ନୂଆଦିଲ୍ଲୀ,୭।୮: ରାଜଧାନୀ ଦିଲ୍ଲୀରେ ପ୍ରଦୂଷଣକୁ କମ୍ କରିବାକୁ ଏବେ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କ ସରକାର ଇଲୋକ୍ଟ୍ରନିକ୍ସ ଯାନ ଉପରେ ଗୁରୁତ୍ୱ ଦେବାକୁ ଯାଉଛନ୍ତି। ଏ ସମ୍ପର୍କରେ ଆସିଥିବା ପଲିସିକୁ ନେଇ ଶୁକ୍ରବାର ଘୋଷଣା କରାଯାଇଛି। ଏରେ ରାଜଧାନୀବାସୀ ଇଲୋକ୍ଟ୍ରନିକ୍ସ ଯାନ କ୍ରୟ କଲେ ୩୦ ହଜାରରୁ ୧.୫ ଲକ୍ଷ ପର୍ଯ୍ୟନ୍ତ ପ୍ରୋତ୍ସାହନ ରାଶି ମିଳିବ ବୋଲି ଘୋଷଣା କରାଯାଇଛି। ଏହାସହ ଚାର୍ଜିଂ ସୁବିଧା ପାଇଁ ଦିଲ୍ଲୀରେ ପାଖାପାଖି ୨ଶହ ସ୍ଥାନରେ ଚାର୍ଜିଂ ଷ୍ଟେଶନ କରାଯିବାକୁ ଯୋଜନା ମଧ୍ୟ ରହିଛି। ଶୁକ୍ରବାର ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ଏକ ଭିଡିଓ କନଫରେନ୍ସ ମାଧ୍ୟମରେ ରାଜଧାନୀରେ ପ୍ରଦୂଷଣ କମ୍ କରିବା ସରକାରଙ୍କ ପ୍ରାଥମିକତା ବୋଲି କହିଛନ୍ତି। ପୂର୍ବରୁ ଏହାକୁ ଗୁରୁତ୍ୱ ଦିଆଯାଇଥିବାରୁ ଏବେ ଦିଲ୍ଲୀରେ ପ୍ରଦୂଷଣର ମାତ୍ରା ୨୫ ପ୍ରତିଶତ କମ୍ ହୋଇଛି ବୋଲି ସେ କହିଛନ୍ତି। ତେବେ ଇଲୋକ୍ଟ୍ରନିକ୍ସ ଯାନ ଯେମିତିକି ବାଇକ୍ କିଣିଲେ ୩୦ ହଜାର, କାର୍ କିଣିଲେ ୧.୫ ଲକ୍ଷ ଓ ଇ-ରିକ୍ସା ବା ଅଟୋ ରିକ୍ସା କିଣିଲେ ୩୦ ହଜାର ଟଙ୍କା ପର୍ଯ୍ୟନ୍ତ ସରକାର ପ୍ରୋତ୍ସାହନ ରାଶି ଯୋଗାଇ ଦେବେ ବୋଲି କେଜରିଓ୍ବାଲ କହିଛନ୍ତି।