କୋକସରା,୨୨ା୭(ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲା କୋକସରା ଥାନା ଅନ୍ତର୍ଗତ ମାଝିଗୁଡ଼ା ପଞ୍ଚାୟତ ଦାବ୍ରିଗୁଡ଼ା ଗ୍ରାମର ସୁଦର୍ଶନ ନାଏକଙ୍କ ଘର ବାରଣ୍ଡା ଆଗରେ ଥିବା ୟାମାହା ନମ୍ବର ଓଡି ୦୮ ଏଲ୍ ୭୨୬୨କୁ ଶୁକ୍ରବାର ବିଳମ୍ବିତ ରାତିରେ କେହି ଅଜଣା ଦୁର୍ବୃତ୍ତ ପୋଡି ଦେଇଥିବା ନେଇ କୋକସରା ଥାନାରେ ଅଭିଯୋଗ ହୋଇଛି।
ସୂଚନାନୁଯାୟୀ, ଦାବ୍ରିଗୁଡ଼ା ଗ୍ରାମର ସୁଦର୍ଶନ ନାଏକ ନିଜ ଝିଅର ବିବାହ ସମୟରେ ଧର୍ମଗଡ ବ୍ଲକ ତେଣ୍ଡାପାଲି ଗ୍ରାମର ଜନୈକ ଯୁବକଙ୍କୁ ବାଇକ ଯୌତୁକରେ ଦେଇଥିଲେ, ହେଲେ କିଛି କାରଣକୁ ନେଇ ବିବାହ ବିଚ୍ଛେଦ ହେବାରୁ ଯାନିଯୌତୁକ ଦେଇଥିବା ସାମଗ୍ରୀ ସହ ବାଇକ୍କୁ ମଧ୍ୟ ନେଇ ଆସିଥିଲେ କନ୍ୟାପକ୍ଷ । ଜ୍ବାଇଁଙ୍କୁ ଦେଇଥିବା ବାଇକ୍ଟି ରାତିରେ ଘର ବାରଣ୍ଡାରେ ଲକ୍ କରି ରଖିଥିବା ବେଳେ ବିଳମ୍ବିତ ରାତିରେ କେହି ଦୁର୍ବୃତ୍ତ ଆସି ବାଇକକୁ ପୋଡ଼ି ଦେଇଥିବା ଦେଖିବାକୁ ମିଳିଛି। ବାଇକ୍ଟି ନିଆଁରେ ସମ୍ପୂର୍ଣ୍ଣ ଭାବେ ପୋଡ଼ିଯାଇଛି। ଏନେଇ ଶନିବାର କୋକସରା ପୋଲିସରେ ସୁଦର୍ଶନ ନାଏକ ଅଭିଯୋଗ କରିଛନ୍ତି। ତେବେ କିଏ କାହିଁକି ବାଇକକୁ ପୋଡ଼ିଛି ତାହାର କାରଣ ଅସ୍ପଷ୍ଟ ରହିଛି। କୋକସରା ପୋଲିସ ପକ୍ଷରୁ ୧୯୧/୨୩ରେ ଏକ ମାମଲା ରୁଜୁ କରି ତଦନ୍ତ ଜାରି ରହିଥିବା ନେଇ ତଦନ୍ତକାରୀ ପୋଲିସ ଅଧିକାରୀ ସୂଚନା ଦେଇଛନ୍ତି।
