ନୂଆଦିଲ୍ଲୀ,୧୯।୧୧: ଇନ୍ଷ୍ଟାଗ୍ରାମ ପୋଷ୍ଟ ପାଇଁ ଗୁଜରାଟ ନିର୍ବାଚନ ଡ୍ୟୁଟିରେ ଥିବା ଜଣେ ଆଇଏଏସ୍ ଅଫିସରଙ୍କୁ ମହଙ୍ଗା ପଡିଛି। ଆଇଏଏସ୍ ଅଧିକାରୀ ଅଭିଷେକ ସିଂଙ୍କୁ ନିର୍ବାଚନ କମିଶନ ବହିଷ୍କାର କରିଛନ୍ତି।
ସେ ସାଧାରଣ ପର୍ଯ୍ୟବେକ୍ଷକ ଭାବେ ନିଯୁକ୍ତ ହେବା ସହ କାର୍ଯ୍ୟରେ ଯୋଗଦେଇଥିବା ନେଇ ଇନ୍ଷ୍ଟାଗ୍ରାମରେ ଶେୟାର କରିଥିଲେ। ନିଜର ପ୍ରଚାର ପାଇଁ ସେ ପଦବୀର ଅପବ୍ୟବହାର କରିଥିବା ନେଇ ନିର୍ବାଚନ କମିଶନଙ୍କ ଏକ ନିର୍ଦ୍ଦେଶନାମାରେ ଉଲ୍ଲେଖ କରିଛନ୍ତି। ଉତ୍ତରପ୍ରଦେଶ କ୍ୟାଡର ଆଇଏଏସ୍ ଅଫିସର ଅଭିଷେକଙ୍କୁ ଅହମ୍ମଦାବାଦର ବାପୁନଗର ଏବଂ ଅସରଓ୍ବା ଆସନ ପାଇଁ ସାଧାରଣ ପର୍ଯ୍ୟବେକ୍ଷକ ଭାବେ ନିଯୁକ୍ତ କରାଯାଇଥିଲା। ଅନ୍ୟପକ୍ଷେ ଆଇଏଏସ୍ ଅଧିକାରୀ ଏ ସମ୍ପର୍କରେ ଟୁଇଟ କରି ନିଜର ପ୍ରତିକ୍ରିୟା ରଖିଛି। ଇସିଆଇଙ୍କ ଏହି ନିର୍ଦ୍ଦେଶକୁ ସମ୍ମାନ ଜଣାଇବା ସହ ସେ ଏହି ପୋଷ୍ଟରେ କୌଣସି ଭୁଲ କରି ନ ଥିବା ଅଭିଷେକ୍ କହିଛନ୍ତି। ଜଣେ ସରକାରୀ କର୍ମଚାରୀ ଜନସାଧାରଣଙ୍କ ଟଙ୍କାରେ କିଣାଯାଇଥିବା ସରକାରୀ ଗାଡ଼ିରେ ନିଜର କାର୍ଯ୍ୟ ସମ୍ପାଦନା କରିବା ଏବଂ ଜନସାଧାରଣଙ୍କ ସହ ଯୋଗାଯୋଗ କରିବାରେ କୌଣସି ଭୁଲ ନାହିଁ। ଏହା କୌଣସି ପ୍ରଚାର କିମ୍ବା ଷ୍ଟଣ୍ଟ ନୁହେଁ ବୋଲି ଅଭିଷେକ ନିଜର ସ୍ପଷ୍ଟୀକରଣ ରଖିଛନ୍ତି।
