ଝାରସୁଗୁଡ଼ା ଅଫିସ୍, ୨୦ା୧: ବିବାଦୀୟ ମୋବାଇଲ ଆପ୍ଲିକେଶନ (ଆପ୍) ‘ବୁଲ୍ଲି ବାଈ’କୁ ପ୍ରସ୍ତୁତ କରିବାରେ ସାମିଲ ଥିବା ଅଭିଯୋଗରେ ମୁମ୍ବାଇ କ୍ରାଇମ୍ବ୍ରାଞ୍ଚର ସାଇବର ପୋଲିସ ଟିମ୍ ଝାରସୁଗୁଡ଼ା ଜିଲା ବ୍ରଜରାଜନଗରର ଜଣେ ଏମ୍ବିଏ ଡିଗ୍ରୀଧାରୀଙ୍କୁ ଗୁରୁବାର ଗିରଫ କରିଛି। ସେ ହେଲେ ୨୮ ବର୍ଷୀୟ ନୀରଜ ସିଂ। ଏହାପୂର୍ବରୁ ମୁଖ୍ୟ ଅଭିଯୁକ୍ତଙ୍କ ସମେତ ୪ଜଣଙ୍କୁ ଗିରଫ କରାଯାଇଛି। ୫ମ ଅଭିଯୁକ୍ତ ଭାବେ ନୀରଜ ଗିରଫ ହେବା ପରେ ତାଙ୍କୁ ଝାରସୁଗୁଡ଼ା ଜିଲା ସିଜେଏମ୍ କୋର୍ଟରେ ହାଜର କରାଯାଇ ରିମାଣ୍ଡ ପାଇଁ ଆବେଦନ କରାଯାଇଥିଲା। କୋର୍ଟ ଅନୁମତି ପରେ ତାଙ୍କୁ ମୁମ୍ବାଇ ନିଆଯାଉଥିବା ଜଣାପଡ଼ିଛି।
ଗତ ୬ ତାରିଖରେ ବୁଲ୍ଲି ବାଈ ଆପ୍ର ମାଷ୍ଟରମାଇଣ୍ଡ ନୀରଜ ବିଷ୍ଣୋଇ (୨୧)ଙ୍କୁ ଦିଲ୍ଲୀ ପୋଲିସର ଇଣ୍ଟେଲିଜେନ୍ସ ଫ୍ୟୁଜନ ଏବଂ ଷ୍ଟ୍ରାଟେଜିକ୍ ଅପରେଶସନ୍ସ(ଆଇଏଫ୍ଏସ୍ଓ) ୟୁନିଟ୍ ଆସାମର ଜୋରାହାଟରୁ ଗିରଫ କରିଥିଲା। ଏହାପୂର୍ବରୁ ଜାନୁୟାରୀ ୪ ଓ ୫ରେ ଦ୍ୱାଦଶ ଶ୍ରେଣୀ ଛାତ୍ରୀ ଶ୍ୱେତା ସିଂ(୧୮) ଏବଂ ଇଞ୍ଜିନିୟରିଂ ଛାତ୍ର ମୟଙ୍କ ରାଓ୍ବଲ(୨୧)ଙ୍କୁ ଉତ୍ତରାଖଣ୍ଡରୁ ଏବଂ ଅନ୍ୟ ଜଣେ ଇଞ୍ଜିନିୟରିଂ ଛାତ୍ର ବିଶାଲ କୁମାର ଝା(୨୧)ଙ୍କୁ ବେଙ୍ଗାଲୁରୁରୁ ଗିରଫ କରାଯାଇଥିଲା। ସେମାନଙ୍କୁ ଜେରା ପରେ ଏହି ଘଟଣାରେ ଦେଶର ୨୫ରୁ ଊର୍ଦ୍ଧ୍ୱ ଯୁବତୀଯୁବକଙ୍କ ସମ୍ପୃକ୍ତି ଥିବା ପୋଲିସ ଜାଣିବାକୁ ପାଇଛି। ଏହାର ଲିଙ୍କ୍ ଓଡ଼ିଶାରେ ରହିଥିବା ଜଣାପଡିବା ପରେ ମୁମ୍ବାଇ କ୍ରାଇମ୍ବ୍ରାଞ୍ଚ ସାଇବର ସେଲ୍ ସବ୍ଇନ୍ସପେକ୍ଟର ଗଣେଶ ସିର୍କା ଓ ତାଙ୍କ ସହଯୋଗୀ ଗୁରୁବାର ଝାରସୁଗୁଡ଼ାରେ ପହଞ୍ଚତ୍ଥିଲେ। ଜିଲା ପୋଲିସ ସହାୟତାରେ ସେମାନେ ବ୍ରଜରାଜନଗର ସହରର ଇବ୍ପିଟ୍ରେ ରହୁଥିବା ନୀରଜ ସିଂଙ୍କ ଘରେ ଚଢାଉ କରି ତାଙ୍କୁ ଗିରଫ କରିଥିଲେ। ବୁଲ୍ଲି ବାଈ ଆପ୍ ଏବଂ ଏହାର ଟୁଇଟର ହ୍ୟାଣ୍ଡେଲ ତିଆରି କରିଥିବା ମୁଖ୍ୟ ଅଭିଯୁକ୍ତ ବିଷ୍ଣୋଇଙ୍କ ପ୍ଲାନିଂରେ ନୀରଜ ସାମିଲ ହୋଇଥିବା ସାଇବର ସେଲ୍ ଟିମ୍ର ଜଣେ ଅଧିକାରୀ ସୂଚନା ଦେଇଛନ୍ତି।