ନୂଆଦିଲ୍ଲୀ,୧୮।୧ : ତ୍ରିପୁରା, ମେଘାଳୟ ଏବଂ ନାଗାଲାଣ୍ଡ ଆଦି ତିନୋଟି ଉତ୍ତର-ପୂର୍ବ ରାଜ୍ୟ ପାଇଁ ବିଧାନସଭା ନିର୍ବାଚନ ତାରିଖ ଘୋଷଣା କରାଯାଇଛି। ମୁଖ୍ୟ ନିର୍ବାଚନ କମିଶନର ରାଜୀବ କୁମାର ବୁଧବାର ଏହା ଘୋଷଣା କରିଛନ୍ତି। ଏଥିସହ ସେ ୬ ଟି ରାଜ୍ୟରେ ସାତୋଟି ବିଧାନସଭା ଏବଂ ଲୋକସଭା ଆସନରେ ଉପ-ନିର୍ବାଚନର ପ୍ରକ୍ରିୟା ଏବଂ ତାରିଖ ଘୋଷଣା କରିଛନ୍ତି।
ଯେଉଁ ଆସନଗୁଡିକ ପାଇଁ ଉପ-ନିର୍ବାଚନ ଘୋଷଣା କରାଯାଇଛି ସେଥିମଧ୍ୟରେ ଅରୁଣାଚଳ ପ୍ରଦେଶ, ଝାଡଖଣ୍ଡ, ପଶ୍ଚିମବଙ୍ଗ ଏବଂ ତାମିଲନାଡୁର ପ୍ରତ୍ୟେକରେ ଗୋଟିଏ ବିଧାନସଭା ଆସନ ଏବଂ ମହାରାଷ୍ଟ୍ରର ଦୁଇଟି ବିଧାନସଭା ଆସନ ରହିଛି। ଏହା ସହିତ ଲାକ୍ଷାଦ୍ୱୀପ କେନ୍ଦ୍ର ଶାସିତ ଅଞ୍ଚଳରେ ଗୋଟିଏ ଲୋକସଭା ଆସନ ପାଇଁ ମଧ୍ୟ ଉପ-ନିର୍ବାଚନ ଅନୁଷ୍ଠିତ ହେବ।
ନିର୍ବାଚନ ଆୟୋଗଙ୍କ ଅନୁଯାୟୀ, ଏହି ଆସନଗୁଡିକର ନିର୍ବାଚନ ପାଇଁ ଜାନୁଆରୀ ୩୧ ରେ ବିଜ୍ଞପ୍ତି ଜାରି କରାଯିବ। ଏବଂ ନାମାଙ୍କନପତ୍ର ଦାଖଲ କରିବାର ଶେଷ ତାରିଖ ହେଉଛି ଫେବୃଆରୀ ୭ । ଫେବୃଆରୀ ୮ ରେ ନାମାଙ୍କନପତ୍ର ଯାଞ୍ଚ କରାଯିବ। ଏଥି ସହିତ, ଫେବୃଆରୀ ୧୦ ପର୍ଯ୍ୟନ୍ତ ନାମାଙ୍କନ ପ୍ରତ୍ୟାହାର କରାଯାଇପାରିବ। ଫେବୃଆରୀ ୨୭ ରେ ଏହି ଆସନଗୁଡିକରେ ମତଦାନ ଅନୁଷ୍ଠିତ ହେବ। ମାର୍ଚ୍ଚ ୨ରେ ଉପ-ନିର୍ବାଚନର ଫଳାଫଳ ଘୋଷଣା କରାଯିବ।
ଉପ-ନିର୍ବାଚନ ହେବାକୁ ଥିବା ବିଧାନସଭା ଆସନ ମଧ୍ୟରେ ଅରୁଣାଚଳ ପ୍ରଦେଶର ଲୁମଲା ବିଧାନସଭା ଆସନ, ଝାଡଖଣ୍ଡର ରାମଗଡ, ପଶ୍ଚିମବଙ୍ଗର ସାଗରଦିଘୀ, ତାମିଲନାଡୁର ଏରୋଡ ଏବଂ ମହାରାଷ୍ଟ୍ରର କସବା ପେଠ ଓ ଚିଞ୍ଚୱାଡରେ ଦୁଇଟି ବିଧାନସଭା ଆସନ ରହିଛି। ଏହା ସହିତ ଲାକ୍ଷାଦ୍ୱୀପ ଲାକ୍ଷାଦ୍ୱୀପ କେନ୍ଦ୍ର ଶାସିତ ଅଞ୍ଚଳର ଲୋକସଭା ଆସନ ପାଇଁ ଉପ-ନିର୍ବାଚନ ଅନୁଷ୍ଠିତ ହେବ