ଟିକିରି,୫।୬(ଡି.ଏନ୍.ଏ.): ପ୍ରାକୃତିକ ଜଙ୍ଗଲ ନଷ୍ଟ କରି କଂକ୍ରିଟ ଜଙ୍ଗଲ ସୃଷ୍ଟି କରିବାରେ ସମସ୍ତେ ବ୍ୟସ୍ତ। ଏହାଦ୍ୱାରା ତାପମାତ୍ରା ବୃଦ୍ଧି ପାଇବା ସହ ବନ୍ୟଜନ୍ତୁଙ୍କ ଜୀବନ ବିପଦରେ ପଡ଼ିଛି। ଜଙ୍ଗଲର ଆବଶ୍ୟକତା ନେଇ ଅନେକ ଉଚ୍ଚ ଶିକ୍ଷିତ ଯୁବଗୋଷ୍ଠୀ ସଚେତନ ନ ଥିବାବେଳେ ଉପାନ୍ତ ଅଞ୍ଚଳର ଜଣେ ରାଜମିସ୍ତ୍ରି ଜଙ୍ଗଲ ସୁରକ୍ଷା ପାଇଁ ନିଜ ଜୀବନକୁ ଉତ୍ସର୍ଗ କରିଛନ୍ତି। ଶତାଧିକ ହେକ୍ଟରର ଲଣ୍ଡା ‘ଡାଙ୍ଗ ଡଙ୍ଗର’କୁ ଦୀର୍ଘ ୧୫ ବର୍ଷ ଧରି ସୁରକ୍ଷା ଯୋଗାଇ ଆସିଛନ୍ତି। ସେ ହେଲେ ରାୟଗଡ଼ା ଜିଲା କାଶୀପୁର ଗୌଡ଼ ସାହିର ବୁଟି ଗୌଡ଼।
ମା’ ବାପାଙ୍କ ପରଲୋକ ପରେ ୩ ଭଉଣୀ ଏବଂ ୨ ଭାଇଙ୍କୁ ନେଇ ବୁଟିଙ୍କ ପରିବାର। ୫ ଭଉଣୀ ଭାଇଙ୍କ ମଧ୍ୟରେ ବୁଟି ସବୁଠାରୁ ସାନ। ଜଣେ ଭଉଣୀଙ୍କ ବିବାହ ହୋଇଥିବାବେଳେ ଅନ୍ୟମାନେ ଅବିବାହିତ ରହିଛନ୍ତି। ୬ ଡିସିମିଲ ଘର, ଡିହ ବ୍ୟତୀତ ସେମାନଙ୍କର ଡଙ୍ଗର ଜମି କି ବିଲବାଡ଼ି ନାହିଁ। ଶ୍ରମିକଭାବେ କାମ କଲେ ପରିବାର ଚଳେ। ପିଲାଟି ଦିନରୁ ବୁଟି ଶ୍ରମିକ ଭାବେ କାମ କରୁଥିବାବେଳେ ଏବେ ସେ ଜଣେ ରାଜମିସ୍ତ୍ରି ଭାବେ ପରିଚିତ। ଦିନରେ ମିସ୍ତ୍ରି କାମ କରି ପରିବାର ଚଳାଉଥିବାବେଳେ ବଳକା ସମୟ ସେ ଜଙ୍ଗଲ ପାଇଁ ଦେଇଥାନ୍ତି।
ବୁଟି ନିଜ ବୟସ ଠିକ୍ଭାବେ ଜାଣି ନ ଥିଲେ ମଧ୍ୟ ପ୍ରାୟ ୪୦ ହେବ ବୋଲି କୁହନ୍ତି। ୧୫ ବର୍ଷ ତଳେ କାଶୀପୁର ଅଞ୍ଚଳ ଘଞ୍ଚ ଜଙ୍ଗଲରେ ପରିପୂର୍ଣ୍ଣ ଥିଲା। ଏଠାରେ ବାଘ, ଭାଲୁଙ୍କ ଭୟରେ ଲୋକେ ସନ୍ଧ୍ୟା ହେଲେ ତାଟିକବାଟ ବନ୍ଦକରି ଘରେ ରହୁଥିଲେ। କାଶୀପୁରର ଡାଙ୍ଗ ଡଙ୍ଗରରେ ସରକାରଙ୍କ ପକ୍ଷରୁ ବିଭିନ୍ନ କିସମର ଚାରା ଲଗାଯାଇଥିବାବେଳେ ବଡ଼ ବଡ଼ ବୃକ୍ଷ ରହିଥିଲା। ଦୈନନ୍ଦିନ ଜୀବିକା ନିର୍ବାହ ନିମନ୍ତେ ଲୋକେ ଜଙ୍ଗଲ ଉପରେ ହିଁ ନିର୍ଭର କରୁଥିଲେ। ହେଲେ ବନ ବିଭାଗର ଆନ୍ତରିକତାର ଅଭାବ ଯୋଗୁ ଧୀରେ ଧୀରେ ଲୋକେ ଜଙ୍ଗଲରୁ ମୂଲ୍ୟବାନ ଗଛଗୁଡ଼ିକୁ କାଟି ଲଣ୍ଡା କରିଦେଲେ। ବନ୍ୟଜନ୍ତୁ ମଧ୍ୟ ଜଙ୍ଗଲ ଛାଡ଼ି ଗାଁ ଓ ସହର ମୁହାଁ ହେଲେ। ଏହା ବୁଟିଙ୍କୁ ବେଶ୍ କଷ୍ଟ ଦେଇଥିଲା। ଗାଁର କେତେଜଣ ଯୁବକଙ୍କ ସହାୟତାରେ ଜଙ୍ଗଲ ନଷ୍ଟ ନ କରିବାକୁ ସେ ଲୋକଙ୍କୁ ସଚେତନ କରିବା ସହ ନିଜେ ଜଙ୍ଗଲର ସୁରକ୍ଷା ଦାୟିତ୍ୱ ନେଇଥିଲେ। ଏହାପରେ ଲୋକେ ଗଛ କାଟିବା ବନ୍ଦ କରିଥିଲେ। ମାତ୍ର କେତୋଟି ଅଧାକଟା ଗଛ ରହିଥିବାବେଳେ ପୁଣି ଜଙ୍ଗଲ ସୃଷ୍ଟି କରିବାକୁ ବୁଟି ପଣ କରିଥିଲେ। ବର୍ଷା, ଖରା ଖାଇ ଅଧାକଟା ଗଛଗୁଡ଼ିକରୁ ଧୀରେ ଧୀରେ ପତ୍ର କଅଁଳିଲା। ଏବେ ସେଗୁଡ଼ିକ ବଡ଼ ହୋଇ ପୁଣି ଜଙ୍ଗଲରେ ପରିଣତ ହେଲାଣି। ହରିଡ଼ା, ବାହାଡ଼ା, ଅଁଳା, କାଜୁ, ବେଲ, ଶାଗୁଆନ ଆଦି ବୃକ୍ଷ ଲଣ୍ଡା ଡଙ୍ଗରକୁ ପୁଣି ସବୁଜ ଜଙ୍ଗଲରେ ପରିଣତ କରିଛି। ସେହିପରି ମୟୂର, ଠେକୁଆ, କୁଟୁରା, ବାର୍ହା ଭଳି ଅନେକ ଜୀବଜନ୍ତୁ ଏଠାରେ ରହୁଛନ୍ତି। ବୁଟିଙ୍କ ଦୀର୍ଘ ବର୍ଷର ମହତ ପ୍ରଚେଷ୍ଟାରେ ଏହା ସମ୍ଭବ ହୋଇପାରିଛି।
ଆଗକୁ କାଶୀପୁର ବ୍ଲକରେ ଥିବା ଅନ୍ୟ ଜଙ୍ଗଲଗୁଡ଼ିକୁ ସୁରକ୍ଷା କରିବା ବୁଟିଙ୍କ ଲକ୍ଷ୍ୟ। ତେଣୁ ଏକ କମିଟି ଗଠନ କରି ଗାଁ ଗାଁ ବୁଲି ସେ ଲୋକଙ୍କୁ ସଚେତନ କରିବାକୁ ଯୋଜନା କରିଛନ୍ତି। ସରକାରୀ ସହଯୋଗ ମିଳିଲେ କାଶୀପୁର ଚତୁଃପାର୍ଶ୍ୱରେ ରହିଥିବା ଅନ୍ୟ ଉଜୁଡ଼ା ଜଙ୍ଗଲଗୁଡ଼ିକୁ ମଧ୍ୟ ପୁଣି ସବୁଜ ଅରଣ୍ୟରେ ପରିଣତ କରିବାକୁ ଉଦ୍ୟମ କରିବେ ବୋଲି ବୁଟି କହିଛନ୍ତି।