ନୂଆଦିଲ୍ଲୀ: ରାସ୍ତାରେ ଟଙ୍କା ପଡ଼ିଥିବାର ଦେଖି, କୌଣସି ମଧ୍ୟ ବ୍ୟକ୍ତି ଏହାକୁ ଅତି ସହଜରେ ଅଣଦେଖା କରିପାରନ୍ତିନି ଏବଂ ଯଦି ଏହା ୧୦୦ ଟଙ୍କିଆ ନୋଟ ହୋଇଥାଏ ତେବେ ଯେ କେହିବି ଏହି ଟଙ୍କାକୁ ଉଠାଇବାକୁ ଚେଷ୍ଟା କରିଥାନ୍ତି। ମଣିଷର ଏହି ମାନସିକତାକୁ ଦୃଷ୍ଟିରେ ରଖି ଗୋଟିଏ କମ୍ପାନୀ ବିଜ୍ଞାପନର ଏକ ନୂଆ ଉପାୟ ବାହାର କରିଛି, ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ସାମାଜିକ ଗଣମାଧ୍ୟମ ଇନ୍ଷ୍ଟାଗ୍ରାମରେ ଏପରି ଏକ ଭିଡିଓ ଭାଇରାଲ ହେବାରେ ଲାଗିଛି। ଭିଡିଓରେ ଏକ ୧୦୦ ଟଙ୍କିଆ ନୋଟ୍ ରାସ୍ତାରେ ପଡିଥିବାର ଦେଖିବାକୁ ମିଳିଛି। ଏପରି ପରିସ୍ଥିତିରେ ଜଣେ ବ୍ୟକ୍ତି ଉକ୍ତ ନୋଟକୁ ଉଠାଇ ଧରିଥିବାବେଳେ ଏହା ସମ୍ପୂର୍ଣ୍ଣ ଭାବେ ଅବିକଳ ୧୦୦ ଟଙ୍କିଆ ନୋଟ୍ ପରି ଦେଖାଯାଉଛି। କିନ୍ତୁ ବ୍ୟକ୍ତି ଜଣକ ଉକ୍ତ ନୋଟ୍ଟିକୁ ଓଲଟାଇବା ମାତ୍ରେ ଯାହା ଦେଖିଛନ୍ତି, ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଏହି ୧୦୦ ଟଙ୍କିଆ ନୋଟର ପଛପଟେ ଏକ କାଫେର ବିଜ୍ଞାପନ ଛପାଯାଇଛି। ଏକ କମ୍ପାନୀ କାଗଜର ଗୋଟିଏ ପାର୍ଶ୍ୱରେ ୧୦୦ ଟଙ୍କିଆ ନୋଟ୍ ସଦୃଶ ଛାପିଥିବା ବେଳେ ଏହାର ଅନ୍ୟପାର୍ଶ୍ୱରେ କାଫେର ବିଜ୍ଞାପନ ଛାପିଛି। ସେହିପରି ଉକ୍ତ କାଗଜଟିକୁ ରାସ୍ତାରେ ଏପରି ରଖାଯାଇଛି, ଯେପରି ଏହା ଉପରୁ ପ୍ରକୃତ ୧୦୦ ଟଙ୍କିଆ ନୋଟ୍ ପରି ଦେଖାଯିବ। ଭାଇରାଲ ଭିଡିଓରେ ଏହି ୧୦୦ ଟଙ୍କିଆ ନୋଟ୍ ଉଠାଇଥିବା ବ୍ୟକ୍ତି ଜଣକ ଉକ୍ତ ନୋଟ୍ର ପଛପଟେ କାଫେର ବିଜ୍ଞାପନ ଦେଖି ପ୍ରତାରିତ ଅନୁଭବ କରିଛନ୍ତି। ତେବେ ଏପରି ନିଆରା ବିଜ୍ଞାପନ ପ୍ରସ୍ତୁତ କରିଥିବାରୁ ସେ କମ୍ପାନୀକୁ ପ୍ରଶଂସା କରିଛନ୍ତି। ବିଜ୍ଞାପନ ପ୍ରଚାରର ଏହି ନୂଆ ଉପାୟକୁ ନେଇ ସୋସିଆଲ ମିଡିଆରେ ଚର୍ଚ୍ଚା ଲାଗିରହିଛି। କମ୍ପାନୀର ଏହି କୌଶଳ ଫଳରେ ଯେ କେହିବି ୧୦୦ ଟଙ୍କିଆ ନୋଟ୍ ପଛପଟେ ଥିବା ବିଜ୍ଞାପନ ପଢ଼ିବାକୁ ବାଧ୍ୟ ହେବେ ବୋଲି କେତେଜଣ ୟୁଜର୍ସ କହିଛନ୍ତି।
