ଢେଙ୍କାନାଳ ଅଫିସ,୩୦।୬: ପ୍ରାୟ ସାଢ଼େ ୮କୋଟି ଟଙ୍କାରେ ପ୍ରସ୍ତାବିତ ଢେଙ୍କାନାଳ ସହରସ୍ଥିତ ପୁରୁଣା ବସ୍ଷ୍ଟାଣ୍ଡ ଉନ୍ନତୀକରଣ କାର୍ଯ୍ୟ ଖୁବ୍ଶୀଘ୍ର ଆରମ୍ଭ ହେବ। ଏଥିପାଇଁ ଏଠାକୁ କିଛିଦିନ ବସ୍ ଚଳାଚଳ ବନ୍ଦ ରହିବ। ପୁରୁଣା ବସଷ୍ଟାଣ୍ଡ୍ କାମ ଶେଷ ହେବା ପର୍ଯ୍ୟନ୍ତ ମହିଷାପାଟସ୍ଥିତ ପ୍ରସ୍ତାବିତ ନୂତନ ବସ୍ଷ୍ଟାଣ୍ଡରେ ବସ୍ ରହଣି ଲାଗି ଓଏସ୍ଆରଟିସି ପକ୍ଷରୁ ପ୍ରଶାସନକୁ ପତ୍ର ଲେଖାଯାଇଥିଲା। ତେବେ ଏକାଧିକ ସମସ୍ୟା ଦୃଷ୍ଟିରୁ ଏହି ନିଷ୍ପତ୍ତିରେ ରାଜି ହୋଇନାହିଁ ବସ୍ ମାଲିକ ସଂଘ। ଏ ସମ୍ପର୍କରେ ସଂଘ ପକ୍ଷରୁ ପ୍ରଶାସନକୁ ଅବଗତ କରାଯାଇଛି ା
ବସ୍ ମାଲିକ ସଂଘର କହିବା କଥା, ପୁରୁଣା ବସଷ୍ଟାଣ୍ଡ୍ ଉନ୍ନତୀକରଣ କାମ ଶେଷ ହେବା ପର୍ଯ୍ୟନ୍ତ ବସ୍ଗୁଡିକ ଜିଲା ଆଞ୍ଚଳିକ ପରିବହନ କାର୍ଯ୍ୟାଳୟ ସମ୍ମୁଖ ଓଏସ୍ଆରଟିସିର ପୁରୁଣା ବସ୍ ଗ୍ୟାରେଜ କିମ୍ବା ତହସିଲ କାର୍ଯ୍ୟାଳୟ ସମ୍ମୁଖ ସରକାରୀ ପଡ଼ିଆରେ ରହଣି କରିବାରେ କୌଣସି ଅସୁବିଧା ନାହିଁ। କିନ୍ତୁ ମହିଷାପାଟସ୍ଥିତ ପ୍ରସ୍ତାବିତ ନୂତନ ବସ୍ଷ୍ଟାଣ୍ଡକୁ ବସ୍ ଗଲେ ଯାତ୍ରୀମାନେ ସମସ୍ୟାରେ ପଡ଼ିବେ। ଜନଗହଳି ରାସ୍ତା ହୋଇଥିବାରୁ ଟ୍ରାଫିକ୍ ସମସ୍ୟା ଜଟିଳ ହେବ। ସହରଠାରୁ ଦୂର ହୋଇଥିବାରୁ ଯାତ୍ରୀଙ୍କୁ ଅଧିକ ଖର୍ଚ୍ଚାନ୍ତ ହୋଇ ଅଟୋରିକ୍ସା କରି ଯିବାକୁ ପଡ଼ିବ। ତେଣୁ ଓଏସ୍ଆର୍ଟିସିର ପୁରୁଣା ବସ ଗ୍ୟାରେଜ୍ କିମ୍ବା ତହସିଲ କାର୍ଯ୍ୟାଳୟ ସମ୍ମୁଖ ପଡ଼ିଆରେ ସାମୟିକ ଭାବେ ବସ୍ ରହଣି ନିମନ୍ତେ ବ୍ୟବସ୍ଥା କରିବାକୁ ସଂଘ ସଭାପତି ପ୍ରଭାକର ବେହେରା, ଯୁଗ୍ମ ସମ୍ପାଦକ ରୁଦ୍ରନାରାୟଣ ତ୍ରିପାଠୀ, ଆଇନ ଉପଦେଷ୍ଟା ପ୍ରଦୀପ୍ତ ନାଥ, ପ୍ରକାଶ ଦାସ ପ୍ରମୁଖ ପ୍ରଶାସନ ସହ ଆଲୋଚନା କରିଛନ୍ତି।
ସୂଚନାଯୋଗ୍ୟ, ଢେଙ୍କାନାଳ ବସ୍ଷ୍ଟାଣ୍ଡ ଦେଇ ୧୪୦ ଛୋଟବଡ଼ ଗାଡ଼ି ଚାଲୁଥିବାବେଳେ ଏବେ ଏହା ୧୦୦କୁ ଖସିଆସିଛି। ତନ୍ମଧ୍ୟରୁ ୬୦ଟି ବସ୍ ଢେଙ୍କାନାଳ ଦେଇ କଟକ, ଅନୁଗୋଳ, ତାଳଚେରକୁ ଚଳାଚଳ କରୁଛି। ସେହିପରି ଆନ୍ତଃ ଜିଲା ଯାତ୍ରୀ ପରିବହନରେ ୪୦ ବସ୍ ନିୟୋଜିତ ଅଛି।