମକୁ ସେବା ପ୍ରଦାନ କରିଥାଏ। ଆଗରୁ ୭୦୦ ଲ୍ୟାଣ୍ଡ ଲାଇନ ଟେଲିଫୋନ ସଂଯୋଗ ଥିବାବେଳେ ୨୦୧୯/୨୦ ପରଠାରୁ ତାର ଚିହ୍ନବର୍ଣ୍ଣ ନାହିଁ। ଏବେ ମୋବାଇଲ ସେବା ଯୋଗାଇବା ପାଇଁ ଦିଘିରୀ ସଂପୁର ବାଙ୍କୋଇ ସୁନାଖଳା ଓ ବୋଲଗଡଠାରେ ୫ଟି ଟାଓ୍ବାର କାର୍ଯ୍ୟ କରୁଛି। ଅପରପକ୍ଷେ କାର୍ଯ୍ୟାଳୟ ଦାୟିତ୍ୱରେ ଥିବା ଠିକା କର୍ମଚାରୀ ଜଣକ ଭାରତ ଫାଇବର ସଂସ୍ଥା ଦ୍ବାରା ପ୍ରଦତ୍ତ ଇଣ୍ଟରନେଟ ସେବାର ରକ୍ଷଣାବେକ୍ଷଣ ଓ ମରାମତି ପାଇଁ ନିୟୋଜିତ ହୋଇଛନ୍ତି। ସରକାରୀ କାର୍ଯ୍ୟାଳୟ ବ୍ୟାଙ୍କ ଓ ଅନ୍ୟାନ୍ୟ ବ୍ୟକ୍ତିଗତ ଇଣ୍ଟରନେଟ ୟୁଜରଙ୍କୁ ସେବା ଅବ୍ୟାହତ ରଖିବାକୁ ସେ ପ୍ରାୟତଃ ବ୍ୟସ୍ତ ରହୁଛନ୍ତି। କାର୍ଯ୍ୟାଳୟର କାନ୍ଥ, ଛାତରୁ ସିମେଣ୍ଟ ଖଣ୍ଡ ଓ ପ୍ଲାଷ୍ଟର ଖସି ମୁଲ୍ୟବାନ ମେଶିନଗୁଡିକ ପ୍ରତି ବିପଦ ସାଜିଛି। କାର୍ଯ୍ୟାଳୟ ପଛପଟ ପାଚେରିଟି ପ୍ରାୟ ୨ବର୍ଷ ହେବ ଭୁଶୁଡିଯାଇ ନିକଟସ୍ଥ ଘର କାନ୍ଥକୁ ଆଉଜିପଡି ବିପଦ ସୃଷ୍ଟି କରିଛି। ଏ ନେଇ ଉକ୍ତ ଘର ମାଲିକ ଅଭିଯୋଗ କରିଥିଲେ ସୁଦ୍ଧା କେହି ଶୁଣୁନାହାନ୍ତି। କାର୍ଯ୍ୟାଳୟ ପରିସରରେ ଲଟାବୁଦା ମାଡିଯାଇ ସରୀସୃପଙ୍କ ଅଭୟାରଣ୍ୟ ପାଲଟିଛି। କାର୍ଯ୍ୟାଳୟର ଲୁହା ଗେଟ ଓ ପାଚେରି ଉପରେ ଥିବା ଗ୍ରିଲ କଳଙ୍କି ଲାଗି ଛିଡି ପଡୁଛି। କାର୍ଯ୍ୟାଳୟର ଦୁରାବସ୍ଥା ପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେଇ ଏହାର ମରାମତି ଓ ରକ୍ଷଣାବେକ୍ଷଣ ପାଇଁ ପଦକ୍ଷେପ ନ ନେଲେ ଏହା କିଛିଦିନ ମଧ୍ୟରେ ସମ୍ପୂର୍ଣ୍ଣ ଅକାମୀ ହେବାର ଆଶଙ୍କା ଦେଖାଯାଇଛି। ଏ ସମ୍ପର୍କରେ ଖୋର୍ଦ୍ଧା ଟେଲିକମ ଏସ୍ଡିଓ ମୃଣ୍ମୟ ରଥ କୁହନ୍ତି, ଏବେ ପ୍ରାୟ ସିଭିଲ ଓ୍ବାର୍କ ପାଇଁ ଫଣ୍ଡର ବ୍ୟବସ୍ଥା ନାହିଁ, କେବଳ ନିହାତି ଆବଶ୍ୟକ ସ୍ଥଳେ କାର୍ଯ କରାଯାଉଛି। ଜିଲାର ପ୍ରାୟ ଟେଲିଫୋନ ଏକ୍ସଚେଞ୍ଜଗୁଡ଼ିକରେ ଠିକା କର୍ମଚାରୀ ନିଯୁକ୍ତି ଅଛନ୍ତି। ଏପରିକି ଜଣେ ଠିକା କର୍ମଚାରୀ ୨/୩ ଟି ଏକ୍ସଚେଞ୍ଜ ଦାୟିତ୍ୱ ତୁଲାଉଛନ୍ତି। ତେଣୁ ସୁବିଧା ଦେଖି ମରାମତି କରାଯିବ।