ସମ୍ବଲପୁର,୨୦।୨(ପ୍ରମୋଦ ବହିଦାର): ବୁର୍ଲା ଜ୍ୟୋତିବିହାରରୁ ଅଟଳ ଛକକୁ ସଂଯୋଗ କରୁଥିବା ଭିଆଇପି ରାସ୍ତା କଡ଼ରୁ ବୁଧବାର ରାତିରେ ସଂଜ୍ଞାହୀନ ଭାବେ ରକ୍ତାକ୍ତ ଅବସ୍ଥାରେ ସମ୍ବଲପୁର ବିଶ୍ୱବିଦ୍ୟାଳୟର ଜଣେ ଛାତ୍ରୀଙ୍କୁ ଉଦ୍ଧାର କରିଛି ବୁର୍ଲା ପୋଲିସ। ତାଙ୍କୁ ପ୍ରଥମେ ବୁର୍ଲା ଭିମସାରରେ ଭର୍ତ୍ତି କରାଯାଇଥିଲା। ତାଙ୍କ କପାଳରେ ଗଭୀର କ୍ଷତ ହୋଇ ରକ୍ତସ୍ରାବ ହେଉଥିବା ଦେଖିବାକୁ ମିଳିଛି। ତେବେ ତାଙ୍କର ଅବସ୍ଥା ସଙ୍କଟାପନ୍ନ ହେବାରୁ ରାତାରାତି ତାଙ୍କୁ ଉନ୍ନତ ଚିକିତ୍ସା ପାଇଁ ଭୁବନେଶର ସ୍ଥାନାନ୍ତର କରାଯାଇଥିବା ସୂଚନା ମିଳିଛି।
ଅଧିକ ଚିକିତ୍ସା ପାଇଁ ଛାତ୍ରୀଙ୍କୁ ଭୀମସାରରୁ ଭୁବନେଶ୍ବରର ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଛାତ୍ରୀଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଥିବା ପରିବାର ଲୋକ ସୂଚନା ଦେଇଛନ୍ତି। ଏନେଇ ପୋଲିସ ତଦନ୍ତ କରୁଥିବାବେଳେ ଅଟୋରେ ଥିବା କିଛି ଲୋକଙ୍କୁ ଅଟକ ରଖି ଜେରା କରୁଛି। କ୍ୟାଟରିଂ କାମ ପାଇଁ ଅଟୋରେ ଯାଉଥିବା ପ୍ରାଥମିକ ତଦନ୍ତରୁ ସୂଚନା ମିଳିଛି। ଘଟଣାସ୍ଥଳରେ ସେମାନେ ଅଟୋ ଅଦଳବଦଳ କରିବାକୁ ଓହ୍ଲାଇଥିବା କହିଛନ୍ତି।
ସୂଚନା ଯୋଗ୍ୟ ଯେ, ବୁଧବାର ରାତି ପ୍ରାୟ ସାଢ଼େ ୧୧ଟା ସମୟରେ କେତେକ ପଥଚାରୀ ରାସ୍ତାକଡ଼ରେ ରକ୍ତାକ୍ତ ଅବସ୍ଥାରେ ପଡ଼ିଥିବା ଉକ୍ତ ଛାତ୍ରୀଙ୍କୁ ଦେଖି ପୋଲିସକୁ ଖବର ଦେଇଥିଲେ। ଖବର ପାଇ ବୁର୍ଲା ଥାନା ପୋଲିସ ଘଟଣାସ୍ଥଳରେ ପହଞ୍ଚି ରକ୍ତାକ୍ତ ଅବସ୍ଥାରେ ଛାତ୍ରୀଙ୍କୁ ଉଦ୍ଧାର କରି ଭିମସାରରେ ଭର୍ତ୍ତି କରିଥିଲା। ଘଟଣା ସମ୍ପର୍କରେ ସଠିକ ଭାବେ କିଛି ଜଣାପଡ଼ି ନାହିଁ। ତେବେ ସେ ଏଠାରେ ଏଭଳି ଅବସ୍ଥାରେ କେମିତି ପଡ଼ିଥିଲେ, କେଉଁମାନେ ବା କିଏ ତାଙ୍କୁ ଆଣି ଏଠାରେ ଏଭଳି ଅବସ୍ଥାରେ ପକାଇଲା, ତାଙ୍କର ଏଭଳି ଅବସ୍ଥା ପାଇଁ ଦାୟୀ କିଏ ସେ ଦିଗରେ ପୋଲିସ ତଦନ୍ତ ଜାରି ରହିଛି। ତାଙ୍କର ମୋବାଇଲ ମଧ୍ୟ ଗାଏବ ହୋଇଯାଇଥିବା ବେଳେ ପୋଲିସ ଏହି ରାସ୍ତାର ବିଭିନ୍ନ ସ୍ଥାନରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କରୁଛି। ଅପରପକ୍ଷରେ ଆହତ ଛାତ୍ରୀ ଜଣକ ସମ୍ବଲପୁର ବିଶ୍ୱବିଦ୍ୟାଳୟର ଲାଇବ୍ରାରୀ ସାଇନ୍ସ ବିଭାଗରେ ପାଠ ପଢ଼ୁଛନ୍ତି। ସେ ବୁର୍ଲା ଜ୍ୟୋତିବିହାର ନିକଟ ଶିବ ବିହାରରେ ପରିବାର ସହ ରହୁଛନ୍ତି।
