ଭୁବନେଶ୍ୱର,୧୭।୬ (ବନ୍ଦନା ସେଠୀ): ୨୦୨୪ ସ୍ବଚ୍ଛ ସର୍ବେକ୍ଷଣର ତୃତୀୟ ପର୍ଯ୍ୟାୟ ସର୍ବେକ୍ଷଣ ଜୁଲାଇ ୫ରୁ ଆରମ୍ଭ ହେବାକୁ ଯାଉଛି। ଏହି କ୍ରମରେ କେନ୍ଦ୍ରୀୟ ଟିମ୍ ବିଭିନ୍ନ ରାଜ୍ୟର ୟୁଏଲ୍ବି ପରିଦର୍ଶନ କରିବେ। କେନ୍ଦ୍ରୀୟ ଟିମ୍ ଖୁବ୍ଶୀଘ୍ର ଭୁବନେଶ୍ୱର ମହାନଗର ନିଗମ ଅଞ୍ଚଳ ମଧ୍ୟ ପରିଦର୍ଶନରେ ଆସିବେ। ତେବେ ଚଳିତ ଥର ଟିମ୍ ଫୋକସ୍ରେ ‘ବଲ୍କ ଓ୍ବେଷ୍ଟ ଜେନେରେଟର୍ସ’ (ବିଡବ୍ଲ୍ୟୁଜିଏସ୍)ଙ୍କ କାର୍ଯ୍ୟକଳାପ ରହିବ। ଏମାନେ ଯେଉଁ ବର୍ଜ୍ୟ ଉତ୍ପାଦନ କରୁଛନ୍ତି ତାହା କିପରି ସଂଗ୍ରହ ହେଉଛି, କିପରି ପରିବହନ କରାଯାଉଛି ଏବଂ ସବୁଠାରୁ ବଡ଼ କଥା ହେଉଛି ତାହା ଠିକ୍ ଭାବେ ପ୍ରକ୍ରିୟାକରଣ ହେଉଛି କି ନାହିଁ ତା’ର ତଦାରଖ କେନ୍ଦ୍ରୀୟ ଟିମ୍ କରିବେ। ସେହି ଅନୁପାତରେ ସ୍ବଚ୍ଛ ସର୍ବେକ୍ଷଣରେ ବିଭିନ୍ନ ୟୁଏଲ୍ବିକୁ ର଼୍ୟାଙ୍କ୍ ମିଳିବ। ଏନେଇ କେନ୍ଦ୍ରୀୟ ସ୍ବଚ୍ଛ ଭାରତ ମିଶନ (ସହରାଞ୍ଚଳ) ଯୁଗ୍ମ ନିର୍ଦ୍ଦେଶକ ଏବଂ ଜାତୀୟ ମିଶନ ନିର୍ଦ୍ଦେଶକ ରାଜ୍ୟ ସହରାଞ୍ଚଳ ବିକାଶ ବିଭାଗ ମୁଖ୍ୟଙ୍କୁ ଚିଠି ଲେଖିଛନ୍ତି। ତେବେ କେବଳ ଏତିକିରେ ଯାଞ୍ଚ ସୀମିତ ରହିବ ନାହିଁ, ବରଂ ସ୍ବଚ୍ଛତାର ଅନ୍ୟ ସମସ୍ତ ଦିଗ ଉପରେ ମଧ୍ୟ ଧ୍ୟାନ ଦିଆଯିବ ବୋଲି ଚିଠିରେ ଉଲ୍ଲେଖ ରହିଛି। ସେହିପରି ପରିମଳ ଏବଂ ବର୍ଜ୍ୟବସ୍ତୁ ପରିଚାଳନା କ୍ଷେତ୍ରରେ ସାମିଲ ରହିଥିବା ସମସ୍ତ ଅଂଶୀଦାର କିମ୍ବା ଏଜେନ୍ସି ଯେଭଳି ନିରୀକ୍ଷଣ କାର୍ଯ୍ୟରେ ସହଯୋଗ କରିବେ ତାହାକୁ ରାଜ୍ୟ ମିଶନ ନିର୍ଦ୍ଦେଶକ, ପୌରନିଗମ କମିଶନର, କାର୍ଯ୍ୟକାରୀ ଅଧିକାରୀ ନିଶ୍ଚିତ କରାଇବେ ବୋଲି ଉଲ୍ଲେଖ ହୋଇଛି।
୨୦୨୨ରେ ଭୁବନେଶ୍ୱରକୁ ସର୍ବଭାରତୀୟ ସ୍ତରରେ ୮୦ତମ ର଼୍ୟାଙ୍କ୍ ମିଳିଥିବାବେଳେ ୨୦୨୩ରେ ୩୪ତମ ର଼୍ୟାଙ୍କ୍ ମିଳିଥିଲା। ଏଥିସହ ଓ୍ବାଟର ପ୍ଲସ୍ ଏବଂ ଗାର୍ବେଜ୍ ଫ୍ରି ବା ଆବର୍ଜନା ମୁକ୍ତ ସହର ଭାବେ ୩ଷ୍ଟାର ରେଟିଂ ମିଳିବା ସହ ରାଜ୍ୟରେ ପ୍ରଥମ ସହର ଭାବେ ସ୍ଥାନ ଅଧିକାର କରିଥିଲା। ତେବେ ଚଳିତ ଥର ସର୍ବେକ୍ଷଣରେ ବଲ୍କ ଓ୍ବେଷ୍ଟ ଜେନେରେଟର୍ସଙ୍କ କାର୍ଯ୍ୟକଳାପକୁ ଆଧାର କରି ମାର୍କିଂ କରାଗଲେ ବିଏମ୍ସି ପାଇଁ ର଼୍ୟାଙ୍କ ହାସଲ ସହଜ ହେବନାହିଁ ବୋଲି ଆଶଙ୍କା କରାଯାଉଛି। ବିଏମ୍ସି ଅଞ୍ଚଳରେ ଥିବା ବହୁତଳ ଆପାର୍ଟମେଣ୍ଟ, ରେଷ୍ଟୁରାଣ୍ଟ, ହୋଟେଲରୁ ଦୈନିକ ୧୦୦କି,ଗ୍ରାରୁ ଅଧିକ ଆବର୍ଜନା ବାହାରୁଥିବାବେଳେ ସେମାନେ ତାହାକୁ ବିଏମ୍ସିକୁ ଦେଉଛନ୍ତି। ବିଶେଷକରି ସେଠାରୁ ବାହାରୁଥିବା ଓଦା ବର୍ଜ୍ୟକୁ ନିଜେ ପ୍ରକ୍ରିୟାକରଣ କରିବା ପାଇଁ ନିୟମ ରହିଥିବାବେଳେ କେହି ଏହାକୁ ପାଳନ କରୁନାହାନ୍ତି। ବିଏମ୍ସିର ସଫେଇ କର୍ମଚାରୀ ଆସିବେ ଏବଂ ସେମାନଙ୍କ ନିକଟରୁ ଦୈନିକ ଆବର୍ଜନା ନେବେ ଏହି ଧାରାରେ ନିଜ ମୁଣ୍ଡରୁ ଦାୟିତ୍ୱ ଖସାଇ ଦେଉଛନ୍ତି। ଏହାଦ୍ୱାରା ସହରର ଆବର୍ଜନା ଗଦା ହେଉଥିବା ଟେମ୍ପରାରୀ ଟ୍ରାନ୍ଜିଟ୍ ଷ୍ଟେଶନ (ଟିଟିଏସ୍) ଉପରେ ଅତିରିକ୍ତ ବୋଝ ପଡୁଛି। ଠିକ୍ ଭାବେ ବର୍ଜ୍ୟ ପ୍ରକ୍ର୍ରିୟାକରଣ ହୋଇ ନ ପାରିବାରୁ ବିଏମ୍ସିକୁ ସମାଲୋଚିତ ହେବାକୁ ପଡୁଛି। ତେଣୁ ପରିଦର୍ଶନରେ ଆସିବାକୁ ଥିବା କେନ୍ଦ୍ରୀୟ ଟିମ୍ ଯଦି ଏହି ଦିଗକୁ ଧ୍ୟାନ ଦେବେ ତେବେ ସର୍ବେକ୍ଷଣରେ ବିଏମ୍ସିର ଭଲ ର଼୍ୟାଙ୍କ୍ ପାଇବା ଆଶା ମଉଳିଯିବ। ଏନେଇ ବିଏମ୍ସିର ପରିମଳ ବିଭାଗ ଡେପୁଟି କମିଶନର ଡା. ମନୋରଞ୍ଜନ ସାହୁ କହିଛନ୍ତି, କେନ୍ଦ୍ରୀୟ ଟିମ୍ ବିଏମ୍ସିକୁ କେବେ ଆସିବେ ସେ ନେଇ କିଛି ସୂଚନା ମିଳିନାହିଁ। ନିୟମ ଅନୁଯାୟୀ, ବଲ୍କ ଓ୍ବେଷ୍ଟ ଜେନେରେଟରମାନେ ଦୈନିକ ବାହାରୁଥିବା ଓଦା ଆବର୍ଜନାକୁ ନିଜେ ପ୍ରକ୍ରିୟାକରଣ କରିବା କଥା। ମାତ୍ର କେହି ସେପରି କରୁନାହାନ୍ତି। ତେଣୁ ଏନେଇ ବିଏମ୍ସି ପକ୍ଷରୁ ସଚେତନ କରାଯାଉଛି। ଏନେଇ ଗତ କିଛିଦିନ ତଳେ ସହରର ୬୬୪ଜଣ ବଲ୍କ ଓ୍ବେଷ୍ଟ ଜେନେରେଟରଙ୍କୁ ଚିହ୍ନଟ କରାଯାଇ ବିଏମ୍ସି ପକ୍ଷରୁ ଚିଠି କରାଯାଇଥିଲା। ସେମାନଙ୍କ ସହ ଆଲୋଚନା କରାଯିବା ସହ ଆବର୍ଜନା ପ୍ରକ୍ରିୟାକରଣ କରିବା ପାଇଁ ସଚେତନ କରାଯାଇଥିଲା। ଖୁବ୍ଶୀଘ୍ର ଏନେଇ ଆଗାମୀ ପଦକ୍ଷେପ ଗ୍ରହଣ କରାଯିବ ଏବଂ ଚଳିତ ସ୍ବଚ୍ଛ ସର୍ବେକ୍ଷଣରେ ବିଏମ୍ସି ପୂର୍ବାପେକ୍ଷା ଆହୁରି ଭଲ କରିବ ବୋଲି ଡା. ସାହୁ କହିଛନ୍ତି।