ଚଣ୍ଡିଖୋଲ,୨୧ା୪ (ଡି.ଏନ୍.ଏ.): ଏବେ ସାରା ଓଡ଼ିଶା ଗ୍ରୀଷ୍ମ ପ୍ରବାହରେ ଜଳୁଥିବାବେଳେ ଗଛ କାଟିବାକୁ ନେଇ ଅସନ୍ତୋଷ ଦେଖାଦେଇଛି। ଏଭଳି ଘଟଣା ଦେଖିବାକୁ ମିଳିଛି ବଡ଼ଚଣା ବ୍ଲକ ଅନ୍ତର୍ଗତ ବାଳିଚନ୍ଦ୍ରପୁର-ବରୁହାଁ ରାସ୍ତାର ମାଣ୍ଡୁକା ଠାରୁ ଅରେଇକଣା ମଧ୍ୟରେ। ବଡ଼ଚଣା ପୂର୍ତ୍ତ ବିଭାଗ ପକ୍ଷରୁ ଏହି ରାସ୍ତାକୁ ପ୍ରଶସ୍ତୀକରଣ ଓ ଉନ୍ନତିକରଣ କରିବା ପାଇଁ ଜଣେ ଠିକାଦାରଙ୍କୁ ଟେଣ୍ଡର ଦିଆଯାଇଛି। ଟେଣ୍ଡର ନେବାପରେ ଠିକାଦାର ଜଣକ ଲୋକ ଲଗାଇ ରାସ୍ତାକଡ଼ରେ ଥିବା ଗଛଗୁଡ଼ିକୁ କାଟି ପେଟ୍ରୋଲ ଢାଳି ନିଆଁ ଲଗାଇ ପୋଡ଼ି ଦେଉଥିବା ସ୍ଥାନୀୟ ଅଞ୍ଚଳବାସୀ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ, ଠିକାଦାରଙ୍କ ଦ୍ୱାରା ନିଯୁକ୍ତ କର୍ମଚାରୀମାନେ ଦୈନିକ ଭୋର ସମୟରେ ରାସ୍ତାକଡ଼ରେ ଥିବା ଗଛଗୁଡ଼ିକରେ ନିଆଁ ଲଗାଇ ଦେଉଛନ୍ତି, ଯଦ୍ଦ୍ବାରା ରାସ୍ତା କଡ଼ ବୃକ୍ଷ ଶୂନ୍ୟ ହୋଇପଡୁଛି। ବର୍ତ୍ତମାନର ଅବସ୍ଥାରେ ପଥିକମାନଙ୍କ ପାଇଁ ବୃକ୍ଷର ଆବଶ୍ୟକତା ଥିବାବେଳେ ଗଛଗୁଡ଼ିକୁ ନିଆଁ ଲଗାଇ ଜାଳିଦେବା ଅତ୍ୟନ୍ତ ଦୁଃଖଦାୟକ ଘଟଣା ବୋଲି ପରିବେଶବିତ୍ମାନେ ପ୍ରକାଶ କରିଛନ୍ତି। ଏନେଇ ବିଭାଗୀୟ ସହକାରୀ ନିର୍ବାହୀ ଯନ୍ତ୍ରୀ ସ୍ନିଗ୍ଧା ଦାସଙ୍କୁ ପଚାରିବାରେ ସେ କୁହନ୍ତି, ଏ ସମ୍ପର୍କରେ ମୁଁ ଜାଣିନି। କ୍ଷେତ୍ର ପରିଦର୍ଶନ କରାଯାଇ କାର୍ଯ୍ୟାନୁଷ୍ଠାନ ନିଆଯିବ।