ନୂଆଦିଲ୍ଲୀ,୧୩।୩: ବିଶାଲ ମେଗା ମାର୍ଟ ଏକ ହାଇପର୍ମାର୍କେଟ ଷ୍ଟୋର୍ ଚେନ୍। ସାରା ଦେଶରେ ଏହାର ୫୫୦ରୁ ଅଧିକ ଷ୍ଟୋର ରହିଛି। ରାମ ଚନ୍ଦ୍ର ଅଗ୍ରଓ୍ବାଲ ହେଉଛନ୍ତି ବିଶାଲର ପ୍ରତିଷ୍ଠାତା। ପିଲାଦିନରୁ ସେ ପୋଲିଓ ଆକ୍ରାନ୍ତ। ହେଲେ ନିଜର ପରିଶ୍ରମ ଏବଂ ଦୃଢ଼ ଇଚ୍ଛାଶକ୍ତି ବଳରେ ସେ ଅସମ୍ଭବକୁ ସମ୍ଭବ କରିଦେଖାଇଛନ୍ତି।
୧୯୮୬ରେ ରାମଚନ୍ଦ୍ର ଋଣ କରି ଫଟୋକପି ଦୋକାନ ଖୋଲିଥିଲେ। ହେଲେ ତାଙ୍କ ମନ ବୁଝି ନ ଥିଲା। କିଛି ବଡ଼ କରିବାର ଆଶା ନେଇ ସେ ୧୯୮୭ରେ କୋଲକାତା ଲାଲ ବଜାରରେ ଡ୍ରେସ୍ ଦୋକାନ ଖୋଲିଥିଲେ। ପରେ ୨୦୦୧ରେ ସେ ଦିଲ୍ଲୀ ଆସି ବିଶାଲ ରିଟେଲ ନାମକ ରିଟେଲ କମ୍ପାନୀ ଆରମ୍ଭ କରିଥିଲେ।
ବ୍ୟବସାୟ ବଢ଼ିବା ପରେ ସେ ୨୦୦୨ରେ ବିଶାଲ ମେଗାମାର୍ଟ ନାମରେ ଦିଲ୍ଲୀରେ ଏକ ହାଇପରମାର୍କେଟ କମ୍ପାନୀ ଆରମ୍ଭ କରିଥିଲେ। କମ୍ପାନୀର ଅଭିବୃଦ୍ଧି ଲାଗି ସେ ଋଣ ନେଇଥିଲେ। ୨୦୦୮ରେ ତାଙ୍କୁ ମାନ୍ଦାବସ୍ଥା ଯୋଗୁ ୭୫୦ କୋଟିର କ୍ଷତି ହୋଇଥିଲା। ତାଙ୍କ କମ୍ପାନୀ ଦେବାଳିଆ ହୋଇଯାଇଥିଲା,ଏହାକୁ ଶ୍ରୀରାମ ଗ୍ରୁପ୍ କିଣି ନେଇଥିଲା।
୨୦୧୧ରେ ଅଗ୍ରଓ୍ବାଲ ଭି୨ ନାମକ ରିଟେଲ ନାମକ ନୂଆ କମ୍ପାନୀ ଛିଡ଼ା କରିଥିଲେ। ଏହାର ମୂଲ୍ୟ ଏବେ ୧୦୦୦ କୋଟି ଟଙ୍କା। ହେଲେ ତାଙ୍କ ହାତରୁ ବିଶାଲ ମେଗା ମାର୍ଟ ବାହାରି ଯାଇଥିଲା। ଏହାର ସବୁଠାରୁ ବଡ଼ ଶେୟାର ହୋଲ୍ଡର ଏବେ ସ୍ବିଜରଲ୍ୟାଣ୍ଡର ପାଟନର୍ସ ଗ୍ରୁପ୍ ଏବଂ ଭାରତର କେଦାରା କ୍ୟାପିଟାଲ ଅଟେ।
ବିଶାଲ ମେଗା ମାର୍ଟର ମୂଲ୍ୟ ପ୍ରାୟ ୪୧୫୦୦ କୋଟି ଟଙ୍କା ଅଟେ। ଏବେ ଏହା ଆଇପିଓ ଆଣିବାକୁ ପ୍ରସ୍ତୁତି ଚଳାଇଛି। ଏହାର ମୁକାବିଲା ମୁକେଶ ଅମ୍ବାନୀଙ୍କ ରିଲାଏନ୍ସ, ଟାଟା ଗ୍ରୁପ୍ର ଟ୍ରେଣ୍ଟ, ଆଭିନ୍ୟୁ ସୁପରମାର୍ଟସ ସହ ହେଉଛି।