ଭାରତର ସବୁଠାରୁ ଧନୀ ବ୍ୟବସାୟୀ ମୁକେଶ ଅମ୍ବାନୀ ସମଗ୍ର ବିଶ୍ୱରେ ପରିଚିତ। ବିଶ୍ୱରେ ଧନୀ ତାଲିତାରେ ତାଙ୍କର ସ୍ଥାନ ୪ର୍ଥରେ ରହିଛି। ବର୍ତ୍ତମାନ ସେ ଲୋକପ୍ରିୟ ଆପ୍ ଟିକ୍-ଟକ୍ କିଣିବାକୁ ମଧ୍ୟ ପ୍ରସ୍ତୁତି ଚଳାଇଛନ୍ତି। ମୁକେଶ ସବୁବେଳେ ଚର୍ଚ୍ଚାରେ ରହୁଥିବା ବେଳେ ତାଙ୍କ ସ୍ତ୍ରୀ ନୀତା ଅମ୍ବାନୀ ମଧ୍ୟ ଲାଇମଲାଇଟ୍ରେ ରହିବାକୁ ପସନ୍ଦ କରନ୍ତି। ସାମାଜିକ କାର୍ଯ୍ୟ ଏବଂ କ୍ରିକେଟରେ ନୀତା ବହୁତ ସକ୍ରିୟ। ତାଙ୍କର ଉଦାରତାକୁ ସମସ୍ତେ ପ୍ରଶଂସା କରନ୍ତି। ତେବେ ସୌନ୍ଦର୍ଯ୍ୟରେ ବଲିଉଡ୍ ସୁନ୍ଦରୀମାନଙ୍କୁ ମଧ୍ୟ ପଛରେ ପକାଇଦେଇଥିବା ନୀତା କିପରି ଅମ୍ବାନୀ ପରିବାରର ବୋହୂ ହେଲେ ଜାଣିଣା ସେ ବିଷୟରେ।
ନୀତାଙ୍କୁ ମୁକେଶଙ୍କ ମା’ କୋକିଲାବେନ ପସନ୍ଦ କରିଥିଲେ। ସେ ନୀତାଙ୍କୁ ଏକ କାର୍ଯ୍ୟକ୍ରମରେ ନାଚୁଥିବାର ଦେଖିଥିଲେ। ଏହା ପରେ ନୀତାଙ୍କୁ ବୋହୂ କରିବାକୁ ନିଷ୍ପତ୍ତି ନେଲେ। ଅମ୍ବାନୀ ଏକ ଧନୀ ପରିବାର ହୋଇଥିବା ବେଳେ ନୀତା ଏକ ମଧ୍ୟବିତ ପରିବାରର। ଉକ୍ତ ସମୟରେ ନୀତା ଏକ ବିଦ୍ୟାଳୟରେ ମାସକୁ ୮ଶହ ଟଙ୍କା ଦରମାରେ ଶିକ୍ଷାଦାନ କରୁଥିଲେ। ତେବେ ନୀତା ପିଲାମାନଙ୍କୁ ପାଠ ପଢ଼ାଇବାକୁ ବହୁତ ଭଲ ପାଉଥିଲେ। ତେଣୁ ଏତେ ବଡ଼ ଘରର ବୋହୂ ହେବା ପରେ ସେ ଆଉ ପିଲାମାନଙ୍କୁ ପାଠ ପଢ଼ାଇପାରିବେ ନାହିଁ ବୋଲି ଭାବିଥିଲେ। ଫଳରେ ସେ ମୁକେଶଙ୍କୁ ବିବାହ କରିବା ପାଇଁ ଏକ ସର୍ତ୍ତ ରଖିଥିଲେ। ବିବାହ ପରେ ଯଦି ସେ ପିଲାମାନଙ୍କୁ ଶିକ୍ଷାଦାନ କରିପାରିବେ ତେବେ ସେ ଏହି ବିବାହ ପାଇଁ ରାଜି ହେବେ ବୋଲି କହିଥିଲେ। ନୀତାଙ୍କ ଏହି କଥା ଶୁଣିବା ପରେ ମୁକେଶ ତୁରନ୍ତ ହଁ କରିଦେଇଥିଲେ। ବିବାହ ପରେ ମଧ୍ୟ ସେ ଏକ ଘରୋଇ ସ୍କୁଲରେ ଶିକ୍ଷୟିତ୍ରୀ ଭାବେ କାର୍ଯ୍ୟ ଜାରି ରଖିଥିଲେ।