ବୈଶିଙ୍ଗା,୨୩ା୫(ରତନ ଦାଶ): ମୟୂରଭଞ୍ଜ ଜିଲା ବୈଶିଙ୍ଗା ବଜାର ଅଞ୍ଚଳରେ ବସ୍ ଟର୍ମିନାଲ ପାଇଁ ଜମି ଚିହ୍ନଟ ହୋଇଛି। ମାତ୍ର ଅଧିଗ୍ରହଣ ନ ହେବାରୁ ଜବରଦଖଲକାରୀମାନେ ଉକ୍ତ ସ୍ଥାନରେ ପକ୍କା ଘରମାନ ନିର୍ମାଣ ଆରମ୍ଭ କରିସାରିଲେଣି। ଜବରଦଖଲକାରୀମାନେ ଏହି ଜମିକୁ ବାହାର ଜିଲାର ସଂଖ୍ୟାଲଘୁ ବ୍ୟକ୍ତି ବିଶେଷଙ୍କୁ ଲକ୍ଷ ଲକ୍ଷ ଟଙ୍କାରେ ବିକ୍ରି କରୁଥିବା ସ୍ଥାନୀୟ ଅଞ୍ଚଳବାସୀ ଅଭିଯୋଗ କରିଛନ୍ତି।
ସୂଚନା ଅନୁଯାୟୀ, ୨୦ ବର୍ଷ ପୂର୍ବେ ତତ୍କାଳୀନ ବୈଶିଙ୍ଗା ନିର୍ବାଚନ ମଣ୍ଡଳୀର ବିଧାୟିକା ପ୍ରମିଳା ଗିରିଙ୍କ ପ୍ରଚେଷ୍ଟାରେ ବୈଶିଙ୍ଗା ଗ୍ରାମପଞ୍ଚାୟତ କାର୍ଯ୍ୟାଳୟ ସଂଲଗ୍ନ ଗ୍ରାମ୍ୟ ଜଙ୍ଗଲ କିସମ ଜମି ମଧ୍ୟରୁ ୨ ଏକର ପଞ୍ଚତିରିଶ ଡେସିମିଲି ଜମି ବୈଶିଙ୍ଗା ବସଷ୍ଟାଣ୍ଡ ପାଇଁ ସଂରକ୍ଷିତ କରାଯାଇଥିଲା। ତତ୍କାଳୀନ ବିଧାନସଭା ଗୃହ କମିଟିର ଚେୟାରମ୍ୟାନ ତଥା ବିଧାୟକ ରମେଶ ଚନ୍ଦ୍ର ଚ୍ୟାଉପଟ୍ଟନାୟକ ଏବଂ କମିଟିର ସଦସ୍ୟମାନେ ବୈଶିଙ୍ଗାଠାରେ ଏକ ବସ ଟର୍ମିନାଲର ଆବଶ୍ୟକତାକୁ ଉପଲବ୍ଧି କରି ବେତନଟୀ ତହସିଲଦାରଙ୍କୁ ଜମି ଚିହ୍ନଟ ପାଇଁ ନିର୍ଦ୍ଦେଶ ଦେଇଥିଲେ। ତଦନୁସାରେ ସରକାରୀ କାଗଜପତ୍ରରେ ବସ୍ଷ୍ଟାଣ୍ଡ ପାଇଁ ଏହି ଜମି ସଂରକ୍ଷିତ ହୋଇଥିଲା। ୨୦୦୯ ନିର୍ବାଚନ ପୂର୍ବରୁ ନିର୍ବାଚନମଣ୍ଡଳୀ ପୁନର୍ଗଠନ ଫଳରେ ବୈଶିଙ୍ଗା ନିର୍ବାଚନ ମଣ୍ଡଳୀର ନାମ ପରିବର୍ତ୍ତନ କରାଯାଇ ବଡସାହି ଆସନ ନାମକରଣ ହେଲା। ତେବେ ରାଜନୈତିକ ଇଚ୍ଛାଶକ୍ତିର ଅଭାବ ଏବଂ ପ୍ରଶାସନର ଅପାରଗତା ଯୋଗୁ ଅଦ୍ୟାବଧି ଟର୍ମିନାଲ ନିର୍ମାଣ ହୋଇ ପାରୁନାହିଁ। ଫଳରେ ଯାତ୍ରୀମାନଙ୍କୁ ହଇରାଣ ହରକତ ହେବାକୁ ପଡୁଛି।
ଅନ୍ୟପକ୍ଷରେ ହାଇକୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ ପୂର୍ବ ତହସିଲଦାର ଜବରଦଖଲକାରୀଙ୍କୁ ହଟାଇବାରେ ପଦକ୍ଷେପ ନେଇ ନ ଥିଲେ। ବର୍ତ୍ତମାନର ତହସିଲଦାରଙ୍କୁ ଏ ବିଷୟରେ ବାରମ୍ବାର ଅବଗତ କରାଯାଇଥିଲେ ମଧ୍ୟ ନାନାଦି ଆଳ ଦେଖାଇ ସେ କାଳକ୍ଷେପଣ ନୀତି ଅବଲମ୍ବନ କରୁଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ରାଜସ୍ବ ବିଭାଗରେ କାର୍ଯ୍ୟରତ ତହସିଲଦାର, ସୁପରଭାଇଜର ଓ ସ୍ଥାନୀୟ ଆର୍ଆଇ ଏଥିପ୍ରତି ଆଖି ବନ୍ଦ କରି ବସି ରହିଥିବା ନେଇ ପ୍ରଶବାଚୀ ସୃଷ୍ଟି ହୋଇଛି। ଜବର ଦଖଲକାରୀମାନେ ସରକାରୀ ଜମିରେ ଘରଦ୍ୱାର କରି ରହିଯିବା ଦ୍ୱାରା ଭବିଷ୍ୟତରେ ବସଷ୍ଟାଣ୍ତ ନିର୍ମାଣରେ ବାଧା ସୃଷ୍ଟି ହୋଇପାରେ ବୋଲି ବୁଦ୍ଧିଜୀବୀ ମହଲରେ ଆଶଙ୍କା ଦେଖା ଦେଇଛି। ତୁରନ୍ତ ଏହି ଜବରଦଖଲକାରୀଙ୍କୁ ସରକାରୀ ଜମିରୁ ଉଚ୍ଛେଦ କରି ବସ୍ଷ୍ଟାଣ୍ଡ ନିିର୍ମାଣ ଲାଗି ପଦକ୍ଷେପ ଗ୍ରହଣ କରିବାକୁ ଦାବି ହେଉଛି। ଏ ସମ୍ପର୍କରେ ସ୍ଥାନୀୟ ତହସିଲଦାର ସୁରଥ ଚନ୍ଦ୍ର ରାଉତଙ୍କୁ ପଚାରିବାରୁ ପୂର୍ବ ତହସିଲଦାର ଏନେଇ ପଦକ୍ଷେପ ଗ୍ରହଣ କରି ନାହାନ୍ତି। ନିର୍ବାଚନ ପରେ ଏ ବିଷୟରେ ତଦନ୍ତ କରି ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି କହିଛନ୍ତି।