ଆଠଗଡ,୬।୧୨(ସ୍ବ.ପ୍ର.):ଆଠଗଡ଼ ଖୁଣ୍ଟୁଣୀ ଥାନା ଅନ୍ତର୍ଗତ ନୂଆଶାସନ ଗ୍ରାମରେ ଆଠମାସ ହେବ ଗୁଳି ପଡୁଛି । ଏନେଇ ଗଁା ଲୋକେ ଭୟଭୀତ ହୋଇଯାଇଛନ୍ତି। ପ୍ରତ୍ୟେକ ଦିନ ଗୁଳି ଗ୍ରାମର ବିଭିନ୍ନ ସ୍ଥାନରେ ଦେଖିବାକୁ ମିଳୁଛି। ଏହି ଗୁଳି ବାଜି ସାଧାରଣ ଲୋକେ ଆହତ ହେଉଥିତ୍ବା ବେଳେ ଆଉ କାହାର ଘର ଆଜବେଷ୍ଟସ୍ ଭାଙ୍ଗୁଛି। ବହୁ ସମୟରେ ଗୁଳି ବାଜି ଗୃହପାଳିତ ପ୍ରାଣୀ ଆହତ ହେଉଛନ୍ତି। ପ୍ରାୟ ୨ ମାସ ପୂର୍ବେ ଗୋଟିଏ ଗୁଳି ଗ୍ରାମର ଜଣେ ମହିଳାଙ୍କ ହାତରେ ବାଜିବାରୁ ସେ ଆହତ ହୋଇଥିଲେ। ସେ ହେଲେ ସୁଭାଷିନୀ ରାଉତ। ଅସ୍ତ୍ରୋପଚାର କରାଯାଇ ତାଙ୍କ ହାତରୁ ଗୁଳି କଢ଼ାଯାଇଥିଲା। ଗୁଳି ଗ୍ରାମର ପୂର୍ବପଟୁ ମାଡ଼ ହେଉଛି ବୋଲି ଗ୍ରାମବାସୀ କହିଛନ୍ତି। ମାତ୍ର କିଏ ଓ କେଉଁଠାରୁ ଏହାକୁ ଫୁଟାଉଛି ତାହା ଜଣାପଡ଼ୁନାହଁ ବୋଲି ଗ୍ରାମର ସରୋଜ ପଣ୍ଡା,ଅଜୟ କୁମାର ସାହୁ, ରତିକାନ୍ତ ସାହୁ ପ୍ରମୁଖ କହିଛନ୍ତି। ନିକଟସ୍ଥ ଗ୍ରାମର କେତେଜଣ ଲୋକଙ୍କ କହିବାନୁଯାୟୀ, ମହାନଦୀର ଉତ୍ତର କୂଳ ପଶ୍ଚିମ ଦିଗରେ ନୂଆଶାସନ ଗ୍ରାମ ରହିଛି। ଏହି ଗ୍ରାମର ପୂର୍ବଦିଗରେ ମହାନଦୀର ଦକ୍ଷିଣ ତଟରେ ବାଙ୍କୀ ବ୍ଲକ ସାନ ମୁଣ୍ଡଳୀ-ନରାଜ ରାସ୍ତା ନିକଟ ଛୋଟ ପର୍ବତରେ ଓଡିଶା ପୋଲିସ, ସିଆଇଏସ୍ଏଫ ପକ୍ଷରୁ ଗୁଳିଚାଳନା ଅଭ୍ୟାସ ଓ ତାଲିମ ପ୍ରଦାନ କରାଯାଇଥାଏ। ତାଲିମ ପାଇଁ ବ୍ୟବହୃତ ଉଚ୍ଚ କ୍ଷମତାପନ୍ନ ଏକେ-୪୭ ବନ୍ଧୁକରୁ ନିିର୍ଗତ ଗୁଳି ଛୋଟ ପାହାଡ ଓ ମହାନଦୀ ପାର ହୋଇ ଗ୍ରାମରେ ପଡୁଥିବା ଆଶଙ୍କା କରାଯାଉଛି। ଅଭ୍ୟାସ ସ୍ଥାନରୁ ଗ୍ରାମର ଦୂରତା ପ୍ରାୟ ୫ କିଲୋମିଟର ଦୂର ହୋଇଥିବାରୁ ଏତେ ଦୂରରୁ ଗୁଳି କିପରି ଆସୁଛି ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ଏ ସଂକ୍ରାନ୍ତରେ ଖୁଣ୍ଟୁଣୀ ଥାନାରେ ବାରମ୍ବାର ଅଭିଯୋଗ କରାଯାଇଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଜନସାଧାରଣଙ୍କ ଜୀବନ ପ୍ରତି ବିପଦ ଆଶଙ୍କା ଥିବାରୁ ଏନେଇ ତୁରନ୍ତ ପଦକ୍ଷେପ ନିଆ ନ ଗଲେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।
ଏ ସମ୍ପର୍କରେ କୌଣସି ସୂଚନା ମିଳିନାହଁ ବୋଲି ଚୌଦ୍ୱାରା ଏସ୍ଡିପିଓ ସତ୍ୟବ୍ରତ ଲେଙ୍କା କହିଛନ୍ତି। ଏପ୍ରସଙ୍ଗରେ ଆଠଗଡ ତହସିଲଦାର ପ୍ରିୟବ୍ରତ ଦାସ କହିଛନ୍ତି, ଏନେଇ ଗ୍ରାମବାସୀଙ୍କ ତରଫରୁ କୌଣସି ଅଭିଯୋଗ ହୋଇନାହିଁ। ତେବେ ଜନସାଧାରଣଙ୍କ ସୁରକ୍ଷା ଦୃଷ୍ଟିରୁ ପ୍ରଶାସନ ତରଫରୁ ତୁରନ୍ତ ପଦକ୍ଷେପ ନିଆଯିବ।
