ଜମନକିରା,୧ା୭:(ରବୀନ୍ଦ୍ର ପ୍ରସାଦ ଦାନୀ): ଜମନକିରା ଥାନା ଜାତୀୟ ରାଜପଥ ୫୩ନଂ. ବାଇପାସ୍ ରାସ୍ତାରେ ବାରମ୍ବାର ଦୁର୍ଘଟଣା ଘଟୁଛି। ବିଭାଗ ପକ୍ଷରୁ କରାଯାଇଥିବା ନୂତନ ରାସ୍ତାର ଭିତ୍ତିପ୍ରସ୍ତର ଠିକ୍ ନଥିବା ଯୋଗୁ ଏଭଳି ଅସୁବିଧା ହେଉଥିବା ନେଇ ବିଶେଷଜ୍ଞମାନେ ପ୍ରକାଶ କରୁଛନ୍ତି। ଏଭଳି ଦୁଇଟି ଘଟଣା ୨ଦିନ ଅନ୍ତରରେ ଘଟିଯାଇଛି। ଗତ ୨୯ ତାରିଖରେ ସିରିଜ ଟ୍ରକ୍ ଦୁର୍ଘଟଣାରେ ଜଣେ ଚାଳକଙ୍କ ମୃତ୍ୟୁ ହୋଇଥିବା ବେଳେ ଶୁକ୍ରବାର ବିଳମ୍ବିତ ରାତିରେ କେନ୍ଦୁଝରରୁ ବଲାଙ୍ଗୀରକୁ ଯାଉଥିବା ଓଏସ୍ଆର୍ଟିସି ବସ୍ (ଓଡି ୦୯ ୟୁ ୬୫୨୪) ଜମନକିରା ରାଜରାସ୍ତା ବାଇପାସ ରାସ୍ତାରେ ଛିଡ଼ା ହୋଇଥିବା ଏକ ଟ୍ରକ (ଓଡି ୦୯ କ୍ୟୁ ୪୧୯୮)କୁ ପଛରେ ବାଡ଼େଇ ହୋଇଥିଲା। ଫଳରେ ଦୁଇଜଣ ଚାଳକ ବିମ୍ବାଧର ମହନ୍ତ (୪୨), ଅନ୍ୟ ଚାଳକ ତ୍ରିଲୋଚନ ମହାନ୍ତ (୪୫) ଗୁରୁତର ଆହତ ହୋଇଛନ୍ତି। ଅନ୍ୟ ଜଣେ କର୍ମଚାରୀ ଆହତ ହୋଇଛନ୍ତି। ଉଭୟ ଚାଳକଙ୍କୁ ବୁର୍ଲା ବଡ଼ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିବା ବେଳେ ଆହତଙ୍କୁ ଆମ୍ବୁଲାନ୍ସ ଯୋଗେ କୁଚିଣ୍ଡା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି। ତେବେ ବସରେ ଥିବା ପ୍ରାୟ ୧୩/୧୪ଜଣ ଯାତ୍ରୀ ସୁରକ୍ଷିତ ଥିବା ନେଇ ପୋଲିସ ଅଧିକାରୀ ସୁଧାଂଶୁ ଶେଖର ପାତ୍ର ପ୍ରକାଶ କରିଛନ୍ତି। ଏ ନେଇ ଜମନକିରା ଥାନାରେ ଏକ ଦୁର୍ଘଟଣା ମାମଲା ରୁଜୁ କରାଯାଇଛି। ତେବେ ଏହି ନୂତନ ରାସ୍ତାରେ ବାରମ୍ବାର ଦୁର୍ଘଟଣାକୁ ରୋକିବା ଲାଗି ଏନ୍ଏଚ୍ଏଆଇ କର୍ତ୍ତୃପକ୍ଷ ଦୃଷ୍ଟି ଦେବାପାଇଁ ସାଧାରଣରେ ଦାବି ହେଉଛି।
ଏ ସଂକ୍ରାନ୍ତରେ ଏନ୍ଏଚ୍ଏଆଇ ପିଡି କେ.ଏନ. ରାଓଙ୍କୁ ଯୋଗାଯୋଗ କରି ପଚାରିବାରୁ ସେ ଏଥିପ୍ରତି ଦୃଷ୍ଟି ଦେବେ ବୋଲି କହିଥିଲେ।