ଭୁବନେଶ୍ୱର, ୫।୧(ବ୍ୟୁରୋ): ରାଜ୍ୟ ସରକାରଙ୍କ ଗୁରୁତ୍ୱପୂର୍ଣ୍ଣ କ୍ୟାବିନେଟ୍ ବୈଠକ ବୁଧବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ପୂର୍ବାହ୍ନ ୧୧ଟା ୪୫ ମିନିଟ୍ରେ ଲୋକସେବା ଭବନଠାରେ ଅନୁଷ୍ଠିତ ହେବ। ଏହି ବୈଠକ ବସିବାକୁ ଥିବାବେଳେ ଯେଉଁ ମନ୍ତ୍ରୀମାନେ ନିଜ ଏରିଆରେ ଥିବେ ସେମାନେ ଜିଲାପାଳଙ୍କ କନ୍ଫରେନ୍ସ ହଲ୍ରୁ ଡିଜିଟାଲ ମାଧ୍ୟମରେ ଯୋଡ଼ି ହୋଇପାରିବେ। ୨୦୨୨ ବର୍ଷରେ ଏହା ହେଉଛି ପ୍ରଥମ କ୍ୟାବିନେଟ୍ ବୈଠକ। ଏଥର କ୍ୟାବିନେଟ୍ରେ ୮ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ମଞ୍ଜୁରୀ ମିଳିପାରେ। ମୁଖ୍ୟତଃ ରାଜସ୍ବ, ଅର୍ଥ, ଆଇନ, ପଞ୍ଚାୟତିରାଜ, ପୂର୍ତ୍ତ ଓ ଖଣି ବିଭାଗ ଆଦିର ଗୋଟାଏ ଲେଖା ପ୍ରସ୍ତାବକୁ କ୍ୟାବିନେଟ୍ ମଞ୍ଜୁରୀ ମିଳିବ। ଗତ ୩୧ ତାରିଖରେ ରାଜ୍ୟ ସରକାରଙ୍କ ଏକ କ୍ୟାବିନେଟ୍ ବୈଠକ ଅନୁଷ୍ଠିତ ହୋଇଥିବା ବେଳେ ଏବେ ଆଉ ଥରେ ବସିବାକୁ ଯାଉଛି। ଗତ ୨୦ ଦିନ ମଧ୍ୟରେ ୩ ଥର କ୍ୟାବିନେଟ୍ ବସିସାରିଲାଣି। ପଞ୍ଚାୟତ ନିର୍ବାଚନ ଲାଗି ଆଗାମୀ ଦିନରେ କୌଣସି ସମୟରେ ଆଦର୍ଶ ନିର୍ବାଚନ ଆଚରଣବିଧି ଲାଗିବା ସମ୍ଭାବନା ଅଛି। ତେଣୁ ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ସାଧାରଣ ଲୋକଙ୍କ ଲାଗି ଏକ ବଡ ଧରଣର ପ୍ରସ୍ତାବକୁ ମଞ୍ଜୁରୀ ଦେଇପାରନ୍ତି ବୋଲି ଜଣାପଡ଼ିଛି।