ରଗଡି,୨୫ା୧୧(ଡି.ଏନ.ଏ.): ରାଜ୍ୟ ସରକାର ନାରୀ ସଶକ୍ତିକରଣ ପାଇଁ ପ୍ରତ୍ୟେକ କ୍ଷେତ୍ରରେ ମହିଳାଙ୍କୁ ଅଗ୍ରାଧିକାର ଦେଉଛନ୍ତି। ମହିଳା କିଭଳି ସ୍ବାବଲମ୍ବୀ ହୋଇପାରିବେ ସେଥିପାଇଁ ବିଭିନ୍ନ ଯୋଜନାରେ ବିପୁଳ ଟଙ୍କା ଖର୍ଚ୍ଚ ହେଉଛି। ହେଲେ କେତେଜଣ ଦୁର୍ନୀତିଖୋର ଅଧିକାରୀଙ୍କ ଆନ୍ତରିକତାର ଅଭାବ ସାଙ୍ଗକୁ ଅନିୟମିତତା ଏହି ଯୋଜନାର ସଫଳତା ପରାହତ କରିଥିବା ଅଭିଯୋଗ ହୋଇଛି। ଏହାର ଏକ ଉଦାହରଣ ଦେଖିବାକୁ ମିଳିଛି ଯାଜପୁର ଜିଲା କୋରେଇ ବ୍ଲକ ପଛିକୋଟ ପଞ୍ଚାୟତରେ।
ପଞ୍ଚାୟତର ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି) ମହାସଂଘର ସଶକ୍ତିକରଣ ନିମନ୍ତେ ଏକ ମିଶନ ଶକ୍ତି ଗୃହ ନିର୍ମାଣ ପାଇଁ ୨୦୧୯-୨୦ ଆର୍ଥିକ ବର୍ଷରେ ୫ ଲକ୍ଷ ଟଙ୍କା ବ୍ୟୟ ବରାଦ ହୋଇଥିଲା। କୋରେଇ ଶିଶୁ ବିକାଶ ଅଧିକାରୀ (ସିଡିପିଓ) ପଞ୍ଚାୟତସ୍ତରୀୟ ମହାସଂଘର ସଭାନେତ୍ରୀ ନିରୂପମା ଜେନା ଓ ସମ୍ପାଦିକା ରଶ୍ମିତା ଆଚାର୍ଯ୍ୟଙ୍କୁ ମିଶନ ଶକ୍ତି ଗୃହ ନିର୍ମାଣ ଶେଷ ହୋଇଥିବା ଏବଂ ସେଠାରେ ସଂଘର ସଭା ସମିତି ଓ ଉତ୍ପାଦିତ ସାମଗ୍ରୀ ବିକ୍ରି କରିବେ ବୋଲି ୨ା୧୦ା୨୦୨୧ରେ ପତ୍ରସଂଖ୍ୟା ୮୪୮ରେ ସୂଚନା ଦେଇଥିଲେ। ଉକ୍ତ ପତ୍ର ପାଇବା ପରେ ମହିଳା ମହାସଂଘର ପ୍ରାୟ ୧୫୦ ମହିଳା ପଛିକୋଟ ସରପଞ୍ଚ ମହେନ୍ଦ୍ର ପ୍ରତାପ ସିଂହଙ୍କ ନିକଟରେ ପହଞ୍ଚି କେଉଁଠି ମିଶନ ଶକ୍ତି ଗୃହ ନିର୍ମାଣ ହୋଇଛି ବୋଲି ପ୍ରଶ୍ନ କରିଥିଲେ। କିନ୍ତୁ ସେ ସନ୍ତୋଷଜନକ ଉତ୍ତର ଦେଇ ପାରି ନ ଥିଲେ। ଅନ୍ୟପକ୍ଷେ ପଛିକୋଟ ଜଗନ୍ନାଥ ମନ୍ଦିର ନିକଟରେ ଥିବା ପେଣ୍ଡାଲକୁ ମିଶନ ଶକ୍ତି ଗୃହ ଦର୍ଶାଇ ସିଂହଭାଗ ଅର୍ଥ ହରିଲୁଟ ହୋଇଥିବା ସଂଘ କର୍ମକର୍ତ୍ତା ଜାଣିବାକୁ ପାଇଥିଲେ। କିଭଳି ସ୍ବୟଂ ସହାୟକ ଗୋଷ୍ଠୀ ଅଗୋଚରରେ ୬ଟି ପିଲରରେ ଛାତ ପଡି ମିଶନ ଶକ୍ତିର କୌଣସି ସୁବିଧା ସୁଯୋଗ ନ କରି ଗୃହ ନିର୍ମାଣ ହେଲା ବୋଲି ପ୍ରଶ୍ନ କରି ମହିଳାମାନେ ସରପଞ୍ଚଙ୍କୁ ଘେରିଥିଲେ। ଅନ୍ୟପକ୍ଷେ ପଛିକୋଟ ଜଗନ୍ନାଥ ମନ୍ଦିର ନିକଟରେ ଥିବା ଏହି ମଣ୍ଡପ ପୂର୍ବରୁ ଠାକୁରଙ୍କ ଟଙ୍କାରେ ନିର୍ମାଣ ହୋଇଥିବାବେଳେ ମିଶନଶକ୍ତି ଗୃହ ଅର୍ଥ ହରିଲୁଟ ହୋଇଥିବା ସେମାନେ ଅଭିଯୋଗ କରିଥିଲେ। ତରବରିଆ ଭାବେ ସେଠାରେ ମିଶନ ଶକ୍ତି ଫଳକ ଲଗାଯାଇଥିବା ଦର୍ଶାଇ ପଞ୍ଚାୟତର ଶତାଧିକ ମହିଳା କୋରେଇ ବିଧାୟକ, ବ୍ଲକ ଉନ୍ନୟନ ଅଧିକାରୀ ଓ ଜିଲାପାଳଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ପରେ ଏବେ ଧରାପଡିଯିବା ଭୟରେ ଗ୍ରାମର ମଣ୍ଡପକୁ ମିଶନ ଶକ୍ତି ଗୃହ ଦର୍ଶାଉଥିବା ଚର୍ଚ୍ଚା ହେଉଛି। ପଞ୍ଚାୟତରେ କୌଣସି ମିଶନ ଶକ୍ତି ଗୃହ ନିର୍ମାଣ ହୋଇ ନ ଥିବାବେଳେ ମିଥ୍ୟା ଫଳକ ଲଗାଇ ସରକାରୀ ଅର୍ଥ ହରିଲୁଟ କରିଥିବା ମହିଳାମାନେ ତାଙ୍କ ଅଭିଯୋଗରେ ଦର୍ଶାଇଛନ୍ତି।
ଏ ସଂକ୍ରାନ୍ତରେ କୋରେଇ ବିଡିଓ ରଞ୍ଜନ ପରିଡ଼ାଙ୍କୁ ପଚାରିବାରେ ସେ କହିଛନ୍ତି, କୋରେଇ ବ୍ଲକରେ ଆବଣ୍ଟିତ ମୋଟ ୨୩ଟି ମିଶନ ଶକ୍ତି ଗୃହ ମଧ୍ୟରୁ ୫ଟି ନିର୍ମାଣ ହେବାକୁ ଅଛି। ୧୭ଟିର କାମ ସମ୍ପୂର୍ଣ୍ଣ ହୋଇ ହସ୍ତାନ୍ତର ହୋଇଛି। ତେବେ ପଛିକୋଟ ଗୃହ ବିଷୟରେ ସେ କିଛି ଜାଣି ନାହାନ୍ତି। ଯଦି ଦୁର୍ନୀତି ହୋଇଥାଏ ତେବେ ଏହାର ତଦନ୍ତ ହେବ ବୋଲି ସେ ସ୍ପଷ୍ଟ କରିଛନ୍ତି।