କଟକ ଅଫିସ, ୨୮। ୩: କଟକରେ କରୋନା ଆକ୍ରାନ୍ତ ଚିହ୍ନଟ ହେବା ପରେ ପ୍ରଶାସନ ପକ୍ଷରୁ ହୋଲି ପାଳନ ଉପରେ କଟକଣା ଜାରି କରାଯାଇଛି। ଏକାସଙ୍ଗରେ ବହୁସଂଖ୍ୟକ ଲୋକଙ୍କୁ ହୋଲି ଖେଳିବାକୁ ବାରଣ କରାଯାଇଛି। ଲୋକମାନେ ବାହାରକୁ ନ ଆସି ଘରେ ରହି ହୋଲି ଖେଳିବେ। ଏଥିପାଇଁ ହୋଲିର ୧୫ ଦିନ ପୂର୍ବରୁ କଟକ ଦୋଳମୁଣ୍ତାଇ, ଚୌଧୁରୀବଜାର, ବାଙ୍କାବଜାର, ବାଲୁବଜାର, କଲେଜ ଛକ ଆଦି ସ୍ଥାନରେ ରଙ୍ଗଦୋକାନ ଖୋଲିଛି। ସେଠାରେ ହର୍ବଲ ଅଭିର, ସେଣ୍ଟେଡ ଅଭିର, ପାଉଡର ଅଭିର ସହ ବିଭିନ୍ନ ପ୍ରକାର ରଙ୍ଗ ରହିଛି। ଏହାର ମୂଲ୍ୟ କିଲୋ ପିଛା ୮ରୁ ଆରମ୍ଭ କରି ୨୦୦ ଟଙ୍କା ପର୍ଯ୍ୟନ୍ତ ରହିଛି। ସେହିପରି ପିଲାଙ୍କ ପାଇଁ ଡୋରେମନ, ମୋଟୁ ପତ୍ଲୁ, ବେନେଟନ, ଛୋଟାଭୀମ, ବରବି, ବନ୍ଧୁକ ଭଳି ଅନେକ ପ୍ରକାରର ପିଚକାରି ଅଛି, ଯାହାର ମୂଲ୍ୟ ୨୦ରୁ ଆରମ୍ଭ କରି ୧୫୦୦ ଟଙ୍କା ପର୍ଯ୍ୟନ୍ତ ରହିଛି। ଏହାସହ ରଙ୍ଗବେରଙ୍ଗର ଚୁଟି, ବଡ ଚଷମା, ବିଭନ୍ନ ପ୍ରକାରର ମୁଖା ରହିଛି। ଏହାର ମୂଲ୍ୟ ୫୦ରୁ ୫୦୦ ଟଙ୍କା ପର୍ଯ୍ୟନ୍ତ ରହିଛି। ବ୍ୟବସାୟୀମାନେ ରାୟପୁର, ନୂଆଦିଲ୍ଲୀ, ବମ୍ବେ ଓ କୋଲକାତାରୁ ରଙ୍ଗ ଆଣି ବିକ୍ରି କରିଥାନ୍ତି। ମାତ୍ର ଚାଇନାରୁ ରଙ୍ଗ ଆସୁଥିବା ଭୟରେ ରଙ୍ଗ କିଣିବାକୁ ଲୋକମାନେ ଆଗ୍ରହ ପ୍ରକାଶ କରୁନାହାନ୍ତି। ଅନ୍ୟପକ୍ଷରେ କରୋନା ଯୋଗୁ ପ୍ରତିବର୍ଷ ଭଳି ଚଳିତବର୍ଷ ରଙ୍ଗଦୋକାନରେ ସେତେଟା ଭିଡ ନ ଥିବାରୁ ବ୍ୟବସାୟ ମାନ୍ଦା ହୋଇଛି। ଏ ସମ୍ପର୍କରେ ବ୍ୟବସାୟୀ ପ୍ରଦୀପ କୁମାର ନନ୍ଦୀ କହିଛନ୍ତି, ପ୍ରାୟ ୪୦ ବର୍ଷ ହେବ ଦୋକାନ କରିଛି। କିନ୍ତୁ ଏଭଳି ପରିସ୍ଥିତି କେବେ ଦେଖିନାହିଁ। ହୋଲିକୁ ଆଉ ମାତ୍ର ଗୋଟିଏ ଦିନ ରହିଛି। ବର୍ତ୍ତମାନ ପର୍ଯ୍ୟନ୍ତ ୩୦ ପ୍ରତିଶତ ବ୍ୟବସାୟ ହୋଇନାହିଁ।