ମୁମ୍ବାଇ,୯।୧: ସାରା ଦେଶରେ କୋଭିଡ୍ ସଂକ୍ରମଣର ସଂଖ୍ୟା ବୃଦ୍ଧି ଯୋଗୁ ବିଭିନ୍ନ ରାଜ୍ୟ ସରକାରଙ୍କ ପକ୍ଷରୁ ବହୁ କଟକଣା ଜାରି କରାଯାଉଛି। କୋଭିଡ୍ ମାମଲା ବୃଦ୍ଧି ବ୍ୟବସାୟ ତଥା ଅର୍ଥନୈତିକ କାର୍ଯ୍ୟକଳାପ ଉପରେ ବେଶ୍ ପ୍ରତିକୂଳ ପ୍ରଭାବ ପକାଉଛି ବୋଲି ଶନିବାର କନ୍ଫେଡେରେଶନ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (ସିଏଆଇଟି) ପକ୍ଷରୁ ଏକ ରିର୍ପୋଟ ପ୍ରକାଶ କରାଯାଇଛି। ସିଏଆଇଟିର ସୂଚନା ଅନୁଯାୟୀ ଗତ ୧୦ଦିନ ମଧ୍ୟରେ ଏହାର ପ୍ରଭାବ ଯୋଗୁ ବ୍ୟବସାୟ ହାରାହାରି ୪୫% ହ୍ରାସ ପାଇବା ସହ ବିଭିନ୍ନ ଭର୍ଟିକାଲ ସାମଗ୍ରୀ କାରବାରକୁ ମଧ୍ୟ ହ୍ରାସ କରିଛି। କୋଭିଡ୍ର ନୂଆ ଭାରିଆଣ୍ଟ ଓମିକ୍ରନ୍ ସହ ୩ୟ ଲହରକୁ ମୁକାବିଲା କରିବା ପାଇଁ ସମସ୍ତ ସମ୍ଭାବ୍ୟ ପଦକ୍ଷେପ ଗ୍ରହଣ କରିବାକୁ କେନ୍ଦ୍ର ସରକାରଙ୍କ ପକ୍ଷରୁ ମୁଖ୍ୟମନ୍ତ୍ରୀମାନଙ୍କୁ ସୂଚନା ଦିଆଯାଇଛି। ସେହିଭଳି ରାଜ୍ୟ ସରକାର ମଧ୍ୟ ସେମାନଙ୍କ ସ୍ତରରେ ଆବଶ୍ୟକ ପ୍ରତିକୂଳ ପଦକ୍ଷେପ ନେବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଏହା ବ୍ୟତୀତ ସ୍ଥାନୀୟ ଗ୍ରାହକମାନଙ୍କ ଭାବନାକୁ ଲକ୍ଷ୍ୟକରି ନିମ୍ନ ଆନ୍ତଃ ଆଞ୍ଚଳିକ ବାଣିଜ୍ୟ ଉପରେ ମଧ୍ୟ ପ୍ରତିବନ୍ଧକ ଲାଗୁ କରାଯାଇଛି ବୋଲି ସିଏଆଇଟି ମତବ୍ୟକ୍ତ କରିଛି। ଏହାର ମୁଖ୍ୟ କାରଣ ହେଉଛି କରୋନାର ତୃତୀୟ ଲହର ଯୋଗୁ ଲୋକଙ୍କ ମଧ୍ୟରେ ଏକ ପ୍ରକାର ଭୟର ବାତାବରଣ ସହ ଗତବର୍ଷର ଭୟ ଏବେ ବି ରହିଛି। ଏଥିରେ କୁହାଯାଇଛି, ପଡ଼ୋଶୀ ସହରରୁ ବିତରଣ କେନ୍ଦ୍ରକୁ ଆସିବାକୁ ବ୍ୟବସାୟୀଙ୍କ ଅନିଚ୍ଛାକୃତ ମନୋଭାବ, ଟଙ୍କା କ୍ରଞ୍ଚ, ବିପୁଳ ପରିମାଣର ଟଙ୍କା ଯୋଗଣ ଆଦିରେ ସମସ୍ୟା ରହିଛି। ସ୍ଥାନୀୟ ପ୍ରଶାସନ ଓ ରାଜ୍ୟ ସରକାରଙ୍କ ପକ୍ଷରୁ ବ୍ୟବସାୟୀଙ୍କ ସହ ଆଲୋଚନ କିମ୍ବା ବଜାର ବିଶେଷଜ୍ଞଙ୍କ ସହ ପରାମର୍ଶ ନ କରି ସରକାର ବିଭିନ୍ନ କୋଭିଡ୍ ପ୍ରତିବନ୍ଧକ ଲାଗୁ କରିଛନ୍ତି। ବିଶେଷକରି ଚଳିତ ବିବାହଋତୁରେ ଏଭଳି ସମସ୍ୟା ଓ ସରକାରଙ୍କ କଟକଣା ଯୋଗୁ ବ୍ୟବସାୟ ହ୍ରାସ ହେବାର ସମ୍ଭାବନା ରହିଛି ବୋଲି ସିଏଆଇଟି ମଧ୍ୟ ଆକଳନ କରିଛି। କନ୍ଫେଡେରେଶନର କହିବା ଅନୁସାରେ ବିବାହଋତୁୁରେ ଅନେକ ପ୍ରକାର କାରବାର ବ୍ୟବସାୟୀଙ୍କୁ ଭଲ ଲାଭ ଦେଇଥାଏ। ଏହା ଜାନୁୟାରୀ ୧୪ରୁ ଆରମ୍ଭ ହୋଇ ଆସନ୍ତା ୩ ମାସ ପର୍ଯ୍ୟନ୍ତ ଚାଲିଥାଏ। ସେହିଭଳି ରାଜ୍ୟ ସରକାରମାନଙ୍କ ପକ୍ଷରୁ ଲଗାଯାଇଥିବା ବିଭିନ୍ନ ପ୍ରତିବନ୍ଧକ ଓ କୋଭିଡ୍ କଟକଣା ଯୋଗୁ ପ୍ରାୟ ୭୫% ବ୍ୟବସାୟରେ ଅନେକ ପ୍ରକାର ପରିବର୍ତ୍ତନ ସହ ହ୍ରାସ ମଧ୍ୟ ଘଟିଛି ବୋଲି ସଂସ୍ଥା ପକ୍ଷରୁ ବର୍ତ୍ତମାନ ଆକଳନ କରାଯାଇଛି।