ନୂଆଦିଲ୍ଲୀ,୩୧।୫: କରୋନା ସଂକ୍ରମଣକୁ ନେଇ ବିଭିନ୍ନ ମାମଲାର ବିଚାର ସୁପ୍ରିମ୍କୋର୍ଟରେ ଜାରି ରହିଛି। ଏକ ମାମଲାର ଶୁଣାଣି ସମୟରେ କେନ୍ଦ୍ର ସରକାର ପକ୍ଷରୁ ସୁପ୍ରିମ୍କୋର୍ଟଙ୍କ ସମ୍ମୁଖରେ କୁହାଯାଇଛି ଯେ, ଚଳିତ ୨୦୨୧ ବର୍ଷ ଶେଷ ସୁଦ୍ଧା ଦେଶର ସମସ୍ତ ୧୮ ବର୍ଷରୁ ଉର୍ଦ୍ଧ୍ୱ ବୟସ୍କଙ୍କୁ ଟିକାଦାନ କରାଯାଇ ସାରିଥିବ। ଜାନୁୟାରୀରୁ ବର୍ତ୍ତମାନ ସୁଦ୍ଧା ଦେଶର ୫ ପ୍ରତିଶତ ଲୋକଙ୍କୁ ଭାକ୍ସିନ୍ର ଉଭୟ ଡୋଜ୍ ମିଳିଥିବା କେନ୍ଦ୍ର ସରକାର କହିଛନ୍ତି। ତେବେ କେତେକ ବିଶେଷଜ୍ଞଙ୍କ ଅନୁସାରେ ଚଳିତ ବର୍ଷ ଶେଷସୁଦ୍ଧା ଦେଶର ୩୫ରୁ ୪୦ ପ୍ରତିଶତ ଜନସଂଖ୍ୟାଙ୍କୁ ଟିକାଦାନ କରାଯାଇ ପାରିବ। ବିଦେଶରୁ ଟିକା ଆମଦାନୀ ପାଇଁ କେତେକ ରାଜ୍ୟ ସରକାର ଗ୍ଲୋବାଲ ଟେଣ୍ଡର ଘୋଷଣା କରିଛନ୍ତି। ଏହା କେନ୍ଦ୍ର ସରକାରଙ୍କ ନୀତି ଅନ୍ତର୍ଗତ କି ବୋଲି ସର୍ବୋଚ୍ଚ ନ୍ୟାୟାଳୟ ପ୍ରଶ୍ନ କରିଛନ୍ତି। ଏହାର ଉତ୍ତରରେ କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଛି ଯେ, ଫାଇଜର କମ୍ପାନୀ ସହିତ ଭାରତ ସରକାର ଆଲୋଚନା କରୁଛନ୍ତି। ଆଳୋଚନା ସଫଳ ହେଲେ ଚଳିତ ବର୍ଷ ଶେଷସୁଦ୍ଧା ଟିକାକରଣ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିବ। କୋଓ୍ବିନ୍ ଆପ୍ ଦ୍ୱାରା ପଞ୍ଜିକରଣ କରାଯିବା ଯୋଗୁ ଗ୍ରାମାଞ୍ଚଳରେ ସମସ୍ୟା ଉପୁଜୁଥିବା ନେଇ ସୁପ୍ରିମ୍କୋର୍ଟ କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି। ଏନେଇ ନିଜର ନୀତିରେ କେନ୍ଦ୍ର ସରକାର ପରିବର୍ତ୍ତନ ଆଣିବା ଉପରେ କୋର୍ଟ ଗୁରୁତ୍ୱାରୋପ କରିଛନ୍ତି।