ବ୍ରହ୍ମପୁର ଅଫିସ,୬ା୬: ବାହାନଗା ନିକଟରେ ଟ୍ରେନ ଦୁର୍ଘଟଣା କଥା ଭାବିବା ବେଳକୁ ଲୁହ ଆସିଯାଉଛି। ମୁ ଓ ମୋ ପରିବାର ଭଗବାନଙ୍କ କୃପାରୁ ସେଠାରୁ ସୁରକ୍ଷିତ ଫେରିଛୁ ବୋଲି ଦୁର୍ଘଟଣାରୁ ବର୍ତ୍ତିଥିତ୍ବା ବ୍ରହ୍ମପୁର ଗୋସାଇଁ ନୂଆଗାଁ ଅଞ୍ଚଳର ଇଜିକେୟଲ ଦାସ କହିଛନ୍ତି। ସେ ୨ ତାରିଖ ସନ୍ଧ୍ୟା ୫ଟାରେ ଖଡଗପୁରରୁ କରମଣ୍ଡଳ ଏକ୍ସପ୍ରେସରେ ଆସୁଥିଲେ। ତାଙ୍କର ଓ ତାଙ୍କ ସ୍ତ୍ରୀ ସୁମିତା ଦାସଙ୍କ କୋଚ ନଂ. ବି-୨ରେ ୪୨ ଓ ୪୩ ନଂ ସିଟ ରହିଥିବା ବେଳେ ପୁଅ ଜର୍ଜ ଜେକପ ଦାସଙ୍କ କୋଚ୍ ନଂ ବି-୮ରେ ସିଟ୍ ନଂ ୫୯ ଥିଲା। ହେଲେ ବି-୨ କୋଚ୍ରେ ହିଁ ପୁଅ ତାଙ୍କ ସହ ବସିଲା। କିଛି ସମୟ ପରେ ଟିଟି ଆସିବାରୁ କୋଚ୍ ବି-୮ର ସିଟ ପରିବର୍ତ୍ତନ କରିବାକୁ ଚାହୁଁଛି ବୋଲି ଇଜିକେୟଲ କହିଥିଲେ। ଟିଟି ବି-୮ରେ ଥିବା ଟିଟିଙ୍କୁ କହିବାକୁ କହିଥିଲେ। ସନ୍ଧ୍ୟା ୭ଟାରେ ବଗିକୁ ଏକ ଶକ୍ତ ଧକ୍କା ହେବା ସହ ଭୀଷଣ ଶବ୍ଦ ଶୁଭିଥିଲା। ରେଳ ଲାଇନ ଉପରେ ବଗିଟି ଘୋଷାଡି ହେଲା ଭଳି ଲାଗିଲା। ସେ ସମୟରେ ମୁଁ ଓ ମୋ ପରିବାର ସଦସ୍ୟ ଆଗ ସିଟକୁ ଧରି ବସିଗଲୁ ବୋଲି ଇଜିକେୟଲ କହିଛନ୍ତି। ସେତବେଳକୁ ବାହାରୁ ଚିତ୍କାର ଶୁଭିଲାଣି। ଆମ ବଗି ସାମାନ୍ୟ ଭାରସାମ୍ୟ ହରାଇଥିଲେ ମଧ୍ୟ ସୁରକ୍ଷିତ ଥିଲା। ସାହସ ଜୁଟାଇ ମୁଁ ଓ ମୋ ପରିବାର ବଗି ବାହାରକୁ ଆସିଲୁ। ଚାରିଆଡ଼େ ଅନ୍ଧାର। ଅନେକ ବଗିର ଚକ ଓଲଟି ପଡିଥିବା ଓ ଉପରେ ତାର ଝୁଲୁଥିଲା। ବଗି ତଳେ ଲୋକେ ଚାପି ହୋଇ ଚିତ୍କାର କରୁଥିଲେ। କିଛି ସମୟ ମଧ୍ୟରେ ନିକଟରେ ଥିବା ଗ୍ରାମବାସୀ ଆସି ବହୁତ ସାହାର୍ଯ୍ୟ କରିଥିଲେ। ଦୁର୍ଘଟଣାଗ୍ରସ୍ତ ଯାତ୍ରୀଙ୍କୁ ପାଣି ମଧ୍ୟ ଦେଇଥିଲେ। କିଛି ଦୂର ଚାଲିକି ଆସିବା ପରେ ଆମେ ଜାତୀୟ ରାଜପଥରେ ପହଞ୍ଚିଥିଲୁ। ଏହାପରେ ବାଲେଶ୍ୱରରେ ରହୁଥିବା ଜଣେ ସଂପର୍କୀୟଙ୍କୁ ଫୋନ କଲି। ସପରିବାର ତାଙ୍କ ଘରେ ରହି ବ୍ରହ୍ମପୁରକୁ କାର ଯୋଗେ ଫେରିଲୁ ବୋଲି ଇଜିକେୟଲ କହିଛନ୍ତି। ଭଗବାନଙ୍କ କୃପାରୁ ଅନେକ ଯାତ୍ରୀ ସୁରକ୍ଷିତ ଅଛନ୍ତି। ଦୁର୍ଘଟଣାରେ ମୃତକଙ୍କ ପରିବାର ବର୍ଗଙ୍କୁ ସେ ଗଭୀର ସମବେଦନା ଜଣାଇଛନ୍ତି।