ବାଲିଆ,୫ା୯(ସ୍ବ.ପ୍ର.):ଗତ ୩ ସପ୍ତାହ ପୂର୍ବେ ଲଘୁଚାପଜନିତ ଲଗାଣ ବର୍ଷା ଓ ବନ୍ୟାପରେ ବିରିଡି ବ୍ଲକର ବିଭିନ୍ନ ଧାନ ଜମି ଜଳାର୍ଣ୍ଣବ ହୋଇଯାଇଥିଲା। ବହୁ ଚାଷୀଙ୍କ ରୁଆ ଧାନ ପଚି ନଷ୍ଟ ହୋଇଯାଇଥିଲା। ଫଳରେ ଜମି ସବୁ ଏକ ରକମ ପଡ଼ିଆ ପଡିଯାଇଥିଲା। କେତେଜଣ ଚାଷୀ ବିଭିନ୍ନ ଅଞ୍ଚଳରୁ ତଳି ସଂଗ୍ରହ କରି ନଷ୍ଟ ହୋଇଥିବା ଜମିରେ ମାତ୍ରାଧିକ ଖର୍ଚ୍ଚ କରି ପୁନର୍ବାର ଧାନ ତଳି ରୋଇଥିଲେ। ଏବେ ଷଣ୍ଢ ଉପଦ୍ରବ ସେମାନଙ୍କୁ ଅସ୍ତବ୍ୟସ୍ତ କରି ପକାଇଛି। ଉଚ୍ଚା ଜମିରେ ରୁଆ ହୋଇଥିବା ଧାନ ସବୁ ଏବେ ବଢି କଳା ଧରିଥିବା ବେଳେ ବୁଲା ଷଣ୍ଢ ପଶି ଧାନ ଖାଇବା ସହ ଗୋଡରେ ଧାନ ଗଛ ସବୁ ଚକଟି ନଷ୍ଟ କରି ଦେଉଛନ୍ତି। ଏନେଇ ଚାଷୀମାନେ ହତାଶ ହୋଇପଡ଼ିଛନ୍ତି। ସରକାରଙ୍କ ପକ୍ଷରୁ ଷଣ୍ଢ ଉପଦ୍ରବ ରୋକିବାର କୌଣସି ବ୍ୟବସ୍ଥା କରାଯାଇ ନ ଥିବାରୁ ବହୁ ଫସଲ ନଷ୍ଟ ହେଉଥିବା ନେଇ ଚାଷୀମାନେ ଅଭିଯୋଗ କରିଛନ୍ତି। ଏହାର ପ୍ରତିକାର ପାଇଁ ଜିଲାପାଳଙ୍କ ଜନଶୁଣାଣିରେ ବାରମ୍ବାର ଦାବି କରାଯିବା ସତ୍ତ୍ୱେ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏନେଇ ତୁରନ୍ତ ପଦକ୍ଷେପ ନେବାକୁ ଡମ୍ବରୁ ଧର ଲେଙ୍କା, ଗୋଲେଖ ଚନ୍ଦ୍ର ସାହୁ, ଧରଣୀଧର ରାଉତ, ରଜନିକାନ୍ତ ବେହେରା, ନାରାୟଣ ଦାସ, ଲକ୍ଷ୍ମୀଧର ସ୍ବାଇଁ, ରାଜକିଶୋର ଜେନା, ନାରାୟଣ ଦାସ ପ୍ରମୁଖ ଦାବି କରିଛନ୍ତି।