ନୂଆଦିଲ୍ଲୀ,୧୦।୨(ପି.ଟି.):ଦେଶରୁ ଦାରିଦ୍ର୍ୟ ଓ ବେରୋଜଗାରୀ ହଟାଇବା ଦିଗରେ କେନ୍ଦ୍ର ବଜେଟ ସୁଯୋଗ ହରାଇଛି ବୋଲି ଗୁରୁବାର ବିରୋଧୀ ଅଭିଯୋଗ କରିଛନ୍ତି। ଲୋକ ସଭାରେ ବଜେଟ ଉପରେ ଆଲୋଚନା ବେଳେ ଏହା କୃଷକ, ଚାଷୀ ଏବଂ ଗ୍ରାମାଞ୍ଚଳ ବିରୋଧୀ ବୋଲି ତୃଣମୂଳ କଂଗ୍ରେସ ସଦସ୍ୟ ସୌଗତ ରାୟ କହିଥିଲେ। ଆମେରିକାର ଶର୍ଟ ସେଲର ହିଣ୍ଡେନବର୍ଗ ରିସର୍ଚ୍ଚ ରିପୋର୍ଟ ପରେ ଆଦାନୀ ଗ୍ରୁପ୍ର ଷ୍ଟଟ୍ ମୂଲ୍ୟ ଯଥେଷ୍ଟ ହ୍ରାସ ପାଇଥିବାରୁ ନିବେଶକ କ୍ଷତିଗ୍ରସ୍ତ ହୋଇଛନ୍ତି। ଏହାର ତଦନ୍ତ ହେବା ଆବଶ୍ୟକ ବୋଲି ତୃଣମୂଳ ନେତା ଦାବି କରିଥିଲେ। ବିରୋଧୀ ଦଳ ନେତାମାନଙ୍କ ବିରୋଧରେ କେନ୍ଦ୍ର ସରକାର ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)କୁ ଲଗାଉଛନ୍ତି, କିନ୍ତୁ ନିବେଶକଙ୍କ ହଜାର ହଜାର କୋଟି ଟଙ୍କା କ୍ଷତି ପାଇଁ ଦାୟୀ କର୍ପୋରେଟ୍ ଗ୍ରୁପ୍ ପାଖକୁ ଇଡି ଯାଉନାହିଁ ବୋଲି ସୌଗତ ଅଭିଯୋଗ କରିଥିଲେ। କେନ୍ଦ୍ର ବଜେଟ ଦାରିଦ୍ର୍ୟ ଓ ବେରୋଜଗାରୀ ହଟାଇବାରେ ବିଫଳ ହୋଇଥିବାବେଳେ ଦେଶକୁ ଏକ ନିଯୁକ୍ତିବିହୀନ ଭବିଷ୍ୟତ ଆଡ଼କୁ ନେଇଯାଉଛି ବୋଲି ତୃଣମୂଳ କଂଗ୍ରେସ ନେତା କହିଥିଲେ।
ବଜେଟ ଉପରେ ଆଲୋଚନା ଆରମ୍ଭ କରି ଓ୍ବାଇଏସ୍ଆର୍ସିପି ସଦସ୍ୟ ମାର୍ଗାନି ଭରତରାମ କହିଥିଲେ, ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ରନ୍ଧନ ଗ୍ୟାସ ମୂଲ୍ୟ ବୃଦ୍ଧିକୁ ନିୟନ୍ତ୍ରଣ କରିବାରେ ବିଫଳ ହୋଇଛନ୍ତି। ଜେଡିୟୁ ନେତା ମହାବଳୀ ସିଂ ବିହାର ପାଇଁ ସ୍ବତନ୍ତ୍ର ପାହ୍ୟା ଦାବି କରିଥିଲେ।