ନୂଆଦିଲ୍ଲୀ,୧୬।୧ : କେନ୍ଦ୍ର ମନ୍ତ୍ରୀ ଜିତେନ୍ଦ୍ର ସିଂ କହିଛନ୍ତି ଯେ ଗତ ଆଠରୁ ନଅ ବର୍ଷ ମଧ୍ୟରେ ପାଣିପାଗ ବିଭାଗର ପୂର୍ବାନୁମାନର ସଠିକତା ପ୍ରାୟ ୪୦ ପ୍ରତିଶତ ବୃଦ୍ଧି ପାଇଛି। ଏହି କ୍ରମରେ, ୨୦୨୫ ସୁଦ୍ଧା, ସମଗ୍ର ଦେଶରେ ଏକ ଡୋପଲର ପାଣିପାଗ ରାଡାର ନେଟୱାର୍କ ସ୍ଥାପିତ ହେବ। ଦେଶରେ ଡୋପଲର ରାଡାର ସଂଖ୍ୟା ୨୦୧୩ ରେ ୧୫ ରୁ ୨୦୨୩ ରେ ୩୭କୁ ବୃଦ୍ଧି ପାଇଛି।
ଆସନ୍ତା ଦୁଇରୁ ତିନି ବର୍ଷ ମଧ୍ୟରେ ଭାରତ ଏହି ସଂଖ୍ୟାକୁ ୬୨ରେ ପହଞ୍ଚାଇବାର ଲକ୍ଷ୍ୟ ରଖିଛି। ଆଗାମୀ ଦିନରେ ୨୫ ଟି ନୂଆ ରାଡାର ସ୍ଥାପନ କରାଯିବ। ଭାରତ ପାଣିପାଗ ବିଭାଗ (ଆଇଏମଡି) ର ୧୪୮ ତମ ଫାଉଣ୍ଡେଶନ ଦିବସ କାର୍ଯ୍ୟକ୍ରମରେ ଯୋଗ ଦେଇ ସିଂ କହିଛନ୍ତି ଯେ ପୂର୍ବାନୁମାନର ଉନ୍ନତି ସହିତ ବିପର୍ଯ୍ୟୟ ଜନିତ ମୃତ୍ୟୁ ହାର ଏକକ ସଂଖ୍ୟାକୁ ଖସି ଆସିଛି।
ଆଇଏମଡି ରବିବାର ଦିନ ହିମାଚଳ ପ୍ରଦେଶ, ଉତ୍ତରପ୍ରଦେଶ ଏବଂ ଜମ୍ମୁ-କଶ୍ମୀରରେ ଚାରିଟି ଡୋପଲର ପାଣିପାଗ ରାଡାର କମିଶନ କରିଛି। ଏହି କାରଣରୁ ପଶ୍ଚିମ ହିମାଳୟ ଅଞ୍ଚଳରେ ପାଣିପାଗ ନିରୀକ୍ଷଣ କ୍ଷମତା ସୁଦୃଢ଼ ହୋଇପାରିବ। ଉତ୍ତରାଖଣ୍ଡର ସୁରକଣ୍ଡା ଦେବୀ, ହିମାଚଳର ଜୋତ ଏବଂ ମୁରାରୀ ଦେବୀ ଏବଂ ଜାମ୍ମୁ କଶ୍ମୀରର ବାନିହଲ ରେ ଏଗୁଡ଼ିକ ସ୍ଥାପନ କରାଯାଇଛି।