ବ୍ରହ୍ମପୁର ଅଫିସ,୨୪।୨: ବ୍ରହ୍ମପୁର ସହରର ପ୍ରମୁଖ ଓ ପୁରାତନ ବ୍ୟବସାୟିକ କେନ୍ଦ୍ରସ୍ଥଳ ହେଉଛି ଗିରି ମାର୍କେଟ। ଏହି ମାର୍କେଟ ଉପରେ ବ୍ରହ୍ମପୁର ସମେତ ଗଞ୍ଜାମ ଜିଲାର ବିଭିନ୍ନ ବ୍ୟବସାୟୀ ନିର୍ଭରଶୀଳ। ମାର୍କେଟ କୋଠାଟି ବର୍ତ୍ତମାନ ବିପଦସଙ୍କୁଳ ଅବସ୍ଥାରେ ରହିଛି। ଏଥିରେ ଫାଟ ସୃଷ୍ଟି ହେବା ସାଙ୍ଗକୁ ବହୁ ସ୍ଥାନରେ ଗଛଲତା ଉଠିଥିବା ଦେଖିବାକୁ ମିଳିଛି। କେତେକ ସ୍ଥାନରେ ପଲସ୍ତରା ମଧ୍ୟ ଖସୁଥିବା ନଜିର ରହିଛି। ଏହି କୋଠା ତଳେ ୧୦୦ରୁ ଉର୍ଦ୍ଧ୍ୱ ବ୍ୟବସାୟୀ ବ୍ୟବସାୟ କରୁଥିବା ବେଳେ ସେମାନଙ୍କ ମଧ୍ୟରୁ ଅଧିକାଂଶ ହୋଲସେଲ ବ୍ୟବସାୟୀ। ବିପଦସଙ୍କୁଳ ଏହି କୋଠା ଉଭୟ ବ୍ୟବସାୟୀ ଓ ଗ୍ରାହକଙ୍କ ପାଇଁ ଅସୁରକ୍ଷିତ ହୋଇଛି।
ବ୍ରହ୍ମପୁର ମହାନଗର ନିଗମ (ବିଏମସି) ବିପଦସଙ୍କୁଳ କୋଠା ଖାଲି କରିବା ପାଇଁ ଗତ ଜାନୁୟାରୀ ୨୧ ତାରିଖରେ ନୋଟିସ ଜାରି କରିଛି। କିନ୍ତୁ ବ୍ୟବସାୟୀମାନେ ଏହି ନୋଟିସକୁ ଖାତିର କରୁ ନଥିବା ଭଳି ମନେ ହେଉଛି। ବ୍ୟବସାୟୀମାନେ ଏବେ ବି ବିନା ଭୟରେ ବ୍ୟବସାୟ କରୁଛନ୍ତି। ଅନ୍ୟପଟେ ବିଏମସି ପକ୍ଷରୁ ଏହି କୋଠାଟିକୁ ସଂପୂର୍ଣ୍ଣ ଭଙ୍ଗା ଯାଇ ନୂତନ କୋଠା ନିର୍ମାଣ ପାଇଁ ଯୋଜନା ରହିଛି। ତେବେ ବ୍ୟବସାୟୀଙ୍କୁ ଥଇଥାନ ପରେ ନୂଆ ନିର୍ମାଣ ଯୋଜନା ଆରମ୍ଭ ହେବ ବୋଲି ବିଏମସି କାର୍ଯ୍ୟାଳୟ ସୂତ୍ରରୁ ଜଣାପଡିଛି।
ସୂଚନାଯୋଗ୍ୟ, ୧୯୭୪ ମେ ୨୪ ତାରିଖରେ ଗିରି ମାର୍କେଟ ପ୍ରତିଷ୍ଠା ହୋଇଥିଲା। ତତ୍କାଳୀନ ରାଷ୍ଟ୍ରପତି ଭି.ଭି.ଗିରି ଏହି ବଜାରକୁ ଉଦ୍ଘାଟନ କରିଥିଲେ। ଭିି.ଭି. ଗିରିଙ୍କ ନାମରେ ଏହି ବଜାରର ନାମକରଣ କରାଯାଇଛି। କୋଠାରେ ୧୫୦ଟି ଦୋକାନ ଗୃହ ରହିଛି। ଏଠାରେ ହୋଲସେଲ ପୋଷାକ ଠାରୁ ଆରମ୍ଭ କରି ଇଲେକ୍ଟ୍ରୋନିକ୍ସ ସରଞ୍ଜାମ ଓ ଘରୋଇ ସାମଗ୍ରୀ ବିକ୍ରି ହୋଇଥାଏ। କୋଠା ଅସୁରକ୍ଷିତ ଥିବା କାରଣରୁ ବିଏମସି ନୋଟିସ ଜାରି କରିବା ପରେ ବହୁ ବ୍ୟବସାୟୀ ଅସନ୍ତୋଷ ପ୍ରକାଶ କରିଛନ୍ତି। ସେମାନଙ୍କ କହିବାନୁଯାୟୀ, ବିଏମସିକୁ ଦୋକାନ ଗୃହ ବାବଦକୁ ଭଡା ଦିଆଯାଉଥିଲେ ସୁଦ୍ଧା ମରାମତି କ୍ଷେତ୍ରରେ କାୈଣସି ପଦକ୍ଷେପ ନିଆଗଲାନି। ବର୍ତ୍ତମାନ କୋଠା ଅସୁରକ୍ଷିତ ନେଇ ବିଏମସି ପକ୍ଷରୁ ଜାରି ନୋଟିସକୁ ସମର୍ଥନ ଜଣାଉଛୁ। କିନ୍ତୁ ବିଏମସି ବ୍ୟବସାୟୀଙ୍କୁ ପ୍ରଥମେ ଥଇଥାନ କରିବା ଆବଶ୍ୟକ। ଏ ନେଇ ବିଏମସି ଅତିରିକ୍ତ କମିଶନର ଆଶୁତୋଷ ସାମଲ କହିଛନ୍ତି. ବିଏମସି ପକ୍ଷରୁ କୋଠା ଖାଲି କରିବାକୁ ନୋଟିସ ଜାରି କରାଯାଇଛି। କିନ୍ତୁ ବ୍ୟବସାୟୀମାନେ ନିଜେ କୋଠା ମରାମତି ପାଇଁ ଲିଖିତ ଭାବେ ଅନୁରୋଧ କରିଛନ୍ତି। କିନ୍ତୁ କମିଶନରଙ୍କ ପକ୍ଷରୁ ଦୋକାନ ଗୃହ ଗୁଡିକୁ ସର୍ଭେ କରିବା ପାଇଁ ନିର୍ଦ୍ଦେଶ ଦିଆଯାଇଛି। ବର୍ତ୍ତମାନ ସର୍ଭେ ଚାଲିଛି। ଖୁବ ଶୀଘ୍ର ଅନ୍ୟାନ୍ୟ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।