ସୋରଡ଼ା,୨୩ା୯(ଡି.ଏନ୍.ଏ.): ଗଞ୍ଜାମ ଜିଲା ସୋରଡ଼ା ନିକଟ କୁଲାଙ୍ଗୀ- କାଳିଆଘୋଡ଼ା ମଧ୍ୟରେ ଗୁରୁବାର ଏକ ବସ୍ ଓଲଟି ପଡ଼ିବାରୁ ୪୭ ଜଣ ଚାଷୀ ଆହତ ହୋଇଛନ୍ତି। ସେମାନଙ୍କ ମଧ୍ୟରେ ୭ଜଣ ଗୁରୁତର ଥିବା ଜଣାପଡିଛି। ଆହତଙ୍କୁ ଆମ୍ବୁଲାନ୍ସ ଯୋଗେ ସୋରଡ଼ା ଓ ଭଞ୍ଜନଗର ମେଡିକାଲକୁ ପଠାଯାଇଛି।
ଭଞ୍ଜନଗର କୃଷି ବିଜ୍ଞାନ କେନ୍ଦ୍ରରେ ଜୈବିକ ପଦ୍ଧତିରେ ଧାନ, ମାଣ୍ଡିଆ, ମକା ଓ କାନ୍ଦୁଲ ଚାଷ ସମ୍ପର୍କରେ ତାଲିମ ଦିଆଯିବାକୁ ସ୍ଥିର ହୋଇଥିଲା। ତେଣୁ ଗୌଡ଼ଗୋଠ ଗ୍ରାମରୁ ଚାଷୀମାନେ ଭଞ୍ଜନଗର ଅଭିମୁଖେ ବାହାରିଥିଲେ। ସରକାରଙ୍କ ପକ୍ଷରୁ ପ୍ରୋଗ୍ରେସ ଏନ୍ଜିଓ ସେମାନଙ୍କୁ ବସ୍ ଯୋଗେ ନେଉଥିଲେ। ସୋରଡ଼ା ନିକଟ କୁଲାଙ୍ଗୀ – କାଳିଆଘୋଡ଼ା ନିକଟରେ ବସ୍ ଆଗକୁ ଏକ ବାଇକ୍ ଆସିଯାଇଥିଲା। ବାଇକ୍ ଚାଳକଙ୍କୁ ବଞ୍ଚାଇବାକୁ ଯାଇ ବସ୍ ଭାରସାମ୍ୟ ହରାଇ ରାସ୍ତାରେ ଓଲଟି ପଡ଼ିଥିଲା। ଫଳରେ ଚାଷୀମାନେ ଆହତ ହୋଇଥିଲେ। ସ୍ଥାନୀୟ ଲୋକଙ୍କ ସହାୟତାରେ ସମସ୍ତଙ୍କୁ ଉଦ୍ଧାର କରାଯାଇ ମେଡିକାଲକୁ ପଠାଯାଇଛି।