୪୦ ବର୍ଷରୁ କମ୍ ଆୟୁ ବିଶିଷ୍ଟ ବିଶ୍ୱର ପ୍ରଭାବଶାଳୀ ଲୋକଙ୍କ ତାଲିକାରେ ସାମିଲ ହୋଇ ଚର୍ଚ୍ଚାରେ ଜଣେ ଶିକ୍ଷକ। ସେ ହେଲେ ଅନ୍ଲାଇନ୍ ଶିକ୍ଷା ଆପ୍ ‘ବାୟଜୁ’ ର ସଂସ୍ଥାପକ ବାୟଜୁ ରବିନ୍ଦ୍ରନ। ଓ୍ବେଲ୍ଥ ମାଗାଜିନ୍ ଫର୍ଚୁନ ପକ୍ଷରୁ ପ୍ରକାଶିତ ୪୦ଜଣ ପ୍ରଭାବଶାଳୀ ଲୋକଙ୍କ ତାଲିକାରେ ରବିନ୍ଦ୍ରନ ସାମିଲ ହୋଇଛନ୍ତି। ଅନ୍ଲାଇନ୍ ଶିକ୍ଷାଦାନ କିଭଳି ଏକ କମ୍ପାନୀ ଛିଡ଼ା କରାଯାଇପାରିବ ସେ ତାହା ବିଶ୍ୱକୁ ଦେଖାଇଥିବା ମାଗାଜିନ୍ରେ କୁହାଯାଇଛି। ତେବେ ୨୦୧୧ରେ ସ୍ଥାପନ କରାଯାଇଥିବା ଏହି ଷ୍ଟାଟ୍ଅପ୍ ଏବଂ ୭୩୩୦୦ କୋଟି ଟଙ୍କାର କମ୍ପାନୀ ପାଲଟିଛି।
କେରଳର କନ୍ନୁର ଜିଲାର ଅଝିକୋଡ଼ ଗ୍ରାମରେ ଜନ୍ମିତ ରବିନ୍ଦ୍ରନ ସ୍କୁଲରେ ଶିକ୍ଷକତା କରୁଥିଲେ। ତାଙ୍କ ବାପାମା’ ମଧ୍ୟ ଶିକ୍ଷକତା କରୁଥିଲେ। ପରେ ଅନ୍ଲାଇନ୍ରେ ପିଲାଙ୍କୁ ପାଠ ପଢ଼ାଇବା ଉଦ୍ଦେଶ୍ୟରେ ବାୟଜୁ ଆପ୍ ପ୍ରସ୍ତୁତ କରିଥିଲେ। କରୋନା କାଳରେ ଗୋଟିଏ ପଟେ ଅନ୍ୟ ବ୍ୟବସାୟ ଠପ୍ ହୋଇପଡ଼ିଥିବା ବେଳେ ରବିନ୍ଦ୍ରନ ସଫଳତାର ସୋପାନ ପରେ ସୋପାନ ଚଢ଼ି ସାରିଛନ୍ତି। ସ୍କୁଲ ବନ୍ଦ ଥିଲେ ହେଁ ତାଙ୍କ ଆପ୍ ଜରିଆରେ ପିଲାମାନେ ପାଠ ପଢ଼ିପାରୁଛନ୍ତି। ତାଲିକାରେ ମୁକେଶ ଅମ୍ବାନୀଙ୍କ ପୁଅ ଆକାଶ ଏବଂ ଝିଅ ଈଶା ମଧ୍ୟ ସାମିଲ ଥିବା ବେଳେ ରବିନ୍ଦ୍ରନଙ୍କ ସଫଳତାକୁ ନେଇ ପ୍ରଶଂସା କରାଯାଉଛି।