ଅହମଦାବାଦ୍,୮।୭: ଗୁହାଳରେ ରଖାଯାଇଥିବା ମଦ ପିଇ ମଇଁଷିମାନେ ମାତାଲ ହୋଇ ସର୍ବସାଧାରଣ ରାସ୍ତାରେ ଭଙ୍ଗାରୁଜା କରିଥିଲେ। ଏଭଳି ଅଭାବନୀୟ ଘଟଣା ଗୁଜରାଟର ଗାନ୍ଧିନଗରରେ ଘଟିଛି। ଖବର ପାଇ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ମଇଁଷିଙ୍କୁ ଆୟତ୍ତ କରିଥିଲେ। ଏହା ପରେ ମାଲିକଙ୍କୁ ଖୋଜା ପଡ଼ିଥିଲା। ଗୁହାଳଘରେ ପୋଲିସ ଟିମ୍ ପହଞ୍ଚି ମାଲିକ ଲୁଚାଇ ରଖିଥିବା ୧୦୧ ବୋତଲ ମଦ ଜବତ କରିଛନ୍ତି। ରାଜ୍ୟରେ ମଦ ପିଇବା ଉପରେ କଟକଣା ଲଗାଯାଇଛି। ତେଣୁ ପୋଲିସ ସମ୍ପୃକ୍ତ ମଇଁଷି ମାଲିକ ଦିନେଶ ଠାକେରା, ଅମ୍ବରମ୍ ଠାକୋର ଏବଂ ରବି ଠାକୋରଙ୍କୁ ଗିରଫ କରିଛନ୍ତି। ମଇଁଷି କୁଣ୍ଡରେ ମାଲିକ ମଦ ବୋତଲ ରଖିଥିଲେ। ଅସାବଧାନତା ଯୋଗୁ ମଦ ବୋତଲ ଠିପି ଖୋଲି ଯାଇ ମଦ କୁଣ୍ଡ ପାଣିରେ ମିଶି ଯାଇଥିଲା। ମଇଁଷି ଏହାକୁ ପିଇବା ପରେ ମାତାଲ ହୋଇ ଯାଇଥିଲେ। ଗୁହାଳରୁ ଫିଟି ରାସ୍ତାକୁ ଆସି ଦୌଡ଼ାଦୌଡ଼ି କରିବା ଆରମ୍ଭ କରିଥିଲେ। ମାଲିକ ଏନେଇ ଡାକ୍ତରଙ୍କ ଖବର ଦେଇଥିଲେ। ଡାକ୍ତର ଯାଞ୍ଚ୍ କରିଥିଲେ। ମାତ୍ର କାହିଁକି ମଇଁଷିମାନେ ଏଭଳି ହେଉଛନ୍ତି ତାହା ଜାଣି ପାରି ନ ଥିଲେ। ଶେଷରେ ସେ ମଇଁଷି କୁଣ୍ଡ ପରୀକ୍ଷା କରିଥିଲେ। କୁଣ୍ଡର ପାଣିର ରଙ୍ଗ ଦେଖି ସେ ଆଶ୍ଚର୍ଯ୍ୟ ହୋଇଯାଇଥିଲେ। ଏଥିରେ ମଦ ମିଶିଥିବା ସେ କହିଥିଲେ। ଶେଷରେ କୁଣ୍ଡରେ ଲୁଚାଯାଇଥିବା ମଦ ବୋତଲ ମିଳିଥିଲା। ଜବତ ମଦର ଦାମ ୩୫ ହଜାର ଟଙ୍କା ହେବ ବୋଲି ପୋଲିସ କହିଛି।