ଭବାନୀପାଟଣା,୩।୧(ସ୍ବ.ପ୍ର): କଳାହାଣ୍ଡି ଜିଲା କେସିଙ୍ଗା ଥାନା ଅଧୀନ ୨୬ ନମ୍ବର ଜାତୀୟ ରାଜପଥ ଚାଞ୍ଚେର ନିକଟରେ ସୋମବାର ବିଳମ୍ବିତ ରାତିରେ ଏକ ବସ୍-କାର ମଧ୍ୟରେ ମୁହାଁମୁହିଁ ଧକ୍କା ହୋଇଛି। ଦୁର୍ଘଟଣାରେ କାରରେ ବସିଥିବା ୨ଜଣ ଯୁବକଙ୍କ ମୃତ୍ୟୁ ଘଟିଛି। ସେମାନେ ହେଲେ ଭବାନୀପାଟଣା ଇରିଗେଶନ କଲୋନୀର ଦିନେଶ କୁମାର ନାୟକ ଏବଂ ଦିଲୀପ କୁମାର ଗୋଚ୍ଛାୟତ ବୋଲି ଜଣାପଡିଛି। କେସିଙ୍ଗା ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି।
ମିଳିଥିବା ସୂଚନା ଅନୁଯାୟୀ, ଦିନେଶ ଓ ଦିଲୀପ କାରରେ ନୃସିଂହନାଥରୁ ଫେରୁଥିବା ବେଳେ ଚାଞ୍ଚେର ନିକଟରେ
ଭୁବନେଶ୍ୱର ଅଭିମୁଖେ ଯାଉଥିବା ଏକ ଘରୋଇ ବସ୍ ଦିଲଖୁସ ସହିତ ଧକ୍କା ହୋଇଥିଲା। ଅନ୍ୟପକ୍ଷେ ଦୁର୍ଘଟଣାରେ ୨ଜଣ ମହିଳା ଆହତ ହୋଇ ଭବାନୀପାଟଣା ହସ୍ପିଟାଲରେ ଭର୍ତ୍ତି ହୋଇଛନ୍ତି।