ନୂଆଦିଲ୍ଲୀ,୧୭।୧୧: କରୋନା ସଙ୍କଟ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶକୁ ଆତ୍ମନିର୍ଭରଶୀଳ କରିବା ପାଇଁ ‘ଭୋକାଲ ଫର୍ ଲୋକାଲ’ ପାଇଁ ନିବେଦନ କରିଥିଲେ। ବିଶେଷ କରି ଦୀପାବଳି ପୂର୍ବରୁ ପ୍ରଧାନମନ୍ତ୍ରୀ ଏହି ଉତ୍ସବରେ ସ୍ଥାନୀୟ ଜିନିଷ କିଣିବାକୁ ଦେଶବାସୀଙ୍କୁ ନିବେଦନ କରିଥିଲେ। ମୋଦିଙ୍କ ଏହି ନିବେଦନ ଉପରେ ଲୋକମାନେ ବିଦେଶୀ ସାମଗ୍ରୀକୁ ବହିଷ୍କାର କରିଛନ୍ତି। ବିଶେଷକରି ଏହି ଦୀପାବଳୀରେ ଚାଇନା ବ୍ୟବସାୟୀଙ୍କୁ ବଡ ଝଟ୍କା ଲାଗିଛି। ଫେଡେରେସନ ଅଫ ଟ୍ରେଡ କନଫେଡେରେସନ ଅଫ ଅଲ ଇଣ୍ଡିଆ ଟ୍ରେଡର୍ସ (କ୍ୟାଟ) ଅନୁଯାୟୀ, ଏହି ଉତ୍ସବରେ ଚାଇନା ପ୍ରାୟ ୪୦ ହଜାର କୋଟି ଟଙ୍କା କ୍ଷତି ସହିଛି। ଏହି ଉତ୍ସବର ରୁତୁରେ ଲୋକମାନେ ଚାଇନାର ଉତ୍ପାଦକୁ ଅଣଦେଖା କରୁଥିବା ଦେଖାଯାଇଥିଲା। ଏକ ବିଜ୍ଞପ୍ତିରେ କୁହାଯାଇଛି ଯେ କ୍ୟାଟ ନେତୃତ୍ୱରେ ସାରା ଦେଶରେ ବ୍ୟବସାୟୀମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘ଭୋକାଲ ଫର୍ ଲୋକାଲ’ ତଥା ଆତ୍ମନିର୍ଭରଶୀଳ ଭାରତ ଆହ୍ବାନକୁ ଦୃଢ ଭାବରେ କାର୍ଯ୍ୟକାରୀ କରିଛନ୍ତି। ଦୀପାବଳିରେ କ୍ରୟ ଏବଂ ବିକ୍ରୟ ସଂଖ୍ୟା ଉତ୍କୃଷ୍ଟ ଥିଲା। କିନ୍ତୁ ଲୋକମାନେ ଖୋଲାଖୋଲି ଭାବେ ଚାଇନାର ଉତ୍ପାଦକୁ ବିରୋଧ କରିଥିଲେ। ବାଣିଜ୍ୟ ସଙ୍ଗଠନ କ୍ୟାଟ ଜାତୀୟ ସଭାପତି ବିସି ଭାରତୀ ଏବଂ ଜାତୀୟ ସାଧାରଣ ସମ୍ପାଦକ ପ୍ରବୀଣ ଖଣ୍ଡେଲୱାଲ ସୂଚନା ଦେଇଛନ୍ତି ଯେ, ଦେଶର ୨୦ଟି ବିଭିନ୍ନ ସହରରୁ ମିଳିଥିବା ରିପୋର୍ଟ ଅନୁଯାୟୀ, ଏହି ଦିପାବଳୀରେ ସାରା ଦେଶରେ ପ୍ରାୟ ୭୨ ହଜାର କୋଟି କାରବାର ହୋଇଥିଲା। କିନ୍ତୁ ଚାଇନା ସିଧାସଳଖ ପ୍ରାୟ ୪୦ ହଜାର କୋଟି କ୍ଷତି ସହିଛି। କ୍ୟାଟ୍ ଅନୁଯାୟୀ ଖୁଚୁରା ବ୍ୟବସାୟର ବିଭିନ୍ନ ବିଭାଗରେ ଭଲ ବ୍ୟବସାୟ ଥିଲା। ଭାରତରେ ନିର୍ମିତ ଏଫଏମ୍ଜି ଉତ୍ପାଦ, ଉପଭୋକ୍ତା ସାମଗ୍ରୀ, ଖେଳନା, ବୈଦ୍ୟୁତିକ ଉପକରଣ ଏବଂ ଆନୁଷଙ୍ଗିକ ସାମଗ୍ରୀ, ରୋଷେଇ ସାମଗ୍ରୀ, ଉପହାର ସାମଗ୍ରୀ, ମିଠା, ସ୍ନାକ୍ସ, ଘର ସାମଗ୍ରୀ, ବାସନ, ସୁନା ଏବଂ ଅଳଙ୍କାର, ଜୋତା, ଘଣ୍ଟା, ଆସବାବପତ୍ର, ପୋଷାକ, ଘର ସାଜସଜ୍ଜା, ଦୀପାବଳି ପୂଜା ସାମଗ୍ରୀ, ମାଟି ଦୀପ ସମେତ ସାମଗ୍ରୀ ବିକ୍ରୟ ଭଲ ଥିଲା। ଏଥି ସହିତ, ଏହି ଉତ୍ସବରେ ଖଦିି ଦ୍ରବ୍ୟର ରେକର୍ଡ ବିକ୍ରି ପ୍ରକାଶ ପାଇଛି ।