ଓଉଆଗାଡୋଗୁ, ୨୫।୧: ପଶ୍ଚିମ ଆଫ୍ରିକୀୟ ଦେଶ ବୁର୍କିନା ଫାସୋର ରାଷ୍ଟ୍ରପତି ରୋଚ୍ ମାର୍କ ଖ୍ରୀଷ୍ଟିଆନ କାବୋରେଙ୍କୁ ବିଦ୍ରୋହୀ ସୈନିକମାନେ ସୋମବାର ବନ୍ଦୀ କରିନେଇଛନ୍ତି। ଏ ନେଇ ୪ ପ୍ରମୁଖ ପ୍ରତିରକ୍ଷା ଉତ୍ସ ଏବଂ ପଶ୍ଚିମ ଆଫ୍ରିକାର ଜଣେ କୂଟନୀତିଜ୍ଞ ସୂଚନା ଦେଇଛନ୍ତି। ତେବେ ତାଙ୍କୁ କେଉଁଠି ରଖାଯାଇଛି ସେ ବାବଦରେ ଜଣାପଡ଼ିନାହିଁ। ଏହାପୂର୍ବରୁ ରବିବାର ରାଜଧାନୀ ଓଉଆଗାଡୋଗୁରେ ରାଷ୍ଟ୍ରପତିଙ୍କ ବାସଭବନ ନିକଟରେ ଗୁଳି ବିନିମୟ ହୋଇଥିଲା। ସେନା ଶିବିରରୁ ଏହି ଗୁଳିଚାଳନା କରାଯାଇଥିବା ଜଣାଯାଇଛି। ଏଥିଯୋଗୁ ରାଷ୍ଟ୍ରପତିଙ୍କ କନ୍ଭେରେ ସାମିଲ ହୋଇଥିବା ଗାଡ଼ିଗୁଡ଼ିକ କ୍ଷତିଗ୍ରସ୍ତ ହୋଇଥିବା ସୋମବାର ସକାଳେ ଦେଖିବାକୁ ମିଳିଥିଲା। କିନ୍ତୁ ସରକାରଙ୍କ ପକ୍ଷରୁ ଏହି ଗୁଳିଚାଳନା ଖବରକୁ ଖଣ୍ଡନ କରାଯାଇଥିଲା।
ଅନୁସାରେ, ବୁର୍କିନା ଫାସୋରେ ସେନା ବିଦ୍ରୋହର ଆଶଙ୍କା ଉପୁଜିଛି। ବିଶେଷ କରି ଦେଶରେ ଆତଙ୍କବାଦ କାର୍ଯ୍ୟକଳାପ ବୃଦ୍ଧି ପାଇବାକୁ ନେଇ ସୈନିକଙ୍କ ମଧ୍ୟରେ ଅସନ୍ତୋଷ ବଢ଼ୁଛି। ଆତଙ୍କବାଦୀ ଆକ୍ରମଣରେ ବହୁ ସଂଖ୍ୟାରେ ସାଧାରଣ ନାଗରିକ ଏବଂ ସୈନ୍ୟ ନିହତ ହେବାକୁ ନେଇ ଏହି ଅସନ୍ତୋଷ ତୀବ୍ର ରୂପ ଧାରଣ କରିଛି। ଆତଙ୍କବାଦୀଙ୍କ ମଧ୍ୟରେ ଅଧିକାଂଶଙ୍କ ଲିଙ୍କ୍ ଇସ୍ଲାମିକ ଷ୍ଟେଟ୍ (ଆଇଏସ୍) ଏବଂ ଅଲ୍-କାଏଦା ସହ ରହିଛି। ତେଣୁ ଇସ୍ଲାମୀୟ ଆତଙ୍କବାଦ ବିରୋଧରେ ଲଢ଼େଇ ପାଇଁ ସରକାର ଅଧିକ ସମର୍ଥନ ଓ ସହାୟତା ଯୋଗାଇଦେବାକୁ ଦାବି କରି ସେନା ବିଦ୍ରୋହ ମୁଣ୍ଡ ଟେକିଛି। ସେନା ବିଦ୍ରୋହ କରି ଶାସନ କ୍ଷମତାକୁ ନେବା ଚର୍ଚ୍ଚାକୁ ସରକାରଙ୍କ ପକ୍ଷରୁ ଖଣ୍ଡନ କରାଯିବା ସହ ସବୁକିଛି ନିୟନ୍ତ୍ରଣ ମଧ୍ୟରେ ଥିବା କୁହାଯାଇଛି। ଇସଲାମୀୟ ଆତଙ୍କବାଦୀ କାର୍ଯ୍ୟକଳାପ ଉପରେ ରୋକ ଲଗାଇବାରେ ରାଷ୍ଟ୍ରପତି କାବୋରେ ବିଫଳ ହୋଇଥିବା କହି ତାଙ୍କ ଇସ୍ତଫା ଦାବିରେ ରବିବାର ବହୁସଂଖ୍ୟାରେ ଲୋକ ବିକ୍ଷୋଭ ପ୍ରଦର୍ଶନ କରିଥିଲେ। ସରକାର ବିରୋଧୀ ପ୍ରଦର୍ଶନକାରୀଙ୍କୁ ବିଦ୍ରୋହୀ ସୈନ୍ୟଙ୍କ ସମର୍ଥନ ମିଳୁଛି।
