ନୂଆଦିଲ୍ଲୀ,୨।୫ : କ୍ରମାଗତ ବିଫଳତା ପରେ ବଦଳି ଦେଲେ ଅଧିନାୟକ। କିନ୍ତୁ ଫଳାଫଳରେ ଆସିଲା ନାହିଁ କୌଣସି ପରିବର୍ତ୍ତନ। ରବିବାର ଖେଳାଯାଇଥିବା ମ୍ୟାଚ୍ରେ ରାଜସ୍ଥାନ ରୟାଲ୍ସ ୫୫ ରନ୍ରେ ସନରାଇଜର୍ସ ହାଇଦ୍ରାବାଦକୁ ହରାଇ ଦେଇଛି। ଏହା ହାଇଦ୍ରାବାଦ୍ ଦଳର ଚଳିତ ଆଇପିଏଲରେ ୬ଷ୍ଠ ପରାଜୟ। ଏହା ସହିତ ପ୍ରାୟତଃ ଶେଷ ହୋଇଯାଇଛି ଦଳର ପ୍ଲେ ଅଫ୍ ଆଶା।
୨୨୧ ରନ୍ର ବିଶାଳ ବିଜୟ ଲକ୍ଷ୍ୟ ନେଇ ଓହ୍ଲାଇଥିବା ସନରାଇଜର୍ସକୁ ଭଲ ଆରମ୍ଭ ଦେଇଥିଲେ ମନୀଷ ପାଣ୍ଡେ(୩୧) ଓ ଜନ୍ନି ବେଆରଷ୍ଟୋ(୩୦)। ଦୁହେଁ ପାଓ୍ବାରପ୍ଲେରେ ଯୋଡ଼ିଥିଲେ ୫୭ ରନ୍। ମାତ୍ର ପୁଣି ଥରେ ଫେଲ୍ ମାରିଥିଲା ଦଳର ମିଡ୍ଲ ଅର୍ଡର। କିଛି କରିପାରି ନ ଥିଲେ ନୂଆ ଅଧିନାୟକ କେନ ଓ୍ବିଲିୟମସନ (୨୧)। ଫଳରେ ହାଇଦ୍ରାବାଦ ୮ ଉଇକେଟ ହରାଇ ମାତ୍ର ୧୬୫ ରନ୍ କରିବାକୁ ସକ୍ଷମ ହୋଇଥିଲା।
ରାଜସ୍ଥାନ ପାଇଁ ଚୌକା ଓ ଛକା ବର୍ଷା କରିଥିଲେ ଅଧିନାୟକ ସଞ୍ଜୁ ସାମସନ (୪୮ ରନ୍, ୪ ଚୌକା ଓ ୨ ଛକା) ଓ ଜୋସ ବଟଲର। ଦୁଇ ବ୍ୟାଟ୍ସମ୍ୟାନ ଦ୍ୱିତୀୟ ଉଇକେଟ ପାଇଁ ଯୋଡ଼ିଥିଲେ ୧୫୦ ରନ୍। ତାହା ପୁଣି ମାତ୍ର ୮୨ ବଲରେ। ବଟଲରଙ୍କ ୧୨୪ ରନ୍ର ବିସ୍ଫୋରକ ପାଳିରେ ସାମିଲ ଥିଲା ୧୧ ଚୌକା ଓ ୮ ଛକା। ଏହା ତାଙ୍କ ଟି୨୦ କ୍ୟାରିୟରର ପ୍ରଥମ ଶତକ। ଏଥି ଯୋଗୁ ରାଜସ୍ଥାନ ପୂରା ୨୦ ଓଭରରେ ୩ ଉଇକେଟ ହରାଇ ୨୨୦ ରନ୍ କରିବାକୁ ସକ୍ଷମ ହୋଇଥିଲା।