ନୂଆଦିଲ୍ଲୀ,୨।୨: ଲୋକ ସଭା ନିର୍ବାଚନ ପାଇଁ ପଞ୍ଜାବରେ ଶିରୋମଣିି ଅକାଳୀ ଦଳ ସହ ବହୁଜନ ସମାଜ ପାର୍ଟି (ବିଏସ୍ପି)ର ମେଣ୍ଟ ଜାରି ରହିବ। ଅର୍ଥାତ୍ ଲୋକ ସଭା ନିର୍ବାଚନରେ ବିଏସ୍ପି ଶିରୋମଣିି ଅକାଳୀ ଦଳ(ଏସ୍ଏଡି) ସହ ମେଣ୍ଟରେ ମିଳିତ ଭାବେ ପଞ୍ଜାବରେ ପ୍ରତିଦ୍ୱନ୍ଦ୍ୱିତା କରିବ। ଏନେଇ ବିଏସ୍ପି ସୁପ୍ରିମୋ ମାୟାବତୀ ଟୁଇଟ କରି ସଙ୍କେତ ଦେଇଛନ୍ତି। ଗୁରୁବାର ଦିଲ୍ଲୀରେ ଶିରୋମଣି ଅକାଳୀ ଦଳ ମୁଖ୍ୟ ସୁଖବୀର ସିଂ ବାଦଲ ଏବଂ ବିଏସ୍ପିର ବରିଷ୍ଠ ନେତୃତ୍ୱର ଏକ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ପଞ୍ଜାବର ପୂର୍ବତନ ଉପମୁଖ୍ୟମନ୍ତ୍ରୀ ସୁଖବୀର ସିଂ ବାଦଲ ଏବଂ ତାଙ୍କ ପତ୍ନୀ ତଥା ଏମ୍ପି ହରସିମରତ କୌର ବାଦଲ ସାମିଲ ହୋଇଥିଲେ। ଏଥିରେ ପଞ୍ଜାବରେ ହୋବାକୁ ଥିବା ଆଗାମୀ ଲୋକ ସଭା ସାଧାରଣ ନିର୍ବାଚନରେ ପୁରାତନ ପାରସ୍ପରିକ ମିଳିତ ମେଣ୍ଟ ଏବଂ ଉତ୍ତମ ସମନ୍ବୟ ଇତ୍ୟାଦି ସମ୍ପର୍କରେ ଆଗାମୀ ରଣନୀତି ଉପରେ ଆଲୋଚନା ହୋଇଥିଲା ବୋଲି ମାୟବତୀ ଟୁଇଟ କରି ସୂଚନା ଦେଇଛନ୍ତି। ମାୟାବତୀ କହିଛନ୍ତି, ଅକାଳୀ ଦଳ ଏବଂ ବିଏସ୍ପିର ବିଶ୍ୱସ୍ତ ସହଯୋଗୀ ଦଳ ଉପରେ ଜନସାଧାରଣଙ୍କ ନଜର ରହିଛି। ଲୋକ ସଭାରେ ଏହାର ଭଲ ଫଳାଫଳ ସହିତ ଦେଶର ରାଜନୀତିରେ ଏକ ଭଲ ପରିବର୍ତ୍ତନ ସମ୍ଭବ। ପଞ୍ଜାବର କଂଗ୍ରେସ ଏବଂ ଆମ ଆଦମୀ ପାର୍ଟିକୁ ଟାର୍ଗେଟ କରି ବିଏସ୍ପି ସୁପ୍ରିମୋ କହିଛନ୍ତି, ସ୍ଥାନୀୟ ଜନସାଧାରଣ ପ୍ରଥମେ କଂଗ୍ରେସ ବତ୍ତର୍ମାନ ଏଏପିର ପ୍ରତିଜ୍ଞା ବିରୋଧୀ କାର୍ଯ୍ୟକଳାପରୁ ଦୁଃଖିତ ଅଛନ୍ତି। ଅନ୍ୟପଟେ ଭାଜପାର ନକରାତ୍ମକ ରାଜନୀତିକୁ ଲୋକେ ପସନ୍ଦ କରୁନାହାଁନ୍ତି ବୋଲି ମାୟାବତୀ କହିଛନ୍ତି।