କାବୁଲ,୧୯ା୮: ଆଫଗାନିସ୍ତାନ ତାଲିବାନ କବ୍ଜାକୁ ଚାଲିଯିବା ପରେ ସେଠାରେ ବିଶୃଙ୍ଖଳା ପରିସ୍ଥିତି ସୃଷ୍ଟି ହୋଇଛି। ସୋସିଆଲ ମିଡିଆରେ ଲକ୍ଷଲକ୍ଷ ଲୋକ ଏହି ଘଟଣାକୁ ନେଇ ପ୍ରତିକ୍ରିୟା ଦେଇଚାଲିଛନ୍ତି। କିଛି ଦେଶ ମଧ୍ୟ ଆଫଗାନିସ୍ତାନରେ କ୍ଷମତା ହସ୍ତାନ୍ତର ନେଇ ନିଜ ନିଜ ମତ ପ୍ରକାଶ କରିଛନ୍ତି। ଏପରି ଘଡ଼ିସନ୍ଧି ମୁହୂର୍ତ୍ତରେ ଜଣେ ସୁପରମଡେଲ ବୁର୍ଖା ପିନ୍ଧିବା ବିବାଦ ଘେରକୁ ଆସିଛି।
ଏହି ମଡେଲଙ୍କ ନାମ ଲିଲି। କିଛିଦିନ ପୂର୍ବରୁ ସେ ବୁର୍ଖା ପିନ୍ଧି ସୋସିଆଲ ମିଡିଆରେ ଏକ ଫଟୋ ପୋଷ୍ଟ କରିଥିଲେ। ଆଫଗାନିସ୍ତାନର ସାମ୍ପ୍ରତିକ ସ୍ଥିତି ମଧ୍ୟରେ ସୋସିଆଲ ମିଡିଆ ୟୁଜର୍ସମାନେ ତାଙ୍କ ପୋଷ୍ଟ ଦେଖି ଚିହିଁଙ୍କି ଉଠିଛନ୍ତି। କିନ୍ତୁ ଲିଲି କୁହନ୍ତି, ସେ କିଛିଦିନ ହେବ ନ୍ୟୁଜ୍ ପଢ଼ିନାହାନ୍ତି। ତେଣୁ ଆଫଗାନିସ୍ତାନରେ ଚାଲିଥିବା ପରିସ୍ଥିତି ବିଷୟରେ ତାଙ୍କର କୌଣସି ଧାରଣା ନ ଥିଲା।
ବିବାଦ ବଢୁଥିବା ଦେଖି ଲିଲି ଏହି ପ୍ରସଙ୍ଗରେ କ୍ଷମା ମାଗିଛନ୍ତି। ସେ କହିଛନ୍ତି, ମୁଁ ଏବେ ବୁଝୁଛି ଲୋକେ ମୋତେ ବୁର୍ଖାରେ ଦେଖି କାହିଁକି ରାଗୁଛନ୍ତି। ଏହି ସୁପରମଡେଲଙ୍କୁ ଗୋଟିଏ ଫଟୋରେ ନୀଳ ବୁର୍ଖାରେ ଦେଖିବାକୁ ମିଳିଥିବା ବେଳେ ଅନ୍ୟ ଫଟୋରେ ପୂରା ଚେହେରା ଘୋଡ଼ାଇ ହୋଇଛନ୍ତି।
ସେ ଫଟୋରେ କ୍ୟାପଶନ ଲେଖିଛନ୍ତି, ଆମେ ପ୍ରତ୍ୟେକ ସ୍ତରରେ ବିବିଧତାକୁ ସ୍ବାଗତ କରିବାକୁ ଚାହୁଁଛୁ। ସେ ପରିବେଶ ବିବିଧତା, ସାଂସ୍କୃତିକ ବିବିଧତା ହେଉ କିମ୍ବା ଚିନ୍ତାଧାରର ବିବିଧତା ହେଉ। ଏହି ପୋଷ୍ଟଗୁଡ଼ିକ ସହିତ ଲିଲି ତାଙ୍କର ନୂତନ ପୁସ୍ତକର ପ୍ରମୋଟ କରୁଛନ୍ତି।