ଭୁବନେଶ୍ୱର, ୯।୨(ବ୍ୟୁରୋ): ରାଜ୍ୟ ସରକାର ପୁଣି ବସ୍ ଭଡ଼ା ବଢ଼ାଇଛନ୍ତି। ଏ ନେଇ ସୋମବାର ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ କରାଯାଇଛି। ଲଗାତର ଡିଜେଲ ଦର ବୃଦ୍ଧି ସାଙ୍ଗକୁ ଅନ୍ୟାନ୍ୟ ଆନୁଷଙ୍ଗିକ ଦର ବୃଦ୍ଧିକୁ ନେଇ ୧୨ଟି ପାରାମିଟର ଆଧାରରେ ବସ୍ ଭଡ଼ା ବୃଦ୍ଧି କରାଯାଇଛି। ଏହାକୁ ମିଶାଇ ମାସକ ଭିତରେ ବସ୍ ଭଡ଼ା ୨ ଥର ବୃଦ୍ଧି ହେଲାଣି। ପ୍ରକାଶିତ ବିଜ୍ଞପ୍ତି ଅନୁଯାୟୀ ସାଧାରଣ ବସ୍ ଓ ଏକ୍ସପ୍ରେସ୍ ବସ୍ କିଲୋମିଟର ପିଛା ଯଥାକ୍ରମେ ୬ ଓ ୭ ପଇସା ବୃଦ୍ଧି କରାଯାଇଥିବା ବେଳେ ଡିଲକ୍ସ ଏବଂ ଏସି ଡିଲକ୍ସ ୨ ଓ ୮ ପଇସା ବୃଦ୍ଧି ହୋଇଛି। ତେବେ ବିଳାସପୂର୍ଣ୍ଣ ସୁପର ପ୍ରିମିୟମ(ଭଲ୍ଭୋ/ସ୍କନିଆ ଇତ୍ୟାଦି) ବସ୍ ପାଇଁ ପ୍ରଥମ ଥର ଲାଗି କିଲୋମିଟର ପିଛା ୨ଟଙ୍କା ୧୭ ପଇସା ଧାର୍ଯ୍ୟ କରାଯାଇଛି।
ଭଡ଼ା ବୃଦ୍ଧି ପରେ ଯାତ୍ରୀମାନଙ୍କୁ ସାଧାରଣ ବସ୍ ପାଇଁ କିଲୋମିଟର ପିଛା ୭୪ ପଇସାରୁ ୮୦ ପଇସା ଏବଂ ଏକ୍ସପ୍ରେସ୍ ବସ୍ ପାଇଁ ୭୭ ପଇସା ଜାଗାରେ ୮୪ ପଇସା ଅଧିକ ଭଡ଼ା ଦେବାକୁ ପଡ଼ିବ। ସେହିପରି ଡିଲକ୍ସ ବସ୍ ପାଇଁ କିଲୋମିଟର ପିଛା ୧ଟଙ୍କା ୯ ପଇସାରୁ ୧ ଟଙ୍କା ୧୧ ପଇସା ଓ ଏସି ଡିଲକ୍ସ ବସ୍ ପାଇଁ ୧ ଟଙ୍କା ୩୧ ପଇସାରୁ ୧ ଟଙ୍କା ୩୯ ପଇସା ଦେବାକୁ ହେବ। ସେହିପରି ସୁପର ପ୍ରିମିୟମ ବସ୍ ଲାଗି କିଲୋମିଟର ପିଛା ୨ ଟଙ୍କା ୧୭ ପଇସା କିମ୍ବା ସର୍ବନିମ୍ନ ୧୩ ଟଙ୍କା ଦେବାକୁ ହେବ।
ଏଠାରେ ସୂଚନାଯୋଗ୍ୟ ଯେ ଡିଜେଲ ଦର ଲଗାତର ବୃଦ୍ଧି ଯୋଗୁ ୨୦୨୦ ଜାନୁୟାରୀ ୨୦ରେ ବସ୍ ଭଡ଼ା କିଲୋମିଟର ପିଛା ୧ ଓ ୨ ପଇସା ବୃଦ୍ଧି ପାଇଥିଲା। କରୋନା ମହାମାରୀ ଯୋଗୁ ଆର୍ଥିକ ଅବସ୍ଥା ଭଲ ନ ଥିବା ବେଳେ ବାରମ୍ବାର ବସ୍ ଭଡ଼ା ବୃଦ୍ଧି ଯାତ୍ରୀମାନଙ୍କ ଉପରେ ବୋଝ ଉପରେ ନଳିତା ବିଡ଼ା ହୋଇଛି।