ନନ୍ଦପୁର, ୧୬ା୭(ଶଙ୍କର ପୂଜାରୀ): କୋରାପୁଟ ଜିଲା ନନ୍ଦପୁର ବ୍ଲକ ଦେଇ ଯାଇଥିବା ବିଶାଖାପାଟଣା-କିରାଣ୍ଡଲ ରେଳ ଧାରଣାରେ ପୁଣି ରେଳଇଞ୍ଜିନ ବଗିକୁ ଛାଡି ଚାଲିଯିବା ଘଟଣା ଦେଖିବାକୁ ମିଳିଛି। ରବିବାର ପାଡୁଆ ଷ୍ଟେଶନ ନିକଟରେ ବିଶାଖାପାଟଣା ଯାଉଥିବା ଏକ ମାଲବାହୀ ଟ୍ରେନର ଇଞ୍ଜିନ ବଗିକୁ ଛାଡି ପ୍ରାୟ ୨ଶହ ମିଟର ଦୂରକୁ ଚାଲିଯାଇଥିଲା। ଟ୍ରେନର ଗାର୍ଡ ଓ ଲୋକୋ ପାଇଲଟଙ୍କ ଉପସ୍ଥିତ ବୁଦ୍ଧି ଯୋଗୁ ଧୀର ଗତିରେ ଗଡ଼ିଯାଉଥିବା ଏହି ମାଲବାହୀ ଟ୍ରେନକୁ ଅଟକାଇ ବଗିଗୁଡିକର ପୁନଃ ସଂଯୋଗ କରାଯାଇଥିଲା। ପରେ ଏହା ଗନ୍ତବ୍ୟ ସ୍ଥଳକୁ ଯାତ୍ରା କରିଥିଲା। ଅନ୍ୟପକ୍ଷରେ ଗତ ମାସକ ମଧ୍ୟରେ ଇଞ୍ଜିନ-ବଗି ଅଲଗା ହେବାପରି ଏକାଧିକ ଘଟଣା ଘଟିଲାଣି। ପୂର୍ବରୁ ଦାର୍ଲିପୁଟ ଓ ମାଛକୁଣ୍ଡ ଷ୍ଟେଶନରେ ସମାନ ଘଟଣା ଘଟିଥିଲା। ତେବେ ଏନେଇ କୌଣସି ଅଘଟଣ ଘଟି ନ ଥିବା କିମ୍ବା କିଛି ବଡଧରଣର କ୍ଷତି ହୋଇ ନ ଥିବା ରେଳ ବିଭାଗ ପକ୍ଷରୁ କୁହାଯାଇଛି। ଏବେ ରେଳଧାରଣାଗୁଡିକର ଦୋହରୀକରଣ କାର୍ଯ୍ୟ ଚାଲିଥିବାରୁ ପୁରୁଣା ରେଳ ଧାରଣାରେ ରେଳ ଚଳାଚଳ ନେଇ ନିର୍ଭର କରିବାକୁ ପଡୁଛି। ଫଳରେ ଟ୍ରେନ ଚାଲିଲେ ଧାରଣାରେ ଅଧିକ କମ୍ପନ ସୃଷ୍ଟି ହୋଇ ଇଞ୍ଜିନ-ବଗି ଅଲଗା ହେବା ପରି ଘଟଣାମାନ ବାରମ୍ବାର ଘଟୁଛି। ଏ ଦିଗରେ ରେଳ ବିଭାଗ ଗୁରୁତ୍ୱ ଦେବାକୁ ସାଧାରଣରେ ଆଲୋଚନା ହେଉଛି।