କୋଲକତା,୨୮।୯: ବିସିସିଆଇ ସଭାପତି ତଥା ପୂର୍ବତନ ଭାରତୀୟ ଅଧିନାୟକସୌରଭ ଗାଙ୍ଗୁଲିଙ୍କୁ କଲିକତା ହାଇକୋର୍ଟ ଜୋରିମନା କରିଛନ୍ତି। ଗାଙ୍ଗୁଲିଙ୍କ ସହ ବଙ୍ଗଳା ସରକାର ଏବଂ ଏହାର ଗୃହ ନିଗମକୁ ମଧ୍ୟ ଜୋରିମନା କରାଯାଇଛି। ଭୁଲ ଜମି ବଣ୍ଟନ କାରଣରୁ ହାଇକୋର୍ଟ ଗାଙ୍ଗୁଲିଙ୍କ ଉପରେ ୧୦ ହଜାର ଟଙ୍କା ଜୋରିମନା ଲଗାଇଥିବାବେଳେ ବେଙ୍ଗଲ ସରକାର ଏବଂ ଗୃହ ନିଗମକୁ ୫୦-୫୦ ହଜାର ଟଙ୍କା ଜୋରିମନା କରାଯାଇଛି। ହାଇକୋର୍ଟର ଜଷ୍ଟିସ ରାଜେଶ ବିନ୍ଦଲ ଏବଂ ଜଷ୍ଟିସ ଅରିଜିତ ବାନାର୍ଜୀଙ୍କ ଏକ ବେଞ୍ଚ ଜନହିତ ଯାଚିକା ଉପରେ ଶୁଣାଣି କରି କହିଛନ୍ତି ଯେ, ଜମି ଆବଣ୍ଟନ ମାମଲାରେ ଏକ ନିର୍ଦ୍ଦିିଷ୍ଟ ନୀତି ରହିବା ଉଚିତ। ଯାହାଫଳରେ ସରକାର ଏଭଳି କାର୍ଯ୍ୟରେ ହସ୍ତକ୍ଷେପ କରିପାରିବେ ନାହିଁ। ଗାଙ୍ଗୁଲିଙ୍କ ଶିକ୍ଷାନୁଷ୍ଠାନକୁ ନିୟମ ବିରୁଦ୍ଧରେ କୋଲକାତାର ନ୍ୟୁ ଟାଉନ ଅଞ୍ଚଳରେ ବଙ୍ଗଳା ସରକାର ଜମି ପ୍ରଦାନ କରିଥିଲେ। ଜନହିତ ଯାଚିକାରେ ଗାଙ୍ଗୁଲିଙ୍କ ଶିକ୍ଷା ଏବଂ କଲ୍ୟାଣ ସମିତିକୁ ବିଦ୍ୟାଳୟ ପାଇଁ ଦିଆଯାଇଥିବା ୨ ଏକର ଜମି ଉପରେ ପ୍ରଶ୍ନ ଉଠିଥିଲା।
ବେଞ୍ଚ କହିଛି ଯେ, ଦେଶ ସବୁବେଳେ ଖେଳାଳିଙ୍କ ପାଇଁ ଛିଡା ହୋଇଛି। ବିଶେଷକରି ଯେଉଁମାନେ ଆନ୍ତର୍ଜାତୀୟ ସ୍ତରରେ ଦେଶକୁ ପ୍ରତିନିଧିତ୍ୱ କରନ୍ତି। ଏହା ସତ୍ୟ ଯେ ଗାଙ୍ଗୁଲି କ୍ରିକେଟରେ ଦେଶକୁ ପୁରସ୍କାର ଆଣିଛନ୍ତି, କିନ୍ତୁ ଯେତେବେଳେ ଆଇନ ଏବଂ ନିୟମ କଥା ଆସେ, ସମ୍ବିଧାନରେ ସବୁକିଛି ସମାନ। ୨୦୧୬, ଏହି ଜମି ବଣ୍ଟନକୁ ଚ୍ୟାଲେଞ୍ଜ କରି ଏକ ଜନହିତ ଯାଚିକା ଦାଖଲ କରାଯାଇଥିଲା।