ନିରାକାରପୁର,୨୭।୧୨(ମାନସ ଚନ୍ଦ୍ର ପଟ୍ଟନାୟକ): ଖୋର୍ଦ୍ଧା ଜିଲା ନିରାକାରପୁର ଓ ରାମେଶ୍ୱର ଛାଡି ଯାଉନି ଦନ୍ତା ହାତୀ। ଫଳରେ ଲୋକେ ଆତଙ୍କିତ ଅବସ୍ଥାରେ ରହିଛନ୍ତି। ଗୁରୁବାର ରାତିରେ ଏହି ଗୋଠଛଡା ଦନ୍ତା ସ୍ଥାନୀୟ ଚିତ୍ରକୂଟ ପାହାଡ଼ ଦେଇ ନିରାକାରପୁର ଅଞ୍ଚଳରେ ପହଞ୍ଚିଥିଲା। ପରେ ଡିଆ ପଞ୍ଚାୟତର କୋଳସାହି ଗାଁ ଅତିକ୍ରମକରି କପିଳେଶ୍ୱର ପଡିଆରେ ରହିଥିଲା। ଭୋରୁ ଷ୍ଟେସନ ରାସ୍ତା ଦେଇ ରେଳଲାଇନ ଅତିକ୍ରମ କରି ରାମେଶ୍ୱର କାଜୁ ଜଙ୍ଗଲରେ ରହିଥିଲା। ହେଲେ ଯିବା ସମୟରେ ଅନେକଙ୍କ ପାଚେରୀ ଓ ଗଛ ପତ୍ର ଭାଙ୍ଗି ରୁଜି ଯାଇଥିଲା।
ସନ୍ଧ୍ୟାରୁ ବିଳମ୍ବିତ ରାତି ପର୍ଯ୍ୟନ୍ତ ଏହି ଦନ୍ତା ନିରାକାରପୁର ଅଞ୍ଚଳରେ ଆତଙ୍କ ସୃଷ୍ଟି କରିଥିଲା। ଯାହାଦ୍ୱାରା ରାତି ୧୦ଟା ଠାରୁ ନିରାକାରପୁରରୁ ଗଡ଼ଖାରଦ ଦେଇ ଭୂଷଣ୍ଡପୁର ଯାଉଥିବା ରାସ୍ତା, ନିରାକାରପୁର ଠାରୁ କାଶୀପୁର ଦେଇ ନୂଆଗଡ ଯାଉଥିବା ମୋରମୋର ସିଂହ ରାସ୍ତା, କାଶୀପୁର ଠାରୁ କୋଲସାହିକୁ ସଂଯୋଗ କରୁଥିବା ରାସ୍ତା ଏକ ପ୍ରକାର ଶୂନଶାନ ହୋଇ ପଡିଛି। ବିପଦ ଆଶଙ୍କା କରି ବିଦ୍ୟୁତ ସଂଯୋଗ ମଧ୍ୟ କାଟି ଦିଆଯାଇଥିଲା। ଫଳରେ ଲୋକେ ନାହିଁଥିବା ଅସୁବିଧାର ସମ୍ମୁଖୀନ ହୋଇଥିଲେ।
ଶୁକ୍ରବାର ଭୋରୁ ଷ୍ଟେସନ ରାସ୍ତା ଦେଇ ହାତୀଟି ଦିନ ତମାମ ଚିତ୍ରକୂଟ ପାହାଡ଼ ଓ ରାମେଶ୍ୱର କାଜୁ ଜଙ୍ଗଲରେ ଘୁରି ବୁଲିଥିଲା। ସନ୍ଧ୍ୟା ୬ଟା ବେଳକୁ ରାମେଶ୍ୱର ଖେଳ ପଡିଆଠାରେ ନୂଆ ଜଗନ୍ନାଥ ସଡ଼କ ଅତିକ୍ରମକରି ମେଡିକାଲ ରାସ୍ତା ଦେଇ ବ୍ୟାରେଜ ଆଡକୁ ମୁହାଁଇଥିଲା।ଫଳରେ ଦୀର୍ଘ ସମୟଧରି ନୂଆଜଗନ୍ନାଥ ସଡ଼କର ଉଭୟପାର୍ଶ୍ଵ ରାସ୍ତାରେ ଦୀର୍ଘ ସମୟ ଧରି ଗମନା ଗମନ ବାଧାପ୍ରାପ୍ତ ହୋଇଥିଲା। ଅନେକ ସମୟ ପର୍ଯ୍ୟନ୍ତ ଉଭୟ ପାର୍ଶ୍ୱ ରାସ୍ତାରେ ଗାଡି ମୋଟର ସବୁ ଅଟକ ରହିଥିଲା। ଏବେ ହାତୀଟି ବ୍ୟାରେଜ ପଟକୁ ମୁହାଁଇ ଥିବାରୁ ରାମେଶ୍ୱର ଗଡ଼ ଠାରେ ବସବାସ କରୁଥିବା ଅଧିବାସୀ ଏବେ ଆତଙ୍କିତ ଅବସ୍ଥାରେ ରହିଥିବା ଜଣାପଡିଛି।
ଖବର ପାଇ ଘଟଣା ସ୍ଥଳରେ ବନ ବିଭାଗ ପହଞ୍ଚି ଏହାକୁ ଘଉଡ଼ାଇବା ନିମନ୍ତେ ଚେଷ୍ଟା ଜାରି ରଖିଥିବା ଫରେଷ୍ଟର ପ୍ରଶାନ୍ତ କୁମାର ଦାଶ ସୂଚନା ଦେଇଛନ୍ତି। ବିଶେଷକରି ଲଗାଣ ବର୍ଷା ଯୋଗୁଁ ଧାନ କ୍ଷେତରେ ବର୍ଷା ପାଣି ଜମି ରହିଥିବାରୁ ହାତୀଟି କ୍ଷେତରେ ନପଶି ଏଣେତେଣେ ଘୁରି ବୁଲୁଥିବା କିଛି ବନ କର୍ମଚାରି କହିଛନ୍ତି। ତେବେ ଖବର ଲେଖା ହେବା ପର୍ଯ୍ୟନ୍ତ ହାତୀଟି ରାମେଶ୍ୱର ଗଡ଼ସ୍ଥିତ ବ୍ୟାରେଜ ପାଖରେ ଥିବା ସୂଚନା ମିଳିଛି।
ସୂଚନାଯୋଗ୍ୟକି, ଅଦ୍ୟାବଧି ଟାଙ୍ଗୀ ରେଞ୍ଜ ଅଧିନସ୍ଥ ନାରଗଦାରେ ୧୭ଟି, ମଳିପଡ଼ାରେ ୧ଟି,ଓଳସିଂହରେ ୧ଟି ଓ ରାମେଶ୍ୱରରେ ୧ଟି ମୋଟ ୪0ଟି ହାତୀ ରହିଥିବା ଜଣା ପଡିଛି। ଏମାନଙ୍କୁ ଘଉଡ଼ାଇବା ସହ ବ୍ୟାପକ ସଚେତନ କରାଯାଉଥିବା ଟାଙ୍ଗୀ ରେଞ୍ଜର ଦେବାଶିଷ ଭୋଇ ସୂଚନା ଦେଇଛନ୍ତି।
